އިރާނުގެ ރޫހާނީ ލީޑަރު އާޔަތުالله ޢަލީ ޚާމަނާއި އަވަހާރަކޮށްލުމާ ގުޅިގެން ޕާކިސްތާނުގެ ކަރާޗީގައި ހުންނަ އެމެރިކާގެ ކޮންސިއުލޭޓް ކައިރީގައި މިއަދު ހެނދުނު ހިނގި ކުރިމަތިލުންތަކެއްގައި މަދުވެގެން ނުވަ މީހުން މަރުވެ، ގިނަ ބަޔަކު ޒަޚަމްވެއްޖެއެވެ.

މި ހަމަނުޖެހުންތައް ހިނގާފައިވަނީ ޚާމަނާއީ އަވަހާރަކޮށްލުމާ ގުޅިގެން، އެކަމާ ދެކޮޅަށް އަޑުއުފުލުމަށް އެއްވި މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދުގައެވެ.

އެގޮތުން އާދީއްތަ ދުވަހުގެ ހެނދުނުގެ ވަގުތެއްގައި ކަރާޗީގެ މައި ކޮލާޗީ ރޯޑުގައި ހުންނަ އެމެރިކާގެ ކޮންސިއުލޭޓަށް ވަދެގަންނަން މަސައްކަތްކުރި މުޒާހަރާގެ ބައިވެރިން ރޫޅާލުމަށް ސަލާމަތީ ބާރުތަކުން ވަނީ ބަޑިޖަހާފައެވެ.

ކަރާޗީ ސިވިލް ހޮސްޕިޓަލުގެ ޕޮލީސް ސާޖަން ޑޮކްޓަރު ސުމައްޔާ ސައިދު "އަލްޖަޒީރާ" އަށް މައުލޫމާތު ދެއްވަމުން ވިދާޅުވީ، މި ހަމަނުޖެހުންތަކުގައި މަރުވި ނުވަ މީހެއްގެ ހަށިގަނޑު މިހާތަނަށް ހޮސްޕިޓަލަށް ގެނެސްފައިވާ ކަމަށެވެ. މީސްމީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، މުޒާހަރާގެ ބައިވެރިން ވަނީ ކޮންސިއުލޭޓް އިމާރާތަށް ވަދެގަތުމަށް ވަރަށް ބޮޑަށް މަސައްކަތް ކޮށްފައެވެ.

ކަރާޗީގެ އިތުރުން ޕާކިސްތާނުގެ އެހެން ސިޓީތަކުގައިވެސް ވަނީ ވަރުގަދަ މުޒާހަރާތަކެއް ބާއްވާފައެވެ. އެގޮތުން ޕާކިސްތާނުގެ އުތުރުގައި އޮންނަ ސްކަރުދޫ ސަރަހައްދުގައި ހުންނަ އދ. ގެ އޮފީހެއްގައި މުޒާހަރާގެ ބައިވެރިން ވަނީ ރޯކޮށްލާފައެވެ. ނަމަވެސް އެ ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް ލިބިފައެއް ނުވެއެވެ.

ލާހޯރުގައި ހުންނަ އެމެރިކާގެ ކޮންސިއުލޭޓް ކައިރިއަށްވެސް އެތައް ސަތޭކަ ބަޔަކު އެއްވެ އިހުތިޖާޖު ކުރިއެވެ. އެތަނުގެ ސަލާމަތީ ގޭޓަށް ބައެއް މީހުން ގެއްލުން ދޭން މަސައްކަތް ކުރި ނަމަވެސް، ފުލުހުން ވަނީ ބާރުގެ ބޭނުން ނުކޮށް އެމީހުން ހުއްޓުވާފައެވެ. މީގެ އިތުރުން ޕާކިސްތާނުގެ ވެރިރަށް އިސްލާމްއާބާދުގައި ހުންނަ އެމެރިކާ އެމްބަސީ ކައިރީގައިވެސް މިއަދު ހަވީރު ބޮޑު މުޒާހަރާއެއް ބޭއްވުމަށް ވަނީ ރޭވިފައެވެ.

އިރާނުގެ ލީޑަރު އަވަހާރަކޮށްލުމާ ގުޅިގެން ދުނިޔޭގެ އެކި ކަންކޮޅުތަކުގައި ދަނީ މުޒާހަރާ ކުރަމުންނެވެ. އޭގެ ތެރޭގައި އިރާގު، މޮރޮކޯ އަދި އިންޑިއާއިން ކޮންޓްރޯލްކުރާ ކަޝްމީރު ހިމެނެއެވެ. އިރާގުގެ ބަޣުދާދުގައި ހުންނަ އެމެރިކާ އެމްބަސީ ކައިރިއަށްވެސް ގިނަ އަދަދެއްގެ ބަޔަކު އެއްވެ ދަނީ ނުރުހުން ފާޅުކުރަމުންނެވެ.