އީރާނާ ދެކޮޅަށް އެމެރިކާއިން އިސްވެ ފަށާފައިވާ ހަނގުރާމާގައި އީރާނަށް ހަމަލާ ދޭން ސައޫދި އަރަބިއްޔާގެ ސަރަހައްދު ބޭނުންކުރުމުގެ ހުއްދަ ނުދޭން އެ ގައުމުން ނިންމު ނިންމުމަށް ތައުރީފުކޮށް އީރާނުން އެ ގައުމަށް ޝުކުރު އަދާކޮށްފި އެވެ.

އޭއެފްޕީއަށް ދެއްވި އިންޓަވިއުއެއްގައި އީރާނުން ސައުދީއަށް ކަނޑައަޅާފައިވާ ސަފީރު އަލީ ރިޒާ ވިދާޅުވި ގޮތުގައި އެމެރިކާ އިން ފަށާާފައިވާ ހަނގުރާމާގައި އީރާނަށް ހަމަލާ ދޭން ސައޫދި އަރަބިއްޔާގެ ސަރަހައްދު ބޭނުންކުރުމުގެ ހުއްދަ ނުދޭން އެ ގައުމުން ނިންމު ނިންމުމަކީ ހިތްވަރު ގަދަ ނިންމުމެކެވެ. އެ ނިންމުމަށްޓަކައި ރިޒާ ވަނީ ސައޫދީގެ ވެރީންނަށް ޝުކުރު އަދާ ކުރައްވާފަ އެވެ.

މީގެ އިތުރުން ރިޒާ ވަނީ ސައުދީގެ ރިޔާޒްގައި ހުންނަ އެމެރިކާގެ އެމްބަސީއަށް ހަމަލާ ދިނީ އިރާނުން ކަމަށް ކުރާ ތުހުމަތުތައް ދޮގު ކުރައްވާފަ އެވެ. ރިޒާ ވިދާޅުވީ އެމެރިކާއާ އިޒްރޭލުން ފެށި ހަނގުރާމާގައި އިރާނުން މިހާރު ކުރަމުންދަނީ ދިފާއުވުމުގެ މަސައްކަތެވެ.

އަދި އެމެރިކާގެ ބޭސްތަކަށް ހަމަލާދޭނެ ކަމަށާ އެ ހަމަލާތަކުގެ ޒިންމާ ވެސް ނަގާނެ ކަމަށެވެ. ނަމަވެސް އެމެރިކާއާ އިޒްރޭލުން ކުރާހާ ތުހުމަތަކަށް އެ ގައުމުން އެއްބަސް ނުވާނެ ކަމަށް ރިޒާ ވިދާޅުވި އެވެ.

ރިޒާ ވިދާޅުވި ގޮތުގައި ރިޔާޒްގައި ހުންނަ އެމެރިކާގެ އެމްބަސީއަށް ހަަމަލާ ދިނީ އީރާނުންނެއް ނޫނެވެ. މީގެ ކުރީން ވެސް ބެލެވިފައި އޮތީ އެއީ އެހެން ބަޔަކު ދިން ހަމަލާއެއް ކަމަށެވެ.

އިޒްރޭލާއި އެމެރިކާއިން ބޭނުންވި ގޮތަށް ހަނގުރާމައިން ކުރި ނުލިބުމުން ޔަހޫދީން އިސްވެ ދަނީ ނުބައި އަމަލުތަކެއް ހިންގަމުންނެވެ. އެގޮތުން އަރަބި ގައުމުތަކުގެ މުހިންމު ތަންތަނަށް ހަމަލާދީ އެއީ އީރާނުން ކުރި ކަމެއް ކަމަށް ދައްކާ އެ ގައުމާއި އިސްލާމީ އެހެން ގައުމުތަކާއި ދެކޮޅުވެރި ކުރުވަން ދަނީ މަސައްކަތް ކުރަމުންނެވެ.