ރާއްޖޭގެ ކުރީގެ ރައީސް މުހައްމަދު ވަހީދު، ރައީސް މުހައްމަދު މުއިއްޒުގެ ސްޕެޝަލް އެންވޯއީގެ މަގާމުން އިސްތިފާދެއްވުމަށް އެންގެވި ކަމަށް ރައީސް މުއިއްޒު މިއަދު ވިދާޅުވެއްޖެ އެވެ.
ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކަށް ބްލެކްމެއިލްކުރި ޖެފްރީ އެޕްސްޓީންއާ، ރައީސް ވަހީދު މުޢަމާލާތްކޮށް ގުޅުން ބާއްވާފައިވާކަން ހާމަވެފައިވަނިކޮށް އެމަނިކުފާނު ވަނީ މަގާމުން އިސްތިއުފާ ދެއްވާފައެވެ.
އެމަނިކުފާނު އިސްތިއުފާ ދެއްވީ، އެޕްސްޓީންއާ ގުޅުން އޮތްކަން ހާމަވާ ލިޔުންތައް ލީކުވިތާ އެއްދުވަސް ފަހުން މިދިޔަ ފެބްރުއަރީ މަހުގެ 3 ވަނަ ދުވަހުއެވެ.
އެކަމާ ގުޅިގެން، މިއަދުގެ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ރައީސް ވަހީދުއަށް އެއްވެސް ފިޔަވަޅެއް ނޭޅުއްވީ ކީއްވެތޯ ސުވާލު ކޮށްފައެވެ.
"އަޅުގަނޑަށް ތިކަން އެނގުނު ހިސާބުން އަޅުގަނޑު ވަހީދަށް ދެންނެވީ އިސްތިއުފާ ދިނުމަށް. އެހެންވެ އިސްތިއުފާ ދެއްވީ،" ރައީސް ވިދާޅުވި އެވެ.
އެޕްސްޓީންއާ ގުޅުން ބޭއްވިކަން ހާމަވުމާގުޅިގެން ރައީސް ވަހީދުގެ އޮފީހުން ނެރުނު ބަޔާނެއްގައި ބުނީ، އެޕްސްޓީންއާ އެކު އޮތީ ރަސްމީ ގުޅުމެއް ކަމަށާ އޭނާ ހިންގި އެއްވެސް މުޑުދާރު އަމަލެއްގައި ބައިވެރިވެފައިނުވާނެ ކަމަށެވެ. އަދި އެފަދަ ކަމެއް އެމަނިކުފާނާއި އެމަނިކުފާނުގެ އާއިލާ އެއްވެސް މެންބަރަކު ކުރައްވާފައިނުވާނެ ކަމަށެވެ.
އަދި އޭނާގެ ހަގީގަތް ހާމަވުމުން އެފަދަ ގުޅުމެއް އަދި މުއާމަލާތެއް ކުރެވިފައިވާތީ ހިތާމަ ކުރައްވާ ކަަމަށް ވިދާޅުވި އެވެ.
ރައީސް ވަހީދު ވަނީ އެޕްސްޓީން ބޭއްވި އެއްވެސް ޕާޓީއެއްގައި ނުވަތަ ހަރަކާތެއްގައި އެމަނިކުފާނާއި އާއިލާގެ މެންބަރަކު ބައިވެރިވެފައިނުވާނެ ކަމަށާ ރަސްމީ ހައިސިއްޔަތުން ބައްދަލު ކުރެއްވީ ދެ ފަހަރު ކަމުގައި ވިދާޅުވެފަ އެވެ.
2008 ވަނަ އަހަރު އެޕްސްޓީންގެ މައްޗަށް ޖަލު ހުކުމެއް އައި ކަމެއް އަދި އޭނާގެ މައްޗަށް އޮތް ތުހުމަތާއި ގުޅޭ އެއްވެސް މައުލޫމާތެއް ކުރީން ލިބިވަޑައިގެންފައި ނެތް ކަމަށާ އެެފަދަ އެއްވެސް މައުލޫމާތެއް ރައީސް ވަހީދަށް ލިބިވަޑައިގެންފައިވީނަމަ އެެއްވެސް މިންވަރަކަށް އެފަދަ މީހަކާއި އެއްވެސް ގުޅުމެއް އަދި މުއާމަލާތެއް ނުބޭއްވީސް ކަމުގައި ވެސް ބަޔާނުގައި ފާހަގަކޮށްފައިވެ އެވެ.
އެޕްސްޓީންގެ މައްޗަށް ކުރެވޭ ތުހުމަތާއި އޭނާ ހިންގާފައިވާ މުޑުދާރު އަމަލުތަކަކީ އެކަންކަމާއި އެންމެންވެސް ދެކޮޅު އަދި ދެކޮޅު ހަދަން ޖެހޭނެ ކަންކަމުގައި ރައީސް ވަހީދުގެ އޮފީހުން ނެރުނު ބަޔާނުގައިވެ އެވެ.
Advertisement
This content is created and paid for by advertisers and does not involve Voice Journalists
