އެމެރިކާ-އީރާން ހަނގުރާމައާ ގުޅިގެން މެދުކަނޑާލާފައިވާ އިއްތިހާދު އެއާވޭޒްގެ ދަތުރުތައް، މިއަދުން މި މާޗުމަހުގެ 19 އަށް ވަކި ޚާއްޞަ މަންޒިލްތަކަކަށް އަލުން ފެށުމަށް އެ އެއާލައިނުން ނިންމައިފިއެވެ. އަލުން ދަތުރުތައް ފަށާ މަންޒިލްތަކުގެ ތެރޭގައި ދިވެހިރާއްޖެ ހިމެނެއެވެ.

އިއްތިހާދު އެއާވޭޒްއިން ހާމަކުރި ގޮތުގައި، މި ދަތުރުތައް އަލުން ފަށަން ނިންމީ ކަމާބެހޭ އިދާރާތަކާ ގުޅިގެން ސަލާމަތީ ގޮތުން ބަލަންޖެހޭ ކަންކަން ފުރިހަމައަށް ކަށަވަރު ކުރުމަށްފަހުގައެވެ.

މި މުއްދަތުގައި އަބޫދާބީއާއި ދުނިޔޭގެ މުހިންމު 25 މަންޒިލަކާ ދެމެދު ދަތުރުތައް ކުރިއަށްދާނެއެވެ. އޭގެ ތެރޭގައި މާލޭގެ އިތުރުން ލަންޑަން، ނިއުޔޯކް، ފްރެންކްފަޓް، މިލާން، ޕެރިސް، ޓޮރޮންޓޯ، ކުއާލަލަމްޕޫރު، ކޮލަމްބޯ އަދި ބެންކޮކް ފަދަ ސިޓީތައް ހިމެނެއެވެ.

ނަމަވެސް، މި ދަތުރުތަކުގެ ބޭރުން އަބޫދާބީއަށް ކުރަން ހަމަޖެހިފައިވާ އެހެން ހުރިހާ ޝެޑިއުލް ފްލައިޓްތަކެއް އަދިވެސް އޮތީ މެދުކަނޑާލާފައެވެ. އެހެންކަމުން، އެއާލައިނުން ސީދާ ގުޅައިގެން ނުވަތަ ދަތުރު ކަށަވަރުވެފައިވާކަމުގެ މައުލޫމާތު ލިބިފައިވާ ފަރާތްތައް ފިޔަވައި އެހެން މީހުން އެއާޕޯޓަށް ނުދިއުމަށް އެ އެއާލައިނުން އިލްތިމާސްކުރެއެވެ.

އިއްތިހާދުން ބުނެފައިވާ ގޮތުން، ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވިފައިވާ ފަރާތްތަކަށް އިސްކަންދީގެން ޖާގަ ހަމަޖައްސައިދިނުމުގެ މަސައްކަތް އެ އެއާލައިނުން ދަނީ ކުރަމުންނެވެ. މިގޮތުން:

28 ފެބްރުއަރީގެ ކުރިން ޓިކެޓް ނަގާފައިވާ އަދި 21 މާޗުއާ ހަމައަށް ދަތުރުކުރަން އޮތް ފަރާތްތަކަށް، އެއްވެސް އިތުރު ފީއަކާ ނުލައި 15 މެއި 2026 ގެ ކުރިން ދަތުރުގެ ތާރީޚު ބަދަލުކުރެވޭނެއެވެ.

10 މާޗްއާ ހަމައަށް ދަތުރުކުރަން އޮތް ފަރާތްތަކަށް، ދަތުރު ކެންސަލްކޮށް ރީފަންޑަށް އެދުމުގެ ފުރުސަތު އޮންލައިން ފޯމު މެދުވެރިކޮށް ނުވަތަ ޓްރެވަލް އެޖެންޓުން މެދުވެރިކޮށް ލިބޭނެއެވެ.

އިއްތިހާދު އެއާވޭޒްއިން އިތުރަށް ބުނީ، ކޯލް ސެންޓަރުތަކަށް ބާރުބޮޑުވެފައިވާތީ، ރީފަންޑަށް އެދޭ ފަރާތްތަކުން އޮންލައިން ފޯމު ބޭނުންކުރުމަކީ އެންމެ އަވަސް މަގު ކަމަށެވެ.

އަދި ދަތުރުގެ ކުރިން އެއާލައިންގެ ވެބްސައިޓުން ފްލައިޓްގެ ހާލަތު ޗެކްކުރުމަށާއި، ބުކިންގައިވާ ކޮންޓެކްޓް މައުލޫމާތު އަދާހަމަކުރުމަށްވެސް އިލްތިމާސްކޮށްފައިވެއެވެ.