ބޭސްފަރުވާއަށް ރާއްޖޭން ބޭރަށް ދަތުރުކުރާ ދިވެހިންނަށް ބޭންކް އޮފް މޯލްޑިވްސް (ބީއެމްއެލް) އިން ދޭ ޚިދުމަތްތައް އިތުރަށް ހަރުދަނާކޮށް، ބީއެމްއެލް މޮބައިލް އެޕް މެދުވެރިކޮށް ޑޮލަރަށް އެދި ހުށަހެޅޭނެ އިންތިޒާމް މިއަދު ހަމަޖައްސައިފިއެވެ.

މި އާ އިންތިޒާމުގެ ދަށުން، ބޭސްފަރުވާއަށް ބޭނުންވާ މުހިންމު ލިޔެކިޔުންތަކާއި މައުލޫމާތު އެޕް މެދުވެރިކޮށް ފަސޭހަކަމާއެކު ހުށަހެޅޭނެއެވެ. އަދި ހުށަހަޅާފައިވާ ހުށަހެޅުމުގެ މިހާރުގެ ހާލަތު ނުވަތަ އަދާހަމަތައްވެސް އެޕް މެދުވެރިކޮށް ކޮންމެ ވަގުތަކުވެސް ބަލާލެވޭނެ ކަމަށް ބޭންކުން މައުލޫމާތުދެއެވެ.

ބޭސްފަރުވާއަށް ދަތުރުކުރާ ފަރާތްތަކުގެ ތެރެއިން އާސަންދަ ނުވަތަ އެންސްޕާގެ އެހީގައި ދަތުރުކުރާ ފަރާތްތަކަށް 2000 ޑޮލަރާ ހަމައަށް ބޭންކުން ޑޮލަރު ވިއްކުމަށް ވަނީ ހަމަޖެހިފައެވެ. އަދި އަމިއްލަ ޚަރަދުގައި ބޭސްފަރުވާއަށް ދަތުރުކުރާ ފަރާތްތަކަށް 1000 ޑޮލަރާ ހަމައަށް ޑޮލަރު ވިއްކާނެއެވެ. ބޭންކުން ބުނި ގޮތުގައި މިގޮތަށް ވިއްކާ ޑޮލަރު ޖަމާކޮށްދޭނީ ސީދާ އެދި ހުށަހަޅާ ފަރާތުގެ ބީއެމްއެލް އެކައުންޓަށެވެ.

ޑޮލަރު ގަތުމަށް އެދި ހުށަހަޅާއިރު ބޭނުންވާ ލިޔެކިޔުންތަކަށް ބަލާއިރު، އާސަންދަ ނުވަތަ އެންސްޕާ މެދުވެރިކޮށް ހުށަހަޅާނަމަ، އެހީ ލިބުނުކަމުގެ ލިޔުމާއި، ޓިކެޓް އަދި ޕާސްޕޯޓް ކޮޕީ ހުށަހަޅަންޖެހެއެވެ. އަދި އަމިއްލަ ގޮތުން ބޭސްފަރުވާއަށް ދާ ފަރާތްތަކުން ޞިއްޙީ ފަރުވާ ބޭނުންވާކަން ކަށަވަރުކޮށްދޭ ޑޮކްޓަރުގެ ލިޔުމަކާއި ހޮސްޕިޓަލް އެޕޮއިންޓްމަންޓް ހަމަޖެހިފައިވާކަމުގެ ލިޔުން ހުށަހަޅަންޖެހޭނެއެވެ.

މީގެ އިތުރުން، ތިންވަނަ ފަރާތެއްގެ އެކައުންޓަށް ނުވަތަ ބަލިމީހާއާއެކު ދަތުރުކުރާ އެހީތެރިއެއްގެ އެކައުންޓަށް ފައިސާ ޖަމާކުރަން ބޭނުންވާނަމަ، ބަލިމީހާއާއި ފައިސާ ޖަމާކުރާ ފަރާތާ އޮތް ގުޅުން އެނގޭނެ ރަސްމީ ލިޔުމެއް ހުށަހަޅަންޖެހޭނެ ކަމަށްވެސް ބޭންކުން ބުނެއެވެ.

ބީއެމްއެލްއިން ވަނީ ދާދި ފަހުން ޑެބިޓް ކާޑުގެ ލިމިޓްތަކަށްވެސް ބޮޑެތި ބަދަލުތަކެއް ގެނެސްފައެވެ. އެގޮތުން، މިދިޔަ ނޮވެންބަރު މަހުން ފެށިގެން ރާއްޖޭން ބޭރުގެ ޕީއޯއެސް ޓާމިނަލްތަކުން ފައިސާ ދެއްކޭ އަދު 1000 ޑޮލަރަށް ވަނީ އިތުރުކޮށްފައެވެ. އަދި އެއާލައިން ޓިކެޓް ގަތުމަށާއި، ރާއްޖޭން ބޭރުގެ ހޮޓާތަކަށް ފައިސާ ދެއްކުމަށް ޑެބިޓް ކާޑުން ޚަރަދު ކުރެވޭ އަދަދު 3000 ޑޮލަރަށް ވަނީ މަތިކޮށްފައެވެ. މި ބަދަލުތަކާއެކު، ބޭސްފަރުވާއަށް ރާއްޖޭން ބޭރަށްދާ ފަރާތްތަކަށް ހޮސްޕިޓަލްތަކަށް ފައިސާ ދެއްކުމުގައި ބޮޑެތި ފަސޭހަތަކެއް ލިބިގެންދާނެއެވެ.