ބަންދު ރިކޯޑް އިންތިހާއަށް ގިނަ މީހަކު އަނެއްކާވެސް ވައްކަމުގެ ތުހުމަތުގައި ހައްޔަރުކޮށްފިއެވެ. 

ބަންދު އަމުރުގައިވާ ގޮތުން ހައްޔަރުކޮށްފައިވަނީ، ޅ. ކުރެންދޫއަށް ނިސްބަތްވާ މީހެކެވެ. އަދި އޭނާ ހައްޔަރުކޮށްފައިވަނީ ހައްޔަރުކުރުމުގެ އިޖުރާއަތްތަކާ އެއްގޮތަށެވެ. 

އޭނާ ހައްޔަރުކޮށް ބަންދުކުރުމަށް ކުރުމަށް އެދި ކޯޓަށް ހާޒިރު ކުރުމުން، އޭނާގެ މައްޗަށް ތުހުމަތުކުރެވޭ ކަންކަމާއި ހައްޔަރު/ބަންދު އިންތިހާއަށް ގިނަކަން ފާހަގަކޮށް، ޝަރީއަތުން ނަސޭހަތްތެރިވެފައިވާ ކަމަށް ބަންދު އަމުރުގައި ވެއެވެ.

އަދި ނަސޭހަތްތެރިވުމުން، އޭނާ ދިރިއުޅޭނެ، އެއްވެސް ބޯހިޔާވަހިކަމެއް ނެތްކަމަށާއި ވަޒީފާއެއް ނެތްކަމާއި، ނިދަނީ ވެސް، މަގުމަތީގައި ނުވަތަ ޖޯލިތަކުގައި ކަމުގައި، ވަރަށް އަަރާއެކު ބުނެފައިވާ ކަމަށް އަމުރުގައިވެއެވެ.

ބަންދު އަމުރުގައި އިތުރަށް ބުނީ، މީގެ ކުރީން ވެސް، އުފަން ރަށަށް ބަދަލުވުމަށް އޭނާ އެދިގެން، އެ ފުރުސަތު ފަހިކޮށްދީފައިވާ ކަމަށް މައްސަލައިގެ އައިއޯ ފާހަގަކުރި ކަމަށެވެ.

އަދި އޭގެ ރައްދުގައި، ރަށަށް ބަދަލު ނުވެވުނީ އޭނާ ޖޯއްޔެއްގައި ނިދާފައި، އޮއްވައި، ޖީބު ކީހާލައިގެން ފައިސާ އާއި، ފޯނު ވަގަށްނަގާފައިވާތީ ކަމަށް އޭނާ ބުނި ކަމަށްވެސް އަމުރުގައި ވެއެވެ.

އޭނާގެ ހާލަތަށް ރިޢާޔަތްކޮށް ފުލުހުންގެ އިންތިޒާމްތަކުގެ ތެރެއިން އޭނާ ބަންދުގައި ބަހައްޓާ ތަން އުފަން ރަށް ހިމެނޭ ތަނަކަށް ބަދަލުކުރުމަށް ޝަރީއަތުން ވަނީ އެދިފައެވެ.