މި އަހަރުގެ ފާއިތުވި ދޮޅު މަހެއްހާ ދުވަސްތެރޭ، 72 މިލިއަން ރުފިޔާގެ މަސްތުވާތަކެތި އަތުލައިގަނެވިފައިވާ ކަމަށް ދާޚިލީ ސަލާމަތާ ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިހްސާން ވިދާޅުވީ، އެ ވުޒާރާއިން އެންމެ އިސްކަމެއް ދީގެން ކުރާ މަސައްކަތަކީ ދިވެހިރާއްޖެއަށް ޑްރަގު އެތެރެކުރާ މިންވަރު ކުޑަ ކުރުމަށް ކުރާ މަސައްކަތް ކަމަށެވެ. 

”މިގޮތުން، ފާއިތުވެދިޔަ ދޮޅުމަހެއްހާ ދުވަހުގެ ތެރޭގައި ފުލުހުންނާއި ކަސްޓަމްސްއިން ގުޅިގެން ހިންގުނު ތަފާތު އޮޕަރޭޝަންތަކުގެ ނަތީޖާއެއް ގޮތުން 83،450 ގްރާމްގެ މަސްތުވާތަކެތި ވަނީ އަތުލައިގެންފައި. މިއީ ގާތްގަނޑަކަށް މަގުމަތީގެ އަގުން ނަމަ 72.2 މިލިއަން ދިވެހު ރުފިޔާގެ މަސްތުވާތަކެތި“ ވަޒީރު ވިދާޅުވިއެވެ.

އެތަކެތި އަތުލައިގެންފައިވަނީ، އެއްގަމުގެ މަގުންނާއި ވައިގެ މަގުން އަދި ކަނޑުމަގުން ރާއްޖެއަށް އެތެރެކުރަނިކޮށް ކަންވެސް ވަޒީރު ވިދާޅުވިއެވެ. 

މިއާއެކު އިހްސާން ވަނީ އެ މަސްތުވާތަކެތި އަތުލައިގެންފައިވަނީ ފުލުހުންނާއި ކަސްޓަމްސްގެ ވަރަށް ގިނަ މުވައްޒަފުންގެ ބުރަ މަސައްކަތުން ކަން ފާހަގަކުރައްވާފައެވެ.

”ވަކިން ހާއްސަކޮށް ކަސްޓަމްސްއިން ބޯޑާ ސެކިއުރިޓީ އިންޓެލް ބެލެހެއްޓުމަށް މިހާރު ގެންގުޅޭ ތަފާތު އެކިއެކި ހުނަރުތައް ބޭނުންކޮށްގެން. އަދި އިންޓެލިޖެންސްގެ އަލީގައި ލިބޭ މުހިންމު މައުލޫމާތުތައް އޮޕަރޭޝަނަލައިޒް ކޮށްގެން ކުރެވޭ ބުރަ މަސައްކަތުގެ ނަތީޖާ. އެއާއެކު ދިވެހި ފުލުހުން ރާއްޖޭގެ އެކި ކަންކޮޅުތަކުގައި ރެޔާއި ދުވާލު 24 ގަޑިއިރު ކުރަމުންދާ ބުރަ މަސައްކަތުގެ ނަތީޖާ." ވަޒީރު އިހުސާން ވިދާޅުވިއެވެ.