އިނގިރޭސިވިލާތުގެ މުސްލިމް ޖަމިއްޔާތަކަށް ރޯދައާއި ދިމާކޮށް އެގައުމުގެ ބޭންކުން ފިއްތުންތައް ކުރިމަތިކުރުވަން ފަށައިފިއެވެ.

އެ ޖަމާއަތްތަކުން ވަނީ އެ ގައުމުގެ ބޭންކުތަކަށް ވަރަށް ބޮޑަށް ފާޑުކިޔައި، ބޭންކުތަކުން ނުހައްގުން އެކައުންޓުތަކަށް ހުރަސްއަޅައި ފައިސާ ފޮނުވުން ލަސްކުރަމުންދާ ކަމަށް ތުހުމަތު ވެސް ކޮށްފައެވެ. މި މައްސަލަ ބޮޑުވެފައިވަނީ ރަމަޟާން މަހުގެ ތެރޭގައި ސޫދާން، ސީރިޔާ އަދި ފަލަސްތީނު ފަދަ ހަނގުރާމައިގެ އަސަރުކޮށްފައިވާ ގައުމުތަކަށް އެހީ ފޯރުކޮށްދިނުމަށް މިލިއަނުން ފައިސާ އެއްކުރަމުންދާ ވަގުތެއްގައެވެ.

އެ ޖަމިއްޔާތަކުގެ އިސްވެރިން ބުނާ ގޮތުގައި، ބޭންކުތަކުން ގެންގުޅޭ މިފަދަ ހަރުކަށި އުސޫލުތަކުގެ ސަބަބުން، އަހަރުގެ އެންމެ މުހިންމު ވަގުތުގައި އެހީއަށް ބޭނުންވެފައިވާ ނިކަމެތި ރައްޔިތުންނަށް އެހީ ފޯރުކޮށްދިނުމަށް ވަނީ ހުރަސްތަކެއް ކުރިމަތިވެފައެވެ.

ރަމަޟާން މަހަކީ މުސްލިމުންގެ މެދުގައި ޒަކާތާއި ސަދަގާތް ދިނުން އެންމެ އިތުރުވާ މޫސުމެކެވެ. އެގޮތުން، އިނގިރޭސިވިލާތުގައި ދިރިއުޅޭ މުސްލިމުން ވެސް މި މުގައްދަސް މަހުގެ ތެރޭގައި ބިލިއަނުން ފައިސާ ހަދިޔާކުރާއިރު، މި ފައިސާއަކީ ކާބޯތަކެއްޗާއި، ބޭސްފަރުވާއާއި، ޔަތީމުންނަށް އެހީވުމުގެ އިތުރުން ރެފިއުޖީންނަށް އެހީވުމަށް ބޭނުންކުރާ ފައިސާއެވެ. ނަމަވެސް، މުސްލިމް ޖަމިއްޔާތަކުން ބުނާ ގޮތުގައި އެކަށީގެންވާ ސަބަބެއް ބަޔާންކުރުމެއް ނެތި ބޭންކުތަކުން އެކައުންޓުތައް ބަންދުކުރުމާއި، އައު އެކައުންޓު ހުޅުވައިނުދިނުމާއި، ބޭރަށް ފޮނުވާ ފައިސާ ތަކުރާރުކޮށް ލަސްކުރުން ފަދަ ކަންކަން ދަނީ ކުރަމުންނެވެ.

ޖަމިއްޔާތަކުގެ މަންދޫބުން ބުނާ ގޮތުގައި، ބޭންކުތަކުން މަނީ ލޯންޑަރިންގ އާއި ޓެރަރިޒަމަށް ފައިސާ ހޭދަކުރުން ހުއްޓުވުމުގެ ގަވާއިދުތައް ތަންފީޒުކުރަނީ ވަރަށް ބޮޑަށް ތަފާތުކުރުންތަކެއް ހިމެނޭ ގޮތަށެވެ. މާލީ އިދާރާތަކުން އެކަންކަމަކީ ގާނޫނީ ގޮތުން ފުރިހަމަކުރަންޖެހޭ ކަންކަން ކަމަށް ބުނި ނަމަވެސް، ފާޑުކިޔާ ފަރާތްތަކުން ބުނަނީ މިއީ ހަނގުރާމަވެރި ނުވަތަ ސިޔާސީ ގޮތުން ހަމަނުޖެހުން ބޮޑު ސަރަހައްދުތަކުގައި މަސައްކަތްކުރާ މުސްލިމް ޖަމިއްޔާތަކަށް އަމާޒުކޮށްގެން ކުރާ ކަމެއް ކަމަށެވެ. ބައެއް ޖަމިއްޔާތަކުން ބުނާ ގޮތުގައި، އެހީ ފޮނުވާ ގައުމުގެ ނަމަކަށް ސީރިޔާ ނުވަތަ ފަލަސްތީނު އޮތުމުން އެކަނިވެސް، އެއީ އިންސާނީ އެހީއަށް ފޮނުވާ ފައިސާކަން އެނގި ތިބެ ބޭންކުތަކުން ފައިސާ ހިފަހައްޓައެވެ.

މިކަމުގެ ސަބަބުން އެންމެ ބޮޑު ގޮންޖެހުންތަކެއް ކުރިމަތިވަނީ ކުދި ޖަމިއްޔާތަކަށެވެ. އެ ޖަމިއްޔާތަކުގައި ގާނޫނީ ޓީމުތަކާއި އިދާރީ ވަސީލަތްތައް މަދުވުމުން ބޭންކުތަކުން ކުރިމަތިކުރާ އުނދަގޫ މަރުހަލާތައް ކަޑައްތުކުރުމަށް ދަތިވެއެވެ. ޖަމިއްޔާތަކުން ބުނާ ގޮތުގައި ބޭންކުތަކުން ރިސްކު ވަޒަންކުރުމުގެ ބަދަލުގައި އިޚްތިޔާރުކުރަނީ "ރިސްކު ނުނެގުމުގެ" ސިޔާސަތެކެވެ. މީގެ މާނައަކީ ބޭންކުތަކުން އަމިއްލަ ސަލާމަތަށްޓަކައި ޚިދުމަތްތައް މެދުކަނޑާލުމެވެ. މީގެ ނަތީޖާއެއްގެ ގޮތުން ކާބޯތަކެއްޗާއި ބޯހިޔާވަހިކަމަށް އިންތިހާއަށް ބޭނުންވެފައިވާ ރައްޔިތުންނަށް އޭގެ ނޭދެވޭ އަސަރު ވަރަށް ބޮޑަށް ކުރެއެވެ.

މިއާއިއެކު، އެހީދޭ ޖަމިއްޔާތަކުން މިހާރު ގޮވާލަމުންދަނީ ބޭންކުތަކުގެ އުސޫލުތައް އިތުރަށް ހަރުދަނާކޮށް ބަލަހައްޓައި، އިންސާނީ އެހީދޭ ޖަމިއްޔާތަކަށް ބޭންކިންގ ޚިދުމަތްތައް ކަށަވަރުކޮށްދިނުމަށް ގާނޫނީ ރައްކާތެރިކަން ފޯރުކޮށްދިނުމަށެވެ. އިންސާނީ އެހީއަކީ ގަވާއިދުތަކުގެ ސަބަބުން ހުއްޓެންޖެހޭނެ އެއްޗެއް ނޫން ކަމަށާއި، ބޭންކުތަކުގެ އުސޫލުތައް މިއަށްވުރެ އިންސާފުވެރި އަދި ހާމަކަން ބޮޑު ގޮތެއްގައި ކުރިއަށް ގެންދަންޖެހޭނެ ކަމަށް އެފަރާތްތަކުން ބުނެއެވެ. އަދި ޖަމިއްޔާތަކުގެ އިސްވެރިން އަންނަނީ ބޭންކިންގ ނިޒާމަށް ބަދަލުތަކެއް ނުގެނެސްފިނަމަ، އޭގެ އެންމެ ބޮޑު ދެރައެއް ލިބޭނީ ބޭންކުތަކަކަށް ނޫން ކަމަށާއި، އެހީއަށް އިންތިޒާރުކުރަމުންދާ ނިކަމެތި ރައްޔިތުންނަށް ކަމަށް އިންޒާރުވެސް ދެމުންނެވެ.