އިނގިރޭސި ޕްރިމިއާ ލީގްގައި ރޭ ވޮލްވްސް އަތުން ބަލިވެ ތާވަލްގެ ތިންވަނާގައި އޮވެ، ފަރަގު ބޮޑުކުރުމަށް ލިބުނު ފުރުސަތު އެސްޓަން ވިލާއިން ނަގާލައިފިއެވެ.

ވޮލްވްސް އާ ކުޅުނު މިމެޗުން އެސްޓަން ވިލާ ބަލިވީ 0-2 ގެ ނަތީޖާއަކުންނެވެ. ވޮލްވްސްގެ ދަނޑުގައި ކުޅުނު މިމެޗްގައި ފެނިގެންދިޔަ ދެ ލަނޑުވެސް ޖަހާފައިވަނީ ފަހުހާފްގައެވެ. ފުރަތަމަ ލަނޑު 61 ވަނަ މިނެޓް ތެރޭގައި އާމްސްޓްރޯންގް ތަނަވަސްކޮށްދިން ފުރުސަތެއްގައި ގޮމޭޒް ކާމިޔާބުކޮށްދިން އިރު، ދެވަނަ ލަނޑު ޖަހައިދިނީ، މެޗްގެ އިތުރު ވަގުތުގެ ކުޅުމުގެ ތެރޭގައި ރޮޑްރިގޯ ގޯމޭޒް އެވެ.

މިމެޗުން އެސްޓަން ވިލާ ބަލިވިނަމަވެސް މޮޅަށް ކުޅެ ގިނަ ހަމަލާތައް އުފައްދާފައިވަނީ އެސްޓަން ވިލާއިންނެވެ. އެގޮތުން އެޓީމުން ވަނީ ވޮލްވްސްގެ ކޮޅަށް ނުރައްކާތެރި 5 ހަމަލާއެއްވަރު ފޮނުވާލާފައެވެ. މިމެޗްގައި ޖުމްލަ 6 ރީނދޫ ކާޑު ވަނީ ފެނިގެން ގޮސްފައެވެ.

މެޗުން އެސްޓަންވިލާ އަށް ތިން ޕޮއިންޓް ގެއްލުމާއެކު، މެންޗެސްޓަރ ޔުނައިޓެޑާ ދެމެދުވާ ފަރަގް ވަނީ ތިން ޕޮއިންޓަށް ކުޑަވެފައެވެ.

ޕްރިމިއާ ލީގް ޕޮއިންޓް ތާވަލް... މައުލޫމާތު: ލައިވްސްކޯ

އިނގިރޭސި ޕްރިމިއާ ލީގްގައި މިއަދު ހަވީރާ މިރޭވެސް ފޯރިގަދަ މެޗްތަކެއް ކުޅެވިގެންދާނެއެވެ. މީގެ ތެރޭގައި ލިވަޕޫލް އަދި މެންޗެސްޓަރ ސިޓީ ކުޅޭ މެޗްތައް ފާހަގަކޮށްލެވެއެވެ. މިރޭގެ މެޗޔުން ސިޓީ ބަލިވެއްޖެނަމަ ލީގް ހޯދުމަށް ކުރަމުންގެންދާ މަސައްކަތްތަކުގައި އިތުރު ގޮންޖެހުންތަކާ ކުރިމަތިލާން ޖެހޭނެއެވެ. 

މީގެ އިތުރުން ލިވަޕޫލް މިރޭ އަމިއްލަ ދަނޑުގައި ވެސްޓްހޭމާ ދެކޮޅަށް ނިކުންނަ މެޗަކީވެސް ލިވަޕޫލަށް ވަރަށް މުހިންމު މެޗެކެވެ. ލިވަޕޫލްގެ މިހާރު ޓާގެޓަކީ ގަދަ ހަތަރެއްގައި އޮވެ ލީގް ނިންމާލުމެވެ. އެޓީމް މިހާރު އޮތީ ތާވަލްގެ ހަވަނާގައެވެ.