ހއ. ދިއްދޫ ބިން ހިއްކުމުގެ މަޝްރޫޢު ކާމިޔާބު ކަމާއެކު ނިންމާލައިފި އެވެ.

މަސައްކަތް ފެށިތާ 50 ދުވަސްތެރޭ ދިއްދޫގެ ބިމަށް ވަނީ 112 ހެކްޓަރުގެ ބިން އިތުރުކޮށްފަ އެވެ. ދިއްދޫ ބިން ހިއްކުމުގެ މަޝްރޫޢު ކާމިޔާބު ކަމާއެކު ނިންމާލާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް މިރޭ ވަނީ އިއުލާނު ކުރައްވާފަ އެވެ.

ބިން ހިއްކާ ނިމިފައިވާ މަންޒަރު ފެންނަ ފޮޓޯތަކާއެކު ރައީސް ކުރެއްވި ޕޯސްޓްގައި ވަނީ މަސައްކަތަށް ހޭދަވީ އެންމެ 50 ދުވަސްކަން ފާހަގަ ކުރައްވާފަ އެވެ. އަލަށް ހިއްކި ބިމާއެކު ދިއްދޫގެ ބިމުގެ ސައިޒު ވަނީ ދެގުނަ ބޮޑުވެފަ އެވެ.

ދިއްދޫ ބިން ހިއްކަން ފެށީ އެރަށުގެ އެއަރޕޯޓް ތަރައްގީކުރުމާއި ބޯހިޔާވަހިކަމުގެ ބޭނުމަށެވެ. މި މަސައްކަތް އެމްއޭސީއެލްއިން ފެށީ ޖަނަވަރީ މަހުގެ 5 ވަނަ ދުވަހެވެ. 

މި މަޝްރޫއު ކުރިއަށް ގެންދިޔައީ މުޅި ދުނިޔޭގައި ވެސް މިވަގުތު އޮތް އެންމެ ބޮޑު ޑްރެޖަރުގެ ތެރޭގައި ހިމެނޭ އެއް ޑްރެޖަރު ބޭނުންކޮށްގެންނެވެ.  ޓްރެއިން ސަކްޝަން ހޮޕަރ، ލެއިވް އެރިކްޝަން ނަމަކަށް ކިޔާ މި ޑްރެޖަރަކީ، 46000 ކިއުބިކް މީޓަރުގެ ކެޕޭސިޓީ ހުރި ޑްރެޖަރެކެވެ. 

ހއ. ދިއްދޫ ބިން ހިއްކުމުގެ މަޝްރޫޢު ނިމުން -- 

ދިއްދޫގެ ބިން ހިއްކުމުގެ މަސައްކަތަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެރަށާއި ސަރަޙައްދުގެ ރައްޔިތުންނަށް ވެވަޑައިގެންފައިވާ މުހިންމު ވަޢުދުފުޅެކެވެ. އެ ރަށަކީ 5000 މީހުން ރަޖިސްޓްރީވެފައިވާ އާބާދީއެއް އޮތް ރަށެއްކަމުގައި ވިޔަސް، އެ ރަށުގެ ތަޢުލީމާއި ޞިއްޙީ ފަރުވާފަދަ ބޭނުންތަކަށް އެރަށަށް ހިޖުރަކޮށް ދިރިއުޅޭ މީހުންނާއެކު އެ ރަށުގައި ދިރިއުޅޭ އާބާދީ 7000 އަށް އަރަ އެވެ. 

އެހެންކަމުން، ބިން ހިއްކާ، އެ ބިމުގައި ގާއިމު ކުރެވޭ ބޯހިޔާވަހިކަމުގެ ވަސީލަތްތަކާއި، އެއާޕޯޓާއިއެކު، މުޅި އެ ސަރަޙައްދަށްވެސް އިޤްތިޞާދީ ބޮޑެތި ކުރިއެރުންތައް ލިބޭނެކަމަށް ސަރުކާރުން ހާމަކުރެ އެވެ.