ކަދުރަކީ ރޯދަމަހާއި އެންމެ ގުޅުން ހުރި މޭވާއެވެ. ރޯދާ ވިއްލާ ގަޑީ ގަޔާއި، ހާރު ކައި ގަނޑީގައިވެސް ކަދުރު ބޭނުން ކުރުމަކީ ސުންނަތެކެވެ. މިއަދު ވޮއިސް ގެ ބަދިގެއިން މި ގެނެސްދެނީ ކަދުރުން ތައްޔާރު ކޮށްލެވޭނެ މީރު، އަދި ސިއްޙަތަށް ވެސް ފައިދާ ހުރި އެއްޗެއްގެ ރެސިޕީއެވެ. 

3 ޖޯޑު ކަދުރު ( އެންމެ ރަނގަޅުވާނީ ވަރަށް މަޑު އަދި އޮށް ނަގާފައި ހުރި ކަދުރު)

2 މޭޒުމަތީ ސަމުސާ ބަޓަރު

1 1/2 ޖޯޑު ހަނާކުރި ނަޓްސް (މިކްސްޑް ނަޓްސް ނުވަތަ އެއް ވައްތަރެއްގެ  ނަޓްސް ވެސް ބޭނުން ކިރެވިދާނެ)

1/3 ޖޯޑު ސެސަމީ ސީޑްސް

1/3 ޖޯޑު ހިއްކާފައި ހުރި ކާށި ހުނި (ޑެސިކޭޓެޑް ކޮކޮނަޓް)

1 ސައިސަމުސާ މުގުރާފައި ހުރި ކާފޫރު ތޮޅި

ތަވައެއް އުދާފައި މަޑުގިނީގައި ބަޓަރުކޮޅު ވިރުވާލުމަށްފަހު، ކަދުރުކޮޅު އަޅައިގެން 2 ނުވަތަ 3 މިނެޓު ވަންދެން ކައްކާލާށެވެ.

ދެން އޭގެ ތެރެއަށް ހަނާކޮށްފައި ހުރި ނަޓްސް، ސެސަމީ ސީޑްސް، ކާށި ހުނި އަދި ކާފޫރުތޮޅި ކޮޅު އަޅާފައި ރަނގަޅަށް އެއްކޮށްލާށެވެ. (މޭވާތައް މާ ބޮޑަށް ޗިސްވިޔަނުދީ ކޮންމެވެސް ވަރަކަށް ރާޅުކޮށް ހުންނާނެހެން ބަހައްޓާށެވެ.)

ތައްޔާރުކުރި މި މިކްސްޗަރު 2 ނުވަތަ 3 ބަޔަށް ބަހާލާށެވެ. އެއަށްފަހު "ޕާޗްމަންޓް ޕޭޕަރު" ބޭނުންކޮށްގެން އޮޅާލާށެވެ.

މި ރޯލް ހަރުވަންދެން، މަދުވެގެން 1 ގަޑިއިރު ވަންދެން، ފްރިޖްގައި ބާއްވާށެވެ.

ދެން ފްރިޖުން ނެގުމަށްފަހު، ބޭނުންނަމަ ބޭރުގައި ކާށި ހުނި ނުވަތަ ސެސަމީ ސީޑްސް ނޫނީ މުގުރާފައި ހުރި ޕިސްތާޗިއޯ އުނގުޅާލުމަަށްފަހު ކޮށާލާށެވެ.