ފުޅާ ދާއިރާއްގައި ދީނީ ދަޢުވަތުގެ މަސައްކަތްކުރާ، ރ. މީދޫގެ ޖަމްޢިއްޔާއެއްކަމުގައި އުއްމީދު ޖަމްޢިއްޔާއިން ބަރަކާތްތެރި ރަމަޟާން މަހާ ދިމާކޮށް މަދަޙަ އަލްބަމެއް ނެރެފިއެވެ.

"ރަޙްމަތް" މި ނަމުގައި މިހާރު ސައުންޑްކްލައުޑް އަދި ޔޫޓިޔުބްގައި ރިލީސްކޮށްފައިވާ މި އަލްބަމްގައި ޖުމްލަ 6 މަދަހައެއް ހިމެނެއެވެ. މި އަލްބަމާ ގުޅޭގޮތުން ވޮއިސްއަށް މައުލޫމާތު ހިއްސާކުރަމުން އުއްމީދު ޖަމިއްޔާއިން ބުނީ މި އަލްބަމުގައި ހިމެނޭ ހުރިހާ މަދަހައަކީވެސް އަމިއްލަ ރާގުގެ މަދަހަތައް ކަމަށެވެ.

މި މަދަހަ އަލްބަމްގެ ޅެންތައް ހައްދަވާދެއްވާފައިވަނީ މަޝްހޫރު ޅެންވެރިޔާ އާދަމް ޙަލީމް އަދުނާނުގެ އިތުރުން ރ. މީދޫގެ ކުޅަދާނަ ޒުވާން ޅެންވެރިއެއްކަމަށްވާ އަޙްޒަމް އިސްމާޢީލް (ޗާލީ) އަދި ފާތިމަތު ނިޢުމާ އެވެ. މި އަލްބަމްގެ އެންމެ ޚާއްސަކަމަކީ މި އަލްބަމްގެ ހުރިހާ މަދަޙައެއްވެސް ކިޔާފައިވަނީ ރ. މީދޫގެ ކުޅަދާނަ އާޓިސްޓުންކަމަށްވުމެވެ. އެގޮތުން މި އަލްބަމްގައި ޖައިލަމް ލަތީފް (ޖައިއްޓޭ)، ޙުސައިން ހަނީފް، އަޙްމަދު އިސާމް، އާތިފް ރަޝީދު (އާތީ)، ޢަބްދުﷲ ޝިހާމްގެ މަދަޙަތައް ހިމެނެއެވެ. މި ހުރިހާ މަދަޙައެއްގެ ރެކޯޑިންގވެސް ހަދާފައިވަނީ ރ. މީދޫގައިކަން ފާހަގަކޮށްލެވެއެވެ. މަދަޙަތަކުގެ ރެކޯޑިންގ އުއްމީދު ސްޓޫޑިޔޯގެ އިތުރުން ހަވާސް ސްޓޫޑިޔޯ އަދި ހޭރިޔާ ސްޓޫޑިޔޯގައިވެސް ކުރިއަށް ގެންގޮސްފައިވެއެވެ.

މި އަލްބަމް ތައްޔާރުކުރުމުގައި އެކިގޮތްގޮތުން އުއްމީދަށް އެހީތެރިކަން ދެއްވި ހުރިހާ ފަރާތްތަކަށް އުއްމީދުން ޝުކުރު އަދާކުރެއެވެ. އެގޮތުން ހަވާސް އަދި ހޭރިޔާގެ ފަރާތުން ލިބުނު ފުރިހަމަ އެއްބާރުލުން އުއްމީދު ޖަމިއްޔާއިން ފާހަގަކުރެއެވެ.