ބޭރުގައުމު ތަކުގައި ހިނގަމުންދާ ހަނގުރާމައިގައި ބައިވެރިވުމަށް ދިޔަ ދިވެހިންގެ ބަޔަކު، ތުރުކީގައި ތާށިވެފައި ތިބި ކަމުގެ މައުލޫމާތު ލިބިގެން މިހާތަނަށް ކުރެވުނު މަސައްކަތުން އޭގެ ތެރެއިން ކުޑަ ކުއްޖަކާއި އެކުއްޖާގެ މަންމަ ރާއްޖެ ގެނެވިފައިވާކަމަށް ދާޚިލީ ސަލާމަތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ވިދާޅުވީ، ދިވެހިރައްޔިތުންގެ ތެރެއިން، ހަނގުރާމަވެރި އެކި ސަރަޙައްދުތަކަށް ގޮސް އަނބުރާ ނާދެވި، ތާށިވެފައި ތިބި މީހުންނާއި، ހަނގުރާމަ ތަކުގައި އެކި ގޮތްގޮތުން ބައިވެރިވެފައި ތިބި ފަރާތްތަކުގެ އިތުރުން، ހަނގުރާމައިގައި ބައިވެރިވާން ދިޔައިރު އެކުގައި ގެންދިޔަ އާއިލާގެ ފަރާތްތައް ރާއްޖެ ނާދެވިފައި ތިބޭ މައްސަލަ ނިމުމަކަށް ގެނައުމުގެ މަސައްކަތް ރައީސް ޑރ. މުޙައްމަދު މުޢިއްޒުގެ އިރުޝާދާއެކު ފައްޓަވާފައިވާ ކަމަށެވެ.
އެ މަސައްކަތުގެ ދަށުން މީގެ ކުރިން 23 މީހަކު ވަކިން ރީއިންޓަގްރޭޓް ކޮށްފައިވާ ކަމަށާ، އޭގެ ފަހުންވެސް ސީރިޔާގެ ދެ ސަރަހައްދެއްގައި ތާށިވެފައި ތިބި 60އެއްހާ މީހުން ގެނައުމަށް މަސައްކަތްތަކެއް ކުރެވިފައިވާކަމަށް ވަޒީރު ވިދާޅުވިއެވެ.
އަދި މިހާރުވެސް އެ މަސައްކަތް ކުރިއަށްދާ ކަމަށާ، އޭގެ އިތުރުން އެ ސަރަހައްދާއި އެހެން ގައުމުތަކުގައި ތިބި ދިވެހިން ގެނައުމުގެ މަސައްކަތް ކުރިއަށްދާ ކަމަށް ވަޒީރު ވިދާޅުވިއެވެ.
މި މަސައްކަތް ކުރިއަށް ދަނިކޮށް އަޅުގަނޑުމެންނަށް ލިބުނު މައުލޫމާތަކީ ތުރުކީގައި ދިވެހިރާއްޖޭގެ ތިން ރައްޔިތަކު، ހަނގުރާމައިގައި ބައިވެރިވުމަށް އެހެން ގައުމަކަށް ގޮސް، ފަހުން ތުރުކީއަށް ހިޖުރަ ކުރެވި، އެތަނުގެ ތެރޭގައި ތާށިވެފައި ތިބި މައުލޫމާތު. ތުރުކީ ސަރުކާރުން އެފަރާތްތައް ރީޓެއިން ކޮށް، ދިވެހި ސަރުކާރަށް އެންގުމާއެކު، އަޅުގަނޑުމެންގެ ގުޅިފައުވާ އެކިއެކި މުވައްސަސާ މެދުވެރިވެގެން އެ ފަރާތްތައް ރާއްޖެ ގެނައުމުގެ މަސައްކަތް ވަނީ ފަށާފައި.
ވަޒީރު ޢަލީ އިހްސާން
އެގޮތުން ކުރެވުނު މަސައްކަތުން އޭގެ ތެރެއިން 14 އަހަރުގެ އަންހެން ކުއްޖަކާއި އެކުއްޖާގެ މަންމަ ރާއްޖެ ގެނެވިފައިވާ ކަމަށާ، އެމީހުންނަށް ކުރިއަށް ގެންދަންޖެހޭ ރީއިންޓަގްރޭޝަން ޕްރޮގްރާމްތައް ކުރިއަށްދާކަން ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
