ފޯޅަވަހީގެ ރަށްތަކަށް ނުވަތަ ޗާގޯސްއަށް ދައުވާކުރުމުގެ ހައްގު އެންމެ ބޮޑީ ދިވެހިރާާއްޖެއަށް ކަމަށް އިނގިރޭސިވިލާތުގެ ރިފޯމް ޕާޓީގެ ލީޑަރު ނައިޖަލް ފަރާޖް ވިދާޅުވެއްޖެ އެވެ.

އޭނާ މިހެން ވިދާޅުވީ އިނގިރޭސިވިލާތުގެ ގާނޫނު ހަދާ މަޖިލީހުގައި ވާހަކަދައްކަވަމުންނެވެ. ޗާގޯސް މައްސަލާގައި ވަރަށް ތަފްސީލުކޮށް ދެއްކެވި ވާހަކަގައި ނައިޖަލް ވިދާޅުވި ގޮތުގައި ޗާގޯސްއަށް ދައުވާކުރުމުގެ ހައްގު ރާއްޖެއަށް އޮތް ކަމުގެ ސާފު ހެކި ފެނެ އެވެ. އަދި ތާރީހީ ގޮތުންނާއި އަދި ޖިއޮގްރަފީގެ ގޮތުން ބެލި ނަމަވެސް އެ ހައްގު އެންމެ ބޮޑީ ދިވެހީންނަށް ކަމަށް ވިދާޅުވި އެވެ.

ޗާގޯސް މައްސަލާގައި ރާއްޖެއިން ސާފު ސްޓޭންޑެއް ގެންގުޅޭކަން ފާހަގަ ކުރައްވާ އޭނާ ވަނީ ބައިނަލްއަގުވާމީ ކޯޓުގައި އެ ދައުވާ އުފުލަން ރާއްޖެއިން ތައްޔާރުވަމުންދާ ކަމަށް ވިދާޅުވެފަ އެވެ. އަދި ވިދާޅުވީ އެ ދައުވާ ކުރުމުގެ ހައްގު ދިވެހިރާއްޖެއަށް ފުރިހަމައަށް އެބައޮތް ކަމަށެވެ.

އޭގެ ބަދަލުގައި އެ ހައްގު އެންމެ ބޮޑީ މޮރިޝަސްއަށް ކަމަށް ބުނުމަކީ ހަމަޖެހޭ އަދި ގަބޫލުކުރެވޭނެ ކަމެއް ނޫން ކަމަށް ވިދާޅުވި އެވެ.

ފޯމް ޕާޓީގެ ލީޑަރުގެ ވާހަކަގައި ޗާގޯސްގެ މައްސަލާގައި މޮރިޝަސްއަށް ދައުވާ ކުރެވޭނެ އެއްވެސް އަސާސެއް ނެތް ކަމުގައި ވިދާޅުވި އެެވެ. އެގޮތުން ތާރީހީ ގޮތުން ބެލިނަމަވެސް އަދި ޖިއޮގްރަފީވެސް މޮރިޝަސްއަށް އެ ދައުވާ ކުރެވޭނެ ހަމައެއް ނެތް ކަމުގައި ވިދާޅުވި އެވެ.

ޗާގޯސްއާ ރާއްޖެއާ އޮތީ ތާރީހީ ގޮތުންވެސް ގުޅިފައި ކަމަށާ ފަރަންސޭސިންގެ ބާރުގެ ދަށަށް އެ ރަށްތައް ގެންދިއުމަށް ފަހު ދިވެހި ބަހުން ދީފައިވާ ނަންތައް ބަދަލުކޮށްފައިވާކަން ފެންނަން އޮތް ކަމުގައިވެސް ވިދާޅުވި އެވެ. އެފަދަ އެއްވެސް ހެއްކެއް މޮރިޝަސްއާ ގުޅޭގޮތުން ނެތް ކަމުގައި ވިދާޅުވި އެވެ.

ޗާގޯސްގެ މިނިވަންކަން މޮރިޝަސްއަށް ދިނުމަށް އިނގިރޭސިވިލާތުން ކުރީން ނިންމި އެވެ. ނަމަވެސް އެކަން ފަހުން އޮތީ މަޑުޖެހިފަ އެވެ.

ޗާގޯސްގެ ރަށްތަކުގެ ސިޔާދަތުގެ މައްޗަށް ދައުވާކުރުމުގެ ހައްގު އަލުން ހޯއްދަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި އެވެ. އެ މަސައްކަތް ސަރުކާރުން ދަނީ ކުރަމުން ކަމުގައި އެމަނިކުފާނު ވަނީ ވިދާޅުވެފަ އެވެ.