އެކި ކުންފުނިތަކުގެ ހަވާލުގައި އުމްރާއަށް ދިއުމަށް ފައިސާ ދައްކައި، ނުފުރިފައި ތިބި 150 އަށްވުރެ ގިނަ މީހުން އުމްރާއަށް ފުރުވުމުގެ އިންތިޒާމު ހަމަޖެއްސުމުގެ މަސައްކަތް ސަރުކާރުން ފަށައިފިއެވެ. 

މިކަމާ ގުޅޭގޮތުން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، އުމްރާއަށް ދިއުމަށްޓަކައި ބައެއް ޤައުމުތައް މެދުވެރިކޮށް ޓްރާންސިޓްކޮށް ފުރަން އުޅުނު ފަރާތްތަކަށް، އެ ޤައުމުތަކުގެ ފްލައިޓްތައް ކެންސަލްވުމާ ގުޅިގެން ވަނީ ބޮޑެތި ދަތިތަކަކާ ކުރިމަތިވެފައި ކަމަށެވެ. އެގޮތުން މިހާތަނަށް ފާހަގަކުރެވިފައިވާ ގޮތުގައި 150 މީހަކު ފުރޭނެ ގޮތެއް ނެތިފައި އެބަތިއްބެވެ.

މިނިސްޓަރު ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ މަތިން، މި ފަރާތްތައް ފުރުވޭނެ ގޮތެއް ހޯދުމަށް އިސްލާމިކް މިނިސްޓްރީއާއި، މޯލްޑިވްސް ޙައްޖު ކޯޕަރޭޝަނާއި، ޤައުމީ އެއާލައިން މޯލްޑިވިއަން ގުޅިގެން މިހާރު ވަނީ މަސައްކަތް ފަށާފައެވެ.

އަދި ފްލައިޓެއް ޗާޓަރު ކުރެވޭނެ ގޮތް ވެއްޖެ ނަމަ، މިހާރު ތިބި 150 މީހުންގެ އިތުރުން ވެސް ޖާގަ ހުރި މިންވަރަކުން އިތުރު ފަރާތްތަކަށް ފުރުޞަތު ދެވޭނެ ކަމަށް މިނިސްޓަރު ފާހަގަކުރެއްވިއެވެ.

"ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ ވަރަށް ބާރަށް މަސައްކަތް ކުރަމުން މިދަނީ،" މިނިސްޓަރު ޝަހީމް ވިދާޅުވިއެވެ.

ވަޒީރު ވިދާޅުވިގޮތުން، މި މަސައްކަތުގެ ދަށުން ކުރެވޭ ދަތުރުތަކުގެ ޚަރަދު ކުރާނީ، އާންމުކޮށް ވެސް އުމްރާ ދަތުރުތަކުގައި އޮންނަ އުޞޫލުން އުމްރާވެރިން އަމިއްލައަށެވެ.

ރައްޔިތުންނާ ގުޅުން ހުރި މިފަދަ މުހިންމު ކަންކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބަހައްޓަވާ އަހައްމިއްޔަތު ފާހަގަކުރައްވައި، މިނިސްޓަރު ވަނީ ރައީސަށް ޝުކުރު އަދާކުރައްވާފައެވެ. މީގެ އިތުރުން މޯލްޑިވިއަން އާއި ޙައްޖު ކޯޕަރޭޝަނުން މިކަމުގައި ދޭ އެހީތެރިކަން ވެސް މިނިސްޓަރު ވަނީ ފާހަގަކުރައްވާފައެވެ.