މީހުންގެ ހައްޤުތައް ހޯދައިދިނުމުގައި ޓިކްޓޮކުން ފާހަގަވި ޝެހެނާޒް މޫސާ (ޝެހޭ) ފަހިދިރިއުޅުން ކޯޕަރޭޝަން (އެފްޑީސީ) ގެ ފްލެޓެއް އުސޫލާ ހިލާފަށް ކުއްޔަށް ދޭން އުޅުނު މައްސަލައެއް ފާހަގަކުރެވިގެން ބަލަން ފަށައިފިއެވެ.

މިކަން އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް ވަނީ ސޯޝަލް މީޑިއާގައި އެކްސްގައި ކުރެއްވި ޕޯސްޓެއްގައި ވިދާޅުވެފައެވެ. ހަމްދާން ކުރެއްވި ޕޯސްޓްގައި ވިދާޅުވެފައިވަނީ، އެފްޑީސީގެ ފްލެޓެއް ކުއްޔަށް ދޭން އުޅުނު މައްސަލައެއް އެކުންފުނީގެ ސަމާލުކަމަށް އައިސްފައިވާކަމަށެވެ. އުސޫލްތަކާ މުޅިން ހިލާފް އެ މައްސަލަ، އެފްޑީސީގެ ޓީމުން މިހާރު އެ މައްސަލަ ބަލަމުން އަންނަކަމަށް އޭނާ ވިދާޅުވިއެވެ.

ޝެހޭ އެފްބީގައި ކުރިޕޯސްޓް

ހަމްދާން ވިދާޅުވީ، ސޯޝަލް ހައުސިން ޔުނިޓްގެ އެގްރިމެންޓްގައި ވާގޮތުން މިއީ އުސޫލްތަކާއި ހިލާފް ކަމެއްކަމަށާއި، އެފަދަކަމެއް ކޮށްފިނަމަ ހަމަޖެހިފައިވާ އުސޫލުގެ މަތިން އެފަރާތެއް 50،000 ރުފިޔާ އަށްވުރެ ބޮޑު ނޫން އަދަދަކުން ޖޫރިމަނާކުރެވި އެގްރީމެންޓްވެސް ނިމުމަކަށް ގެނެވިދާނޭފަދަ އަމަލެއްކަމަށެވެ.

ޝެހޭ ސޯޝަލް މީޑިއާގައި ކުއްޔަށް ދިނުމަށް އިސްތިހާރު ޖަހާފައިވަނީ އަމާން ދޯދީގެ ޓަވަރެއްގެ އެޕާޓްމެންޓެކެވެ. މިއީ ކުއްޔަށް ދިނުން މަނާ އެޕާޓްމަންޓްތަކެއްކަމަށް ސަރުކާރުގެ އިތުރުން އެފްޑީސީންވެސް އަންނަނީ ކުރިންސުރެ ބުނަމުންނެވެ. ޝެހޭގެ ޕޯސްޓަށް ބަލާއިރު، އެ ޕޯސްޓްގައި ގުޅަންވީ ނަމްބަރެއްގެ ގޮތުގައި ޖަހާފައި ވަނީ އޭނާގެ އެކުވެރި އަދި ޓިކްޓޮކްގައި މަޝްހޫރު މަރިޔަމް ރުހުޝާ (ރޭޑިއޯ) ގެ ނަމްބަރެވެ. 

ޝެހޭގެ ޕޯސްޓްގައިވާގޮތުން ފަރުނީޗަރު ނެތް 3 ރޫމުގެ އެ އެޕާޓްމަންޓް ކުއްޔަށްދޭ އަގެއްގެ ގޮތުގައި ޖަހާފައިވަނީ މަހަކު 23،000 ރުފިޔާއެވެ. އަދި އެއްމަހުގެ އެޑްވާންސް އަގަކީވެސް 23،000 ރުފިޔާއެވެ. މައުލޫމާތު ލިބިފައިވާ ގޮތުގައި ޝެހޭ ކުއްޔަށް ދިނުމަށް ޖަހާފައިވަނީ އެފްޑީސީގެ އަމާންދޯދީގެ ޓަވަރެއްގައި ހިމެނޭ އެޕާޓްމަންޓެކެވެ. އެފްޑީސީން އެތަނުގެ ވެރިފަރާތަށް ކުއްޔަށްދީފައިވަނީ 10،500 ރުފިޔާއަށެވެ.

އެފްޑީސީން ވަނީ މީގެ ކުރިންވެސް 4،000 ހައުސިން ޔުނިޓް ތެރޭގައި ހިމެނޭ އެޕާޓްމަންޓެއް ބޮޑުއަގުގައި ކުއްޔަށްދޭން އުޅުނު މައްސަލައެއް ބަލަންފަށާފައެވެ.