ކ. ގުރައިދޫ ކައުންސިލްގެ ރައީސްކަންވެސް ސަރުކާރު ހިންގާ ޕީއެންސީއަށް ލިބިއްޖެ އެވެ.

އިލެކްޝަންސް ކޮމިޝަނުން މިއަދު ވަނީ އެކަން އިއުލާނުކޮށްފަ އެވެ. އެ ކޮމިޝަނުން މިކަން އިއުލާނު ކުރީ ގުރައިދޫ ކައުންސިލްގެ ރައީސް ކަމަށް އަމިއްލަ ގޮތުން ވާދަކުރަން ކުރިމަތިލީ ކެންޑިޑޭޓްގެ ޝަރުތު ހަމަނުވާ ކަމަށް ނިންމުމުން އެ މައްސަލަ އޭނާ ސުޕްރީމްކޯޓަށް ހުށައަޅާ އެ ކޯޓުން އެ މައްސަލަ ބަލައިނުގަތުމަށް ނިންމުމުންނެވެ.

ކޮމިޝަނުން މިއަދު ބުނީ އެޕްރީލް ހަތަރެއްވާ ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބަށް ކުރިމަތިލުމަށް މުއްދަތު ހަމަވިއިރު، ކ. ގުރައިދޫ ކައުންސިލްގެ ރައީސްގެ މަގާމަށް ޝަރުތު ހަމަވެފައިވަނީ، އިންތިހާބު ކުރަން ޖެހޭ އަދަދަށް ކަމަށްވާތީ ލޯކަލް ކައުންސިލްތަކުގެ އިންތިހާބުގެ ގާނޫނުގައިވާ ގޮތުގެމަތިން، ޕީޕަލްސް ނޭޝަނަލް ކޮންގްރެސްގެ ކެންޑިޑޭޓް، ކ. ގުރައިދޫ / އޯޝަންރީޑް އިބްރާހީމް ޝަލީޒް، އިންތިހާބުވެފައިވާ ކަމަށެވެ.

އޭނާ އަކީ މިހާރު ގުރައިދޫ ކައުންސިލްގެ ނާއިބު ރައީސެވެ.