އެމެރިކާގެ މިނެސޯޓާގެ ސެއިންޓް ޕޯލްގެ ސްކޫލެއްގެ ގްރޭޑް ފަހެއްގައި ކިޔަވާ މުސްލިމު ދަރިވަރުންތަކެއްގެ އީމާންތެރިކަމާއި ނަމާދަށް ބެހެއްޓި ސަމާލުކަން ފެނި، އެ ސުކޫލުގެ ޓީޗަރަކަށް ރޮވިއްޖެއެވެ.
ޓިއާ ޑޯނީ ނަމަކަށް ކިޔާ މި ޓީޗަރު މީސްމީޑިއާގައި ހިއްސާކުރި ވީޑިއޯއެއްގައި ބުނިގޮތުގައި، މި ހާދިސާ ހިނގީ އޭނާ ވަރޗުއަލްކޮށް ދަރިވަރުންނަށް ކިޔަވައިދިނުމަށްފަހު، މެންދުރުގެ ކެއުމުގެ ވަގުތަށް ބްރޭކް ނެގި ވަގުތެވެ.
ޓީޗަރު ކިޔައިދިން ގޮތުގައި، އޭނާ ކްލާސްރޫމްގައި އިންދާ ކޮރިޑޯ ތެރެއިން އަޑުތަކެއް އިވިގެން ބޭރަށް ނުކުމެ ބެލިއިރު، ގްރޭޑް 5ގައި ކިޔަވާ މުސްލިމު ދަރިވަރުންތަކެއް ނަމާދުކުރާނެ ތަނެއް ހޯދުމަށް މަސައްކަތް ކުރަނީއެވެ. އާންމުކޮށް އެ ދަރިވަރުން ނަމާދުކުރަނީ ސްކޫލް ކައުންސިލަރުގެ ކޮޓަރީގައެވެ. ނަމަވެސް އެ ދުވަހު ކައުންސިލަރު ސްކޫލަށް ހާޒިރުވެ ނެތުމުން، އެ ކުދިން ޓިއާގެ ގާތުން އޭނާގެ ކޮޓަރީގައި ނަމާދުކޮށްލުމުގެ ހުއްދައަށް އެދުނެވެ.
ޓީޗަރު ބުނިގޮތުގައި، އެ ކުދިން ނަމާދުކުރަން ތިއްބާ އޭނާ މޭޒު ދޮށުގައި އިނދެގެން އެ މަންޒަރު ބެލިއެވެ.
"އެކުދިންނަށް މިއީ ރޯދަމަސް. އެއީ މުސްލިމުން އަދާކުރާ އަޅުަކަމެއް. އަހަރެންނަށް ފެނުނީ އެމީހުންގެ ދީނަށް އަމަލު ކުރާތަން. އެއްވެސް ބޮޑު މީހަކު އެކުދިންނަށް މަޖުބޫރު ކުރުމެއް ނެތި. އަދި އެއްވެސް މީހަކު އިރުޝާދު ދޭން ނެތި، އެ ހަތަރު ދަރިވަރުން ނުހަނު ސީރިއަސްކަމާއެކު އެކަކު އަނެކަކާ އެއްވަރަށް ރުކޫޢުކޮށް، ސަޖިދަކޮށް، ނަމާދުގެ ހަރަކާތްތައް ފުރިހަމަކުރި ގޮތަކީ ފެނުނު ނުހަނު ރީތި މަންޒަރެއް،" ޓިއާ ބުންޏެވެ.
އެ ދަރިވަރުންގެ އަމަލުތަކާއި ދީނަށް އޮތް ލޯބި ފެނިފައި، ޓީޗަރަށް އުފަލުން ރޮވުނު ކަމަށާ، ކުދިން ނަމާދު ނިންމާލުމަށްފަހު ޓީޗަރު ރޮނީ ކީއްވެތޯ ސުވާލުކުރުމުން، އޭނާ ބުނީ އެކުދިންނާ މެދު ފަޚުރުވެރިވާ ކަމަށް ކަމަށް ބުނެފައިވެއެވެ.
"އެހާ ތުއްތު ކުދިބަޔަކު، ބޮޑު މީހަކު ބުނުމަކާ ނުލައި، ނަމާދު ވަގުތު ޖެހުމުން އެކަމަށް އިސްކަންދީ، އެހާ ފުރިހަމައަށް އެކަން ކުރިތަން ފެނުމުން އަހަރެންނަށް ވަރަށް އަސަރުކޮށްފި،" ޓީޗަރު ބުންޏެވެ.
މި ވީޑިއޯ މީސްމީޑިއާގައި އާންމުވުމާއެކު، ގިނަ ބަޔަކު ދަނީ އެ ދަރިވަރުންގެ ތައުރީފު ކުރަމުންނެވެ.
Advertisement
This content is created and paid for by advertisers and does not involve Voice Journalists
