މެދުއިރުމަތީގެ ވައިގެ ބޮޑު ސަރަހައްދެއް ބަންދުކުރުމާއި ގުޅިގެން އިއްޔެއާ މިއަދު ގިނަ ފްލައިޓްތަކެއް ކެންސަލްވެ އެތައް ހާސް ބަޔަކަށް ނުފުރި ތާށިވެއްޖެ އެވެ.

މިހާލަތަށް އައީ އެމެރިކާއާ އިޒްރޭލުން އީރާނަށް ހަމަލާދީ ވަރުގަދަ ހަނގުރާމައެއް ފެށުމާއި ގުޅިގެންނެވެ. ހާއްސަކޮށް އެމެރިކާގެ ހަމަލާތަކުގައި އިރާންގެ އެންމެ އިސް ލީޑަރު ހިމެނޭހެން އެތައް ލީޑަރުންނެއް އަދި އާންމުންގެ އެތައް ބަޔަކު ޝަހީދުކޮށްލުމާއި ގުޅިގެންނެވެ.

އެއާއެކު ރައްދުގައި އީރާނުން ވަނީ އެމެރިކާގެ ބޭސްތަކަށް ވަރުގަދަ ހަމަލާތަކެއްދީފަ އެވެ. އަދި މެދުއިރުމަތީގެ ގިނަ ގައުމުތަކަކުން ވަނީ އެއާޕޯޓްތަކުގެ އޮޕަރޭޝަންތައް ހުއްޓާލާފަ އެވެ. އެއާއެކު ވައިގެ ދަތުރުފަތުރަށް ބޮޑު ހުއްޓުމެއް އައެވެ.

އެކަމާއި ގުޅިގެން ދިވެހީންގެ މައި ވައިގެ ބަނދަރު ހިންގާ އެމްއޭސީއެލްއިން ދަނީ ގިނަ ފިޔަވަޅުތަކެއް އަޅަމުންނެވެ. އެ ކުންފުނިން ބުނީ މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ބަންދުކުރުމުގެ ސަބަބުން ފަސިންޖަރުންނަށް ދިމާވެފައިވާ ދަތިތަކަށް ހައްލު ހޯދައިދިނުމުގެ ގޮތުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އަންނަނީ ގިނަ މަސައްކަތްތަކެއް ކުރަމުން ކަމަށެވެ.

އެގޮތުން 28 މާރިޗު ގައި ވެލާނާ އިންޓަރނޭޝަނަލް އެއާޕޯޓުގައި ޑިސްރަޕްޝަން މެނޭޖްމެންޓް ސެންޓަރެއް ގާއިމްކޮށް ހިދުމަތް ފޯރުކޮށްދިނުމުގެ މަސައްކަތް ވަނީ ފަށާފަ އެވެ. މި މަސައްކަތުގެ ތެރެއިން ފަސިންޖަރުންނަށް ލުއިފަސޭހަ އިންތިޒާމުތައް ހަމަޖައްސައިދިނުމަށްޓަކައި ޑޮމެސްޓިކް ޓާމިނަލް މިހާރު އަންނަނީ ބޭނުން ކުރަމުންނެވެ. މި މަސައްކަތުގައި ކަމާގުޅުންހުރި ފަރާތްތަކުގެ އެހީތެރިކަމާއެކު، ރޭގެ ނިޔަލަށް 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށް ދީފައިވާ ކަމަށްވެސް ބުންޏެވެ.

އެމްއޭސީއެލުން ބުނީ އިއްޔެ 9 ފްލައިޓެއް ކެންސަލްވެ، 1,716 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވާ ކަމަށެވެ. އަދި މިއަދު 19 ފްލައިޓެއް ކެންސަލްވެ، 3,530 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވާ ކަމަށެވެ.

މި ހާލަތުން އަރައިގަތުމަށްޓަކައި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓާއި، ވިޒިޓް މޯލްޑިވްސް އާއި އެއާލައިންތަކުގެ އިތުރުން ޓުއާ އޮޕަރޭޓަރުންނާއި ގުޅިގެން، ފަސިންޖަރުންނަށް ދިމާވާ އެކިއެކި ދަތިތައް ހައްލުކުރުމުގެ މަސައްކަތް އެމްއޭސީއެލްއިން އަންނަނީ ކުރަމުން ކަމަށް ބުންޏެވެ.

ކެންސަލްވެފައިވާ ފްލައިޓުތަކުގެ އެއާލައިންތަކަށް ހާއްސަ ސާވިސް ކައުންޓަރުތައް ޑޮމެސްޓިކް ޓާމިނަލްގައި ގާއިމުކޮށްފައިވާ ކަން ވެސް އެމްއޭސީއެލުން ފާހަގަ ކުރެ އެވެ. އަދި ފަސިންޖަރުންނަށް އެކިއެކި އިންތިޒާމްތައް ހަމަޖައްސައިދިނުމުގައި އެ އާލައިންތަކުގެ މަންދޫބުން ހަރަކާތްތެރިވަމުން އަންނަ ކަމަށް ބުންޏެވެ.

ކުރިމަތިވެފައިވާ ހާލަތާއި ގުޅިގެން، ވެލާނާ އިންޓާނޭޝަނަލް އެއާޕޯޓުގެ އޮޕަރޭޝަންނަށް އެއްވެސް ބަދަލެއް އައިސްފައިނުވާ ކަމަށްވެް އެ ކުންފުނިން ބުންޏެވެ.