ދުރު ރާސްތާ އަމާޒަކީ އިސްލާމީ ގައުމުތަކުގެ ތެރެއިން އާބާދީގެ ނިސްބަތުން ޙާފިޡުންގެ ޢަދަދު އެންމެ ގިނަ ޤައުމަށް ދިވެހިރާއްޖެ ހެދުންކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެ އެވެ.

ވަޒީރު މިހެން ވިދާޅުވީ، މިރޭ އޮތް ޙާފިޡުންގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ، މިއީ ދިވެހިރާއްޖޭގެ ތާރީޚުގައި އެންމެ ގިނަ ޢަދަދަކަށް ޙާފިޡުން ދަސްވެނިވި އަހަރު ކަމަށެވެ. މި އަހަރު 31 ހާފިޒުން ދަސްވެނިވި އެވެ. ރާއްޖޭގައި ޙާފިޡުންގެ އަދަދު މިހާރު 301 އަށް ވަނީ އަރާފަ އެވެ.

މިރޭ އޮތް ޙާފިޡުންގެ ދަސްވެނިވުމުގެ ރަސްމިއްޔާތު -- ފޮޓޯ: އިސްލާމިކް މިނިސްޓްރީ

އަދި ވިދާޅުވީ އަމާޒަކީ މި ފަސް އަހަރުގެ ތެރޭގައި ޙާފިޡުންގެ އަދަދު 500 އާއި ހަމައަށް ގެންދިއުމަށް މަސައްކަތް ކުރުން ކަމަށެވެ. ވުޒާރާގެ ދުރު ރާސްތާ އަމާޒަކީ އިސްލާމީ ޤައުމުތަކުގެ ތެރެއިން އާބާދީގެ ނިސްބަތުން ޙާފިޡުންގެ ޢަދަދު އެންމެ ގިނަ ޤައުމަށް ދިވެހިރާއްޖެ ހެދުންކަމަށް ވަޒީރުގެ ވާހަކަފުޅުގައި ވިދާޅުވި އެވެ.

ވަޒީރުގެ ވާހަކަފުޅުގައި ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ކީރިތި ޤުރުއާނުގެ ޢިލްމު ފެތުރުއްވުމަށް ޚާއްސަ ސަމާލުކަމެއް ދެއްވާ ކުރައްވަމުން ގެންދަވާ މަސައްކަތްޕުޅު ފާހަގަކުރައްވާފައިވެ އެވެ.

މިރޭ އޮތް ޙާފިޡުންގެ ދަސްވެނިވުމުގެ ރަސްމިއްޔާތު -- ފޮޓޯ: އިސްލާމިކް މިނިސްޓްރީ

"ފާއިތުވެދިޔަ ދެ އަހަރުގެ ތެރޭގައި ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ކީރިތި ޤުރުއާނުގެ ޢިލްމު ފެތުރުއްވުމުގެ ދާއިރާއަށް ވަރަށް މުހިއްމު އިސްކަމެއް ދެއްވި. ކީރިތި ޤުރުއާން ކިޔެވުމުގެ ޤައުމީ މުބާރާތުގެ އިނާމުތައް މަތިކުރެއްވި. ޙާފިޡުންގެ އެލަވަންސް ދެގުނައަށް ބޮޑުކުރެއްވި. 2025 ވަނަ އަހަރު ކީރިތި ޤުރުއާނުގެ ޢިލްމު ފެތުރުއްވުމަށް 19 މިލިއަނަށްވުރެ ގިނަ ރުފިޔާ ވަނީ ޚަރަދު ކުރެވިފައި," ވަޒީރު ވިދާޅުވި އެވެ.

މިރޭ އޮތް ޙާފިޡުންގެ ދަސްވެނިވުމުގެ ރަސްމިއްޔާތު -- ފޮޓޯ: އިސްލާމިކް މިނިސްޓްރީ

ވަޒީރު ވިދާޅުވީ، ކީރިތި ޤުރުއާނަށް ޚިދުމަތް ކުރުމާއި، ކީރިތި ޤުރުއާން ހިތުދަސް ކުރުމުގެ ކަންތައްތައް މުޅި ރާއްޖެއަށް ފެތުރުމުގައި ދިވެހިރާއްޖެ ދެކެމުން މިދަނީ ވަރަށް ހެޔޮ ދުވަސްތަކެއް ކަމަށެވެ.

މީގެ އިތުރުން، ރާއްޖޭގެ މީހުން ދިރިއުޅޭ ކޮންމެ ރަށެއްގައި ކީރިތި ޤުރުއާނާއި ބެހޭ ޤައުމީ މަރުކަޒުގެ ގޮތްޕެއް ހެދުމަކީ ސަރުކާރުގެ އަމާޒެއްކަމަށާއި މިގޮތުން 2026 ވަނަ އަހަރުގައި 50 ގޮފި އުފެއްދުމަށް މަސައްކަތް ކުރެވެމުންދާކަން ވަޒީރު ފާހަގަކުރެއްވި އެވެ. މީގެ ތެރެއިން 6 ގޮފި ރަޖިސްޓްރީކުރެވިފައިވާއިރު، 34 ގޮފި ރަޖިސްޓްރީ ކުރުމުގެ މަސައްކަތް ދަނީ ކުރަމުންދާކަމަށް ވަޒީރު ވިދާޅުވި އެވެ.

މިރޭ އޮތް ޙާފިޡުންގެ ދަސްވެނިވުމުގެ ރަސްމިއްޔާތު -- ފޮޓޯ: އިސްލާމިކް މިނިސްޓްރީ

ވަޒީރުގެ ވާހަކަފުޅުގައި، ކުރިއަށް އޮތް ޖީލުތަކަށް އިސްލާމީ ރިސާލަތު ވާޞިލްކޮށްދިނުމަށްޓަކައި އަދުގެ ޒުވާން ޖީލު ޙާފިޡުންގެ ގޮތުގައި އަދި އިމާމުންގެ ގޮތުގައި، ތެދުވަން ޖެހޭކަމަށް ވިދާޅުވެ ޒުވާނުންނަށް އެކަމަށް އިލްތިމާސް ކުރެއްވި އެވެ. އަދި އުއްމަތް ބިނާކުރުމުގައި އަދި ޤައުމު ބިނާކުރުމުގައި އަދި އަޅުގަނޑުމެންގެ ޤައުމު ތާއަބަދަށް އިސްލާމީ ޤައުމެއްގެ ގޮތުގައި ދެމެހެއްޓުމަށްޓަކައި އަޅުގަނޑުމެން މިފަދަ ޙާފިޡުން ބިނާ ކުރަން ޖެހޭކަން ވަޒީރު ފާހަގަކުރެއްވި އެވެ.