ފުޓްބޯޅަ އެސޯސިއޭޝަން އޮފް މޯލްޑިވްސް، އެފްއޭއެމްގެ ތެރެއިން އަނެއްކާވެސް އިތުރު ހިޔާނާތުގެ މައްސަލަތަކެއް ފެންމަތިވެއްޖެއެވެ.

މިފަހަރުގެ ހިޔާނާތް ފެންމަތިވެފައިވަނީ މިއަދު އޮޑިޓަރ ޖެނެރަލް ނެރުއްވި، ފުޓްބޯލް ޓްރެއިނިން ފެސިލިޓީއެއް ގާއިމްކުރުމަށް އެފްއޭއޭއެމަށް ދޫކުރި ބިމުން ބައެއް ކުއްޔަށް ދިނުމުގެ މުއާމަލާތުގެ ތެރެއިންނެވެ. އޮޑިޓަރ ޖެނެރަލް މިއަދު ނެރުއްވި ރިޕޯޓްގައި ބުނެފައިވަނީ، ހުޅުމާލެއިން އެފްއޭއެމަށް ދޫކުރި ބިމުގެ ސްލޮޓްތައް ކުއްޔަށްދީގެން ލިބުނު ފައިސާގެ ތެރެއިން 29.60 މިލިއަން ރުފިޔާ ގެއްލިފައިވާކަމަށް ބެލެވޭކަމަށެވެ.

އެއީ ހުޅުމާލޭގައި ފުޓްބޯލް ޓްރެއިނިން ފެސިލިޓީއެއް ގާއިްމްކުރުމަށްޓަކައި ސަރުކާރުން އެޗްޑިސީ މެދުވެރިކޮށް އެފްއޭއެމަށް ދޫކުރި ބިމުގެ 12 ބްލޮކް ވިޔަފާރީގެ ބޭނުންތަކަށް ދިނުމުގެ މުއާމަލާތުގެ ތެރެއިންނެވެ. އޮޑިޓް ރިޕޯޓްގައި ބުނީ 2021 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ހަދާފައިވާ 13 ސަބްލީސް އެއްބަސްވުމާއި އެ ބިމުގައި އަޅާފައިވާ އެކޮމަޑޭޝަން ބްލޮކްގެ ތިން ފްލޯ ކުއްޔަށް ދޫކުރުމަށް ހެދި އެއްބަސްވުންތަކުން ބިމު ކުލީގެ ގޮތުގައި 2025 ވަނަ އަހަރުގެ ނިޔަލަށް އެފްއޭއެމަށް 56.2 މިލިއަން ރުފިޔާ ލިބެންޖެހޭ ކަމަށެވެ. މީގެ ތެރެއިން 52.2 މިލިއަން ރުފިޔާ އެފްއޭއެމަށް ބަލައިގަނެފައިވާކަމަށް އެ އިދާރާގެ ރެކޯޑްތަކުން ދައްކައެވެ.

އޮޑިޓަރ ޖެނެރަލްގެ ރިޕޯޓްގައި ބުނެފައިވަނީ 52.2 މިލިއަން ރުފިޔާގެ ތެރެއިން 29.59 މިލިއަން ރުފިޔާ އެފްއޭއެމްގެ އެއްވެސް ކަމަކަށް ބޭނުން ނުކުރެވި ގެއްލިފައިވާކަމަށް ފާހަގަކުރެވޭ ކަމަށެވެ. ގެއްލުނު ފައިސާގެ ތެރޭގައި ހިމެނެނީ ބިމުގެ ސްލޮޓްތަކާއި އިމާރާތުގެ ފްލޯތަކުން ކުއްޔަށްނެގި 5 ފަރާތަކުން ބަލައިގަތްކަމަށް ބުނެ ހުށަހަޅާފައިވާ އެފްއޭއެމްގެ ބައެއް އިސްފަރާތްތަކުން ބަލައިގަތްކަމަށް ބުނެ ހުށަހަޅާފައިވާ އެފްއޭއެމްގެ ސްޓޭމްޕް އަދި އިސްފަރާތްތަކުގެ ސޮއި ހިމެނޭ ރަޝީދުތަކާއި ޕޭމަންޓް ވައުޗަރުތަކުގެ ޖުމްލަ 14.1 މިލިއަން ރުފިޔާ އާއި އެފްއޭއެމްގެ ބޭންކު އެކައުންޓްތަކަށް އެ ސްލޮޓްތަކުގެ ކުލީގެ ގޮތުގައި ޖަމާކޮށްފައިވާ ފައިސާގެ ތެރެއިން އަމިއްލަ ކުންފުނިތަކާއި އަމިއްލަ ފަރާތްތަކުގެ އެކައުންޓަށް ފޮނުވާފައިވާ 14.01 މިލިއަން ރުފިޔާއެވެ. 

މީގެ އިތުރުން އެފްއޭއެމްގެ އެކައުންޓްތަކަށް ޖަމާކޮށްފައިވާ ފައިސާގެ ތެރެއިން އެކި ފަހަރު މަތިން ނަގުދު ފައިސާގެ ގޮތުގައި ނަގާފައިވާ ޖުމްލަ 1.4 މިލިއަން ރުފިޔާވެސް ހިމެނެއެވެ.

އޮޑިޓް ރިޕޯތްގައި ބުނެފައިވަނީ ނަގުދު ފައިސާއިންނާއި ޗެކުން އެފްއޭއެމަށް ދިންކަމަށް ބުނެ ހުށަހަޅާފައިވާ ރަޝީދުތަކާއި ޕޭމަންޓް ވައުޗަރުތަކުގައި ހިމެނޭ ޖުމްލަ 14.1 މިލިއަން ރުފިޔާ ގެއްލިފައިވާކަމަށެވެ.

ނަގުދު ފައިސާއިންނާއި ޗެކުން ފައިސާ ލިބުނުކަމަށް ސޮއިކޮށްފައިވާ ފަރާްތްތަކާއި ބަލައިގަތް ފައިސާގެ އަދަދު އަންގައިދޭ ތާވަލް:

މައުލޫމާތު: އޮޑިޓް އޮފީސް

އެފްއޭއެމްގެ މި މައްސަލަ ހިނގާދިޔައިރު އެ އިދާރާގެ ރައީސްކަމުގެ މަޤާމުގައި ހުންނެވީ މިހާރުވެސް ހިޔާނާތުގެ މައްސަލަތައް ޝަރުއީ މަރުހަލާގައި ކުރިއަށްދާ އެ އިދާރާގެ ކުރީގެ ރައީސް ބައްސާމް އަދީލް ޖަލީލުކަން ފާހަގަކޮށްލެވެއެވެ. 

އޮޑިޓް ރިޕޯޓްގައި އިތުރަށް ފާހަގަކޮށްފައިވާ ކަންކަމަށް ބަލާއިރު، މީގެ ތެރެއިން ބައެއް ފައިސާ ވަނީ ބޭރުފައިސާ ވިއްކާ ކުންފުންޏެއްގެ އެކައުންޓަށްވެސް ޖަމާކޮށްފައެވެ. ނަމަވެސް އެ ޖަމާކުރި ފައިސާ ލިބުނުކަން އެނގޭކަށެއް ނެތެވެ. އެ ފައިސާގެ ޖުމްލަ އަދަދުވެސް 8.99 މިލިއަން ރުފިޔާއަށް އަރައެވެ.

ކޯޓުގައި ހިނގަމުންދިޔަ ބައެއް މައްސަލަތައް ބައްސާމުގެ މައްޗަށް ސާބިތުވެފައިވާއިރު، ފީފާއިން އެފްއޭއެމަށް ދިން 1.2 މިލިއަން ޑޮލަރުގެ މައްސަލާގައި އޭނާގެ މައްޗަށް އުފުލި މަނީ ލޯންޑަރީންގެ ދައުވާ ސާބިތުވެ، ކްރިމިނަލް ކޯޓުން ވަނީ އޭނާ 23 އަހަރަށް ޖަލަށްލައި 44.7 މިލިއަން ރުފިޔާ އިން ޖޫރިމަނާ ކުރުމަށް ހުކުމްކޮށްފައެވެ.