އިންގްލިޝް ޕްރިމިއާ ލީގްގައި ރޭ މެންޗެސްތަރ ސިޓީ އާއި ނޮޓިންހަމް ފޮރެސްޓް ބައްދަލުކުރިމެޗް އެއްވަރުވުމުގެ ފައިދާ އާސެނަލުން ނަގައިފިއެވެ.

ޕްރިމިއާ ލީގްގއި މެންޗެސްޓަރ ސިޓީ ކުޅުނުމެޗް 2-2 ގެ ނަތީޖާއަކުން ދެޓީމް އެއްވަރުވެގެން ނިމުނުއިރު، އާސެނަލް އާއި ބްރައިޓަން ބައްދަލުކުރިމެޗް އާސެނަލުން ކާމިޔާބުކުރީ 1-0 ގެ ނަތީޖާއަކުންނެވެ. މި މެޗްގައި ފެނިގެންދިޔަ ހަމައެކަނި ލަނޑު އެޓީމަށް ކާމިޔާބުކޮށްދިނީ ބުކާޔޯ ސާކާއެވެ. މިއީ އޭނާ އާސެނަލަށް ކުލެދިން 300 ވަނަ މެޗެވެ. 

ސާކާ އާސެނަލްގެ އެކަޑަމީއާ ގުޅުނީ އޭނާގެ އުމުރުން އެންމެ 7 އަހަރުގައެވެ. ސާކާ އަކީ މިހާރު އާސެނަލްގެ ވައިސް ކެޕްޓަނެވެ. ރޭގެ މެޗުން ލިބުނު މޮޅާއެކު އާސެނަލް ތާވަލްގެ އެއްވަނާގައި އުޅެނީ ސިޓީއަށްވުރެ އެއްމެޗް އިތުރަށްކުޅެ، 7 ޕޮއިންޓްގެ ފަރަގަކާއެކުގައެވެ.

ޕްރިމިއާ ލީގް ތާވަލް.. މައުލޫމާތު: ސޮކަވޭ

ރޭގެ މެޗަށްފަހު އާސެނަލްގެ ކޯޗް މިކޭލް އަޓޭޓާ ބުނީ މެޗްގައި އޭނާގެ ކުޅުންތެރިން ކުޅުނީ ވަރަށް ރަނގަޅު ރޫހެއްގައި ކަމަށާއި، އެކަން މެޗުން ކިތަންމެ ރަނގަޅަކަށްވެސް ފެނިގެންދިޔަކަމަށެވެ. ކުރިއަށްހުރީ މުހިންމު މެޗްތަކެއްކަން ފާހަގަކުރަމުން އަޓޭޓާ ވަނީ ތާވަލްގެ އެއްވަނާގައި ހަތް ޕޮއިންޓްގެ ލީޑެއް އޮތުމަކީ އެޑްވާންޓޭޖެއް ނަމަވެސް، އެއީ ފަރުޖައްސާލައިގެން ހުރެވޭނޭ ކަމެއް ނޫންކަމަށެވެ.