މެދުއިރުމަތީގައި ހިނގަމުންދާ ހަމަނުޖެހުންތައް އިތުރަށް ވަރުގަދަވެ، މަސްރަޙް ގޯސްވަމުންދާތީ އެ ސަރަހައްދުގެ އެކި ގައުމުތަކުގައި ތަޢުލީމު ހާސިލުކުރަމުންދާ ދިވެހި ދަރިވަރުންގެ ރައްކާތެރިކަމާއި ހާލަތު ސަރުކާރުން ވަރަށް ގާތުން ބަލަމުންދާކަމަށް މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓުން ހާމަކޮށްފިއެވެ.

އެ މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން އެ ސަރަހައްދުގައި ތިބި ދިވެހި ކިޔަވާކުދިންގެ ސަލާމަތާއި ރައްކާތެރިކަމާމެދު ދިވެހި ސަރުކާރުން ނުހަނު ކަންބޮޑުވާ ކަމަށެވެ.

އަދި ބޭރު ގައުމުތަކުގައި ތިބި ދިވެހި ދަރިވަރުންގެ ރައްކާތެރިކަމާއި ހެޔޮހާލުގައި ތިބުން ކަށަވަރުކުރުމަށްޓަކައި އަޅަންޖެހޭ ހުރިހާ ފިޔަވަޅެއް ސަރުކާރުން އަޅަމުންދާނެ ކަމުގެ ޔަގީންކަން އެ މިނިސްޓްރީން ވަނީ ދީފައެވެ.

މިނިސްޓްރީން އިތުރަށް ބުނެފައިވަނީ، ދަރިވަރުންނަށް ބޭނުންވާ އެހީތެރިކަމާއި އެއްބާރުލުން ފޯރުކޮށްދިނުމަށްޓަކައި، ކަމާބެހޭ އިދާރާތަކާއި، ރާއްޖޭގެ ޑިޕްލޮމެޓިކް މިޝަންތަކާއި އަދި ދަރިވަރުން ކިޔަވަމުންދާ ތަޢުލީމީ މުއައްސަސާތަކާ ގުޅިގެން މެދުކެނޑުމެއްެއް ނެތި މުއާމަލާތް ކުރަމުންދާ ކަމަށެވެ.

"ދަރިވަރުންގެ ސަލާމަތާއި ރައްކާތެރިކަމަކީ މި މިނިސްޓްރީން އެންމެ އިސްކަންދޭ ކަންތައް. މި ދަތި ދަނޑިވަޅުގައި ދަރިވަރުންގެ ހާލަތު ބަލައި، އެކުދިންގެ ރައްކާތެރިކަން ކަށަވަރުކުރުމަށްޓަކައި ކުރަންޖެހޭ އެންމެހާ ކަންކަން ކުރުމަށް މިނިސްޓްރީ އޮތީ ތައްޔާރަށް،" މިނިސްޓްރީން ބުނެފައިވެއެވެ. 

މެދުއިރުމަތީގެ މަޝްރަހު ގޯސްވެފައިވަނީ އެމެރިކާ އަދި އިސްރާއީލުން އިސްވެ އީރާނަށް ވައިގެ މަގުންނާއި ކަނޑުމަގުން ހަމަލާތައް ދިނުމުންނެވެ. ރައްދުގައި އީރާނުން ވަނީ ގަލްފުގެ ޤައުމުތަކުގައި ހުރި އެމެރިކާގެ ބޭސްތަކަށް މިސައިލުން ހަމަލާތައްދީފައެވެ. މީގެ ތެރޭގައި ޤަތަރު، ބަހްރެއިން، ސައުދީ އަދި ޔޫއޭއީ ހިމެނެއެވެ.