ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކަށް ބްލެކްމެއިލްކުރި ޖެފްރީ އެޕްސްޓީންއާ، ގުޅުންތަކެއް ބޭއްވި ރާއްޖޭގެ ކުރީގެ ރައީސް މުހައްމަދު ވަހީދަށް ކުރެވޭ ތުހުމަތުތަކާ ގުޅޭ މައްސަލައެއް ފުލުހުންނަށް ހުށަހަޅައިފި ނަމަ، އެ މައްސަލަ ތަހުގީގުކުރައްވާނެ ކަމަށް ދާޚިލީ ސަލާމަތާބެހޭ ވަޒީރު އަލީ އިހުސާން މިއަދު ވިދާޅުވެއްޖެ އެވެ.
އެޕްސްޓީންއާ، ރައީސް ވަހީދު މުޢަމާލާތްކޮށް ގުޅުން ބާއްވާފައިވާކަން ހާމަވެފައިވަނިކޮށް އެމަނިކުފާނު ވަނީ ރައީސް މުހައްމަދު މުއިއްޒުގެ ސްޕެޝަލް އެންވޯއީގެ މަގާމުން އިސްތިއުފާ ދެއްވާފައެވެ.
އެމަނިކުފާނު އިސްތިއުފާ ދެއްވީ، އެޕްސްޓީންއާ ގުޅުން އޮތްކަން ހާމަވާ ލިޔުންތައް ލީކުވިތާ އެއްދުވަސް ފަހުން މިދިޔަ ފެބްރުއަރީ މަހުގެ 3 ވަނަ ދުވަހުއެވެ.
އެމަނިކުފާނު އިސްތިއުފާ ދެއްވީ ރައީސް ޑރ މުޙައްމަދު މުޢިއްޒު އެންގެވުމުން ކަމަށް ރައީސް މުޢިއްޒު ވަނީ ދާދިފަހުން ވިދާޅުވެފައެވެ.
އެޕްސްޓީން އާ މުޢާމަލާތްކޮށް ގުޅުން ބޭއްވި މައްސަލާގައި ރައީސް ވަހީދުގެ މައްޗަށް އެއްވެސް ތަހުގީގެއް ހިންގާތޯ މިއަދު ބޭއްވި ނޫސްވެރިންގެ ބައްދަލުވުމުގައި ކުރި ސުވާލަށް ޖަވާބު ދެއްވަމުން ވަޒީރު އިހްސާން ވިދާޅުވީ، އެ މައްސަލަ ފުލުހުންނަށް ހުށަހަޅާފައި ނުވާ ކަމަށެވެ.
އަދި ފުލުހުން އިސްވެވެސް އެފަދަ މައްސަލައެއް ނުބަލާ ކަމަށާ، ނަމަވެސް މައްސަލައެއް ހުށަހަޅައިފި ނަމަ ބައްލަވާނެކަމަށް ވިދާޅުވިއެވެ.
އެޕްސްޓީންގެ މައްސަލާގައި މިހާތަނަށް ފުލުހުންގެ މުވައްސަސާއަށް ހުށަހެޅިފައެއް ނެތް އެއްވެސް ޖިނާޢީ ތުހުމަތެއް ކުރެވޭ މައްސަލައެއް ތަހުގީގު ކުރުމަށް އެއްވެސް ފަރާތަކުން. އަދި މިހާތަނަށް އަމިއްލައަށް ފެނިގެން އަޅުގަނޑުމެންވެސް އެފަދަ ތަހުގީގެއް ފަށާފައެއް ނުވާނެ. އެހެން ނަމަވެސް ވަކި މީހަކު އިސްތިސްނާ ނުކޮށް، ޖިނާއީ ކުށެއް ކުރި ކަމަށް އަޅުގަނޑުމެންނަށް ގަބޫލުކުރެވޭ ޙާލަތުގަޔާއި އަދި ހުށަހެޅޭ ޙާލަތުގައި އެ މައްސަލަތައް އަޅުގަނޑުމެން ގެންދާނީ ބަލަމުން
އެޕްސްޓީންއާ ގުޅުން ބޭއްވިކަން ހާމަވުމާގުޅިގެން ރައީސް ވަހީދުގެ އޮފީހުން ނެރުނު ބަޔާނެއްގައި ބުނީ، އެޕްސްޓީންއާ އެކު އޮތީ ރަސްމީ ގުޅުމެއް ކަމަށާ އޭނާ ހިންގި އެއްވެސް މުޑުދާރު އަމަލެއްގައި ބައިވެރިވެފައިނުވާނެ ކަމަށެވެ. އަދި އެފަދަ ކަމެއް އެމަނިކުފާނާއި އެމަނިކުފާނުގެ އާއިލާ އެއްވެސް މެންބަރަކު ކުރައްވާފައިނުވާނެ ކަމަށެވެ.
އަދި އޭނާގެ ހަގީގަތް ހާމަވުމުން އެފަދަ ގުޅުމެއް އަދި މުއާމަލާތެއް ކުރެވިފައިވާތީ ހިތާމަ ކުރައްވާ ކަަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
