ނޯތު ހާބަރުގެ 'އޭ ޒޯން' ގައި އުޅަނދުތަކަށް ފެނާއި ކަރަންޓުގެ ޚިދުމަތް ދޭން ފަށައިފި
ބޮޑުތަކުރުފާނު މަގާވީ ފަރާތު ތޮށިގަނޑު، ނުވަތަ މާލޭ ނޯތު ހާބަރުގެ 'އޭ ޒޯން' ތަރައްޤީކޮށް، އެ ސަރަހައްދަށް ބަނދަރުކުރާ އުޅަނދުފަހަރަށް ފެނާއި ކަރަންޓުގެ ޚިދުމަތް ފޯރުކޮށްދޭން ފަށާފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން ބުނެފިއެވެ.
މާލޭގެ ބޮޑުތަކުރުފާނު މަގު ތަރައްޤީކުރުމުގެ މަސައްކަތަށްޓަކައި މީގެ ކުރިން ނޯތު ހާބަރުން ޚިދުމަތް ހޯދަމުންދިޔަ އުޅަނދުތައް ވަނީ އެމް.އެމް.އޭ ސަރަހައްދާއި ހުޅުމާލެ ޕެޓްރޯލް ޖެޓީއަށް ވަގުތީ ގޮތުން ބަދަލުކޮށްފައެވެ. ނަމަވެސް، މަސައްކަތްތައް ނިމުމާ ގުޅިގެން މުދަލާއި ޕަސެންޖަރުން އުފުލާ އުޅަނދުތައް މިހާރު އަލުން 'އޭ ޒޯން' އަށް ބަނދަރުކުރަން ފަށާފައިވާ ކަމަށް އެ ކުންފުނިން މަޢުލޫމާތު ދެއެވެ.
އެމް.ޕީ.އެލް އިން ހާމަކުރި ގޮތުގައި، މި ސަރަހައްދުގެ ޚިދުމަތްތައް އަލުން ފެށިއިރު، މީގެ ކުރިން އެ ތަނުން ލިބެން ނެތް ފެނާއި ކަރަންޓުގެ ޚިދުމަތް މިހާރު ވަނީ އުޅަނދުފަހަރަށް ފޯރުކޮށްދޭން ފަށާފައެވެ. އަދި ބަނދަރުގެ ސަލާމަތީ ކަންކަން ހަރުދަނާކުރުމުގެ ގޮތުން، ބޭނުންނުކުރެވޭ ވަރަށް ހަލާކުވެފައި ހުރި ފައްތިޔާތަކުގެ ބަދަލުގައި 36 ފައްތިއްޔާ ބުޑު އަލަށް ފައްތައި، މުޅިން އައު ފައްތިއްޔާތައް މިހާރު ވަނީ ބޭނުންކުރަން ފަށާފައެވެ. މި ބަދަލާއެކު، އުޅަނދުފަހަރަށް ކުރިއަށްވުރެ ރައްކާތެރިކަމާއެކު ބަނދަރުކުރުމުގެ ފުރުސަތު ފަހިވެގެންދާނެ ކަމަށް އެ ކުންފުނިން މައުލޫމާތުދެއެވެ.
އެމްޕީއެލުން އިތުރަށް ބުނީ، ކުރިއަށް އޮތް ހަފުތާގެ ތެރޭގައި ނޯތު ހާބަރުގެ 'ބީ ޒޯން' ނުވަތަ ހުޅަނގު ފަރާތު ތޮށިގަނޑަށް އުޅަނދުތައް ބަދަލުކުރުމުގެ މަސައްކަތް ވެސް މިހާރު ކުރަމުންދާ ކަމަށެވެ.
ބޮޑުތަކުރުފާނު މަގު 4 ލޭނަށް ފުޅާކޮށް އެ މަގު ހެދުމުގެ މަސައްކަތް ނިންމާލުމަށް ފަހު، ރޯފަމަސް ފެށުމުގެ ކުރިން އާއްމުންނަށް ވަނީ ހުޅުވާލާފައެވެ. މިއާއިއެކު އެ މަގުގައި ތޮށްޖެހުން ކުޑަވެ، ދަތުރުފަތުރުގައި ބޮޑެތި ލުއި ފަސޭހަތަކެއް ވަނީ ލިބިފައެވެ.
Advertisement
This content is created and paid for by advertisers and does not involve Voice Journalists
