ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ސަބްސިޑިއަރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) ގެ ޝެޑުތަކުން ވިއްކާ ތެލުގެ އަގަށް ބަދަލު ގެނެސް، މިއަދުން ފެށިގެން އަގުތައް ބޮޑުކޮށްފިއެވެ.

މެދު އިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގަށް އަންނަމުންދާ ބަދަލުތަކާ ގުޅިގެން ގެނެވުނު ބަދަލެކެވެ.

އެއާއެކު އެސްޓީއޯއިން ވިއްކާ ތެލުގެ އަގުވެސް މިއަދުން ފެށިގެން ބޮޑުވެފައިވާކަން އެ ކުންފުނިން ވަނީ ހާމަކޮށްފައެވެ.

ޕެޓްރޯލް: ކުރިން ލިޓަރެއް 13.50 ރުފިޔާއަށް ލިބުނު ނަމަވެސް، މިހާރު ޕެޓްރޯލް ލިޓަރެއް ވިއްކާނީ 16.01 ރުފިޔާއަށެވެ. މިއީ ލިޓަރަކުން 2.51 ރުފިޔާގެ އިތުރުވުމެކެވެ.

ޑީސަލް: ކުރިން ލިޓަރެއް 13.92 ރުފިޔާއަށް ލިބުނު ޑީސަލްގެ އާ އަގަކީ 17.54 ރުފިޔާއެވެ. މިއީ ލިޓަރަކުން 3.62 ރުފިޔާގެ ބޮޑުވުމެކެވެ.

އެފްއެސްއެމްގެ ޝެޑުތަކުން މިއަދުން ފެށިގެން މި އަގުތަކުގައި ތެޔޮ ލިބޭނެ އިންތިޒާމު މިހާރު ވަނީ ހަމަޖެހިފައެވެ.