މާލޭގެ ގަލޮޅު އަވަށުގައި ހުންނަ މާލެ ހިޔާ އަދި ސިނަމާލެ ފްލެޓްތަކަކީ ގިނަ ދުވަސްވީ އިމާރާތްތަކަކަށް ވާއިރު، މި ތަންތަނުގެ ހާލަތު މިހާރު ހުރީ އިންސާނުން ދިރިއުޅެން ނުރައްކާތެރި ދަރަޖައެއްގައެވެ. އެތަނުގެ ހާލަތުގެ ވާހަކައަކީ އައު ވާހަކައެއް ނޫނެވެ. އެތަނުގައި ދިރިއުޅޭ މީހުންނާއި އެތަނަށް ޒިޔާރަތްކުރާ މީހުންވެސް ތަނުގެ ބައު ކަމާއި ވީރާނާވެފައިވާ ވާހަކަދައްކާތާ އެތައް އަހަރު ވެއްޖެއެވެ.

އެތަން އެންމެ ފަހުންވެސް މަރާމާތު ކޮށްފައިވަނީ، 1990 ގައެވެ. އެފަހުން 35 އަހަރަށްވުރެ ގިނަ ދުވަސްވެފައިވާއިރު، މަރާމާތެއް ނުކުރެވި ހުރި އެ އިމާރާތްތަކުގެ ސީލިންގ ވެސް ހުރީ ބޮލަށް ވެއްޓޭ ހިސާބުގައެވެ. 

ގިނަ ދުވަސްވެ، ބައު ވެފައިވާ އެ ފްލެޓްތަކުގެ ސީލިންގުންނާއި ފާރުތަކުން ފެން ލީކުވުމުގެ ސަބަބުން ފާރުތަކުން ކުލަ ކެހި، ވަރަށް ބޮޑަށް ފަންގަސް ޖަހާފައިވާއިރު، ބައެއް ފާރުތަކުގައި ވަނީ ފެހި ޖަހާފައެވެ.

މީގެ އިތުރުން، އެޕާޓްމަންޓްތަކުގެ ފާޚާނާތަކުން ކުލަވެރި، ޝަވަރު ފަދަ ތަކެތީގައި ދަބަރު ޖަހައި ވަނީ ހަލާކުވެފައެވެ. ސީލިންގުން ފެން ލީކުވުމުގެ ސަބަބުން ސީލިންގުގެ ތަންތަންކޮޅު ނެއްޓި، ސީލިންގް ވަނީ ވަރަށް ބޮޑަށް ފީވެފައެވެ. ބައެއް ތަންތަނުގެ ޝީޓްތައް ފަޅައިގެން ގޮސް، މީހުންގެ ބޮލަށް ޝީޓްގެ ބައިތައް ވެއްޓެމުންދާކަން ވެސް ފާހަގަކުރެވެއެވެ.

މިދިޔަ ފެބްރުއަރީ މަހުގެ 16 ވަނަ ދުވަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ސިނަމާލެ އަދި މާލޭހިޔާގެ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، އެފަރާތްތަކުގެ ކަންބޮޑުވުންތައް އަޑުއައްސަވާފައެވެ. މި ބައްދަލުކުރެއްވުމުގައި ފްލެޓްތަކުގެ ހާލަތާއި، ދައްކަންޖެހޭ ކުއްޔާއި، ޖޫރިމަނާގެ ކަންކަމުގައި ހުރި ގިނަ ކަންބޮޑުވުންތަކެއް ރައްޔިތުން ހިއްސާކުރިއެވެ.

އެ ކަންބޮޑުވުންތަކަށް ހައްލު ހޯދައި ދެއްވުމަށް ސިނަމާލެ 1، 2، 3 އަދި 4 އާއި، މާލެހިޔާ 1 އަދި 2 ގެ ވެރިފަރާތްތަކަށް ޚާއްޞަ އިނާޔަތެއް ދެއްވުމަށް ނިންމަވާފައިވާ ކަމަށް ރައީސް ވަނީ ވިދާޅުވެފައެވެ. އެގޮތުން ނިންމަވާފައިވާ ކަންކަމަކީ:

ފްލެޓްތަކަށް ފައިސާ ނުދެއްކުމުގެ ސަބަބުން އަރާފައިވާ ޖޫރިމަނާ އެއްކޮށް މާފުކޮށްދިނުން.

ފްލެޓްތައް މަރާމާތުކުރުމަށް އެހީތެރިވުމުގެ ގޮތުން ކޮންމެ ފްލެޓަކަށް 100،000 (އެއްލައްކަ) ރުފިޔާގެ އިނާޔަތެއް ދިނުން.

މި އިނާޔަތް ދިނުމުގައި، ފްލެޓަށް ދައްކަންޖެހޭ ފައިސާ އެއްލައްކަ ރުފިޔާއަށްވުރެ ގިނަނަމަ އެ އަދަދު އުނިކޮށްދެވޭނެއެވެ. އަދި ދައްކަންޖެހޭ ފައިސާ އެއްލައްކަ އަށްވުރެ މަދުނަމަ، ބާކީވާ ބައި ވެރިފަރާތުގެ އެކައުންޓަށް ޖަމާކޮށްދެވޭނެއެވެ. ފައިސާ ދައްކާ ނިންމާފައިވާ ފަރާތްތަކަށް މުޅި އެއްލައްކަ ރުފިޔާ އެކައުންޓަށް ޖަމާކޮށްދެވޭނެއެވެ.

ރައީސް މުޢިއްޒުގެ މި ނިންމެވުމާގުޅިގެން ދެކެވެމުންދާ ބައެއް ވާހަކަތަކަށް ރައްދުދެއްވަމުން އެމަނިކުފާނުގެ ވަނީ 1990 ވަނަ އަހަރުން ފެށިގެން މި ފްލެޓްތައް މަރާމާތު ނުކުރެވި ހުރުމުގެ ސަބަބުން، ތަންތަން ހުރީ މީހުންގެ ބޯމައްޗަށް ވެއްޓޭ ހިސާބުގައި ކަމަށް ފާހަގަކުރައްވާފައެވެ. ކޮލަމްތައް ފަޅައިގެން ގޮސް ބޮޑެތި ރެނދުތައް ލާފައިވާއިރު، މިއީ އިންސާނުން އުޅެންވާ ފަދަ ހާލަތެއް ނޫން ކަމަށްވެސް ރައީސް ވިދާޅުވިއެވެ.

"1990 ގައި އެންމެ ފުރަތަމަ ސިނަމާލެ ފްލެޓްތައް ހުޅުވީ ވެސް. އޭގެ ފަހުން މި ވީހާ ދުވަހެއް މިވީ ސިނަމާލެ އެކެއް ދޭއް ތިނެއް ދެން މާލެ ހިޔާ އެކެއް ދޭއް އަދި ވިލިމާލޭގައި ސިނަމާލެ ހަތަރެއް. މިތަންތަން މަރާމާތެއް ނުކުރެ. މިތަންތަން ހުރީ މީހުންގެ ބޯމައްޗަށް ވެއްޓޭ ހިސާބުގައި. އެހެންވީމަ އަޅުގަނޑު ރިޔާސީ އިންތިހާބުގެ ތެރޭގައި އެ ވައުދުވީ. އެކަން ކުރުމަށް ކައުންސިލް ކެމްޕޭންގެ ބައްދަލުވުމުގައި ވެސް ނޫން އެ ވާހަކަދެއްކީ ވެސް. މި އަހަރު ޖެނުއަރީގައި ކެބިނެޓް ނިންމުން އޮންނާނެ. އޭގެ ކުރިން ވެސް ކެބިނެޓް މަޝްވަރާތަކެއްކޮށް އެ ނިންމުން ތަންފީޒުކުރުމަށް ގިނަ މަސައްކަތްތަކެއްކޮށްފައި ވާނެ. އޭގެ ކުރިން ނުވީ ސިޓީ ކައުންސިލްގެ ތެރެއިން މިދިޔަ އަހަރު އެއްބާރުލުން ނުލިބިގެން." ރައީސް ވިދާޅުވިއެވެ.

"އަޅުގަނޑު ރިޔާސީ ބަޔާނުގައި ވަައުދުވި ގޮތަށް އާ އިމާރާތެއް އަޅާފައި އެ ފްލެޓަކަށް އެ މީހުން ގެންދެވެންދެން ވެސް އެ މީހުން އުޅެން އެބަޖެހޭ އެތާގައި. އެހެންވީމަ އުޅެވޭނީ މަރާމާތުކޮށްގެން. ސިޓީ ކައުންސިލުން މިިދިޔަ ދެ އަހަރު އެ މަސައްކަތް ކޮށްފައެއް ނުވޭ. އެހެންވީމަ އަޅުގަނޑުމެން ކެނބިނެޓްގައި މަޝްވަރާކޮށްފައި ނިންމީ އެތަންތަން މަރާމާތުކުރުމަށްޓަކައި އެ ތަންތަނުގެ ވެރިންނަށް ސަރުކާރުން އެހީއެއް ދޭނީއޭ. އެއީ އެތަނުގައި އުޅޭ ކަމަށްވާނަމަ މަރާމާތުކުރެވެންޖެހޭ. އެތަން މަރާމާތުކުރުމަށް ކޮންމެ ފްލެޓަކަށް ފައިސާ މި ދެނީ." ރައީސް ވިދާޅުވިއެވެ.

ރައީސް އިތުރަށް ވިދާޅުވީ، އާ އިމާރާތެއް އަޅައި އެ ފްލެޓްތަކުގެ މީހުން ބަދަލުކުރެވެންދެން ވެސް އެތަނުގައި އުޅެވޭނީ މަރާމާތުކޮށްގެން ކަމަށެވެ. ރައްޔިތުންގެ ދިރިއުޅުން ފަސޭހަކޮށްދިނުމަކީ ސަރުކާރުގެ ޒިންމާއެއް ކަމަށާއި، ރައްޔިތުން ބިކަ ހާލުގައި ޖެއްސުމަކީ ސަރުކާރަކުން ކޮށްގެންވާނެ ކަމެއް ނޫން ކަމަށް އެމަނިކުފާނު ވިދާޅުވިއެވެ.