އުމްރާއަށް ނުފުރި ތިބި މީހުންނަށް ފުރޭނެ ގޮތެއް ހޯދައިދޭން ރައީސް އަންގަވައިފި
އުމްރާއަށް ނުފުރި ތިބި މީހުންނަށް ފުރޭނެ ގޮތެއް ހޯދައިދޭން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވައިފި އެވެ.
އެކަން އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވަނީ ހާމަކުރައްވާފަ އެވެ. މިނިސްޓަރު ވިދާޅުވީ އެކި ކުންފުނިތަކުން އުމްރާއަށް ދިއާން އުޅުނު މީހުންނަށް ނުފުރިފައިވުމާއި ބައެއް ގައުމުތަށް މެދުވެރިކޮށް ޓްރާންސިޓްކޮށް ފުރަން އުޅުނު މީހުންނަށް، އެ ގައުމުތަކުގެ ފްލައިޓްތައް ކެންސަލްވުމުން ނުފުރިފައިވާތީ އެ މީހުން އުމްރާއަށް ފުރުވޭނެ ގޮތެއް ހޯދުމަށް ރައީސުލްޖުމުހޫރިއްޔާ އިރުޝާދު ދެއްވާފައިވާ ކަމަށެވެ.
އެހެން ކަމުން އެ މީހުން ފުރުވާލެވޭނެ ގޮތެއް ހޯދުމުގެ މަސައްކަތް އެ މިނިސްޓްރީ އާއި މޯލްޑިވްސް ހައްޖު ކޯޕަރޭޝަނާއި މޯލްޑިވިއަން ގުޅިގެން މަސައްކަތް ފަށާފައިވާ ކަމަށެވެ. މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ފާހަގަކުރެވިފައިވާ ކަމަށް ވެސް ވިދާޅުވި އެވެ.
އަދި ވިދާޅުވީ ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގަ އެއް ހޯދަން ބޭނުންވާ މީހުންނަށް ޖާގަ ހުރި މިންވަރަކުން ދޭނެ ކަމަށެވެ.
"އަދި ވަގުތު ކުޑަތަންވެފައިވުމުން މިކަމުގައި ހުރި ދަތިތައް ހައްލުވޭތޯ މަސައްކަތް ކުރަމުންދާ ވާހަކަ ދަންނަވަން," މިނިސްޓަރު ވިދާޅުވި އެވެ.
މި ފުރުޞަތުގައި، ރައްޔިތުންނާ ގުޅުން ހުރި މިފަދަ ކަންކަން ހައްލުކޮށްދެެއްވުމަށް ރައީސް ޑރ މުޢިއްޒު ބަހައްޓަވަމުން ގެންދަވާ އަހައްމިއްޔަތަށްޓަކައި ވަރަށް އިހްލާސްތެރިކަމާއެކު ރައީސަށް ޝުކުރު ދަންނަވާ ކަމަށް ވެސް މިނިސްޓަރު ވިދާޅުވި އެވެ. އަދި މޯލްޑިވިއަންއާއި، މޯލްޑިވްސް ޙައްޖު ކޯޕަރޭޝަނަށް ވެސް ވަނީ ޝުކުރު އަދާކޮށްފަ އެވެ.
މިނިސްޓަރު ވިދާޅުވި ގޮތުގައި ގޮތްތަކެއް ފަހިކޮށްދިން ނަމަވެސް ދަތުރުގެ ހަރަދު ކުރާނީ އެހެންޏާ ވެސް ޢުމްރާ ދަތުރުގައި އޮންނަ އުސޫލުން އުމްރާވެރިން ކަމަށެވެ.
Advertisement
This content is created and paid for by advertisers and does not involve Voice Journalists
