މިފަހަރުގެ ރަމަޟާން މަހުގެ ފަހު ދިހައަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް، އެ ދުވަސްވަރު އާންމުންނަށާއި ބޭންކުތަކަށް ބޭނުންވާ މުހިންމު ޚިދުމަތްތައް ފޯރުކޮށްދިނުމަށްޓަކައި ދެ ދުވަހު ހިދުމަތް ދޭނޭކަމަށް މަރުކަޒީ ބޭންކުން ބުނެފިއެވެ.

އެމްއެމްއޭ އިން މިއަދު ނެރުނު އިޢުލާނެއްގައި ބުނީ ރަމަޟާން މަހުގެ ފަހު ދިހައިގެ ބަންދު ދުވަސްތަކުގެ ތެރެއިން އަންނަ މާރިޗްމަހުގެ 11 ވާ ބުދަ ދުވަހާއި، 18 ވާ ބުދަ ދުވަހު އެ އޮތޯރިޓީ ހުޅުވާފައި ހުންނާނެއެވެ. މި ދެ ދުވަހުވެސް އެމްއެމްއޭ ހުޅުވާފައި ހުންނާނީ ހެނދުނު 09:00 އިން މެންދުރުފަހު 01:00 އަށެވެ.

ޚިދުމަތްތައް ދިނުމަށް ހަމަޖެހިފައިވާ ގަޑިތަކަށް ބަލާއިރު، ފައިސާ ބަލައިގަތުމާއި ދޫކުރުމުގެ ބޭންކިންގ ޚިދުމަތްތަކާއި، ސިޓީއާއި އެހެނިހެން ތަކެތި ބަލައިގަތުމުގެ ޚިދުމަތް ދިނުމަށް ހަމަޖެހިފައިވަނީ ހެނދުނު 09:30 ހުން ފެށިގެން 12 ޖެހުމާ ހަމައަށްކަމަށް އެމްއެމްއޭއިން ބުނެއެވެ.

ރަމަޟާން މަހުގެ ފަހު ދިހައަކީ އަޅުކަމަށް ހުސްވުމަށް ފުރުޞަތު ދިނުމުގެ ގޮތުން، ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅުއްވާފައިވާ ދުވަސްތަކެކެވެ.