ޤަތަރު އެއާވޭސްއިން ހަމަދު އިންޓަރނޭޝަނަލް އެއާޕޯޓުން ދަތުރުތައްކުރުން މެދުކަނޑާލާފައި އޮތުމަށްފަހު ބައެއް ޤައުމުތަކަށް ދަތުރުތައް ފެށުމަށް ނިންމައިފިއެވެ.

ޤަތަރު އެއާވޭސްއިން ނެރުނު ބަޔާނެއްގައި ބުނީ ބައެއް ޤައުމުތަކަށް އުދުހުންތަް ބޭއްވުމަށް ނިންމި ނަމަވެސް ދަތުރުތައް ކުރުމަށް ނިންމާފައިވަނީ ވަރަށް ލިމިޓެޑްކޮށް ކަމަށެވެ. އެގޮތުން މާދަމާގެ ވަގުތެއްގައި ލަންޑަން، ޕެރިސް، މެޑްރިޑް، ރޯމް، ފްރެންކްފަާޓް އަދި ބެންކޮކަށް އުދުހުންތައް ބޭއްވުމަށް ތާވަލްކޮށްފައިވާކަމަށް އެ އެއާލައިނުން ބުންޏެވެ.

މި ދަތުރުތައް ކުރުމުގެ ހުއްދަ ލިބުނީ ޤަތަރުގެ ސިވިލް އޭވިއޭޝަނަށް ވަގުތީ ގޮތުން ދަތުރުތަކެއް ކުރުމަށް ބޭނުންވާކަމަށް  ހުށަހެޅުމުންނެވެ. ޤަތަރު އެއާވޭސްއިން ބުނީ މިއީ ޤަތަރަށް އަންނަން ތިބި ދަތުރުވެރިންނަށް ހާއްސަކޮށް ބާއްވާ ފްލައިޓެއް ކަމަށެވެ. މިއީ ޝެޑިއުލްކޮށް ކުރާ ދަތުރުތަކެއް ނޫންކަމަށްވެސް އެ އެއާލައިނުން ވަނީ ބުނެފައެވެ. އެ އެއަރލައިނުން ހާމަކުރި ގޮތުގައި، މި ދަތުރުތައް ބޭއްވުމަށް ނިންމީ ގަތަރުގެ ސިވިލް އޭވިއޭޝަން އޮތޯރިޓީން ދަތުރުކުރުމަށް ރައްކާތެރި މަގެއް އޮތްކަން ކަށަވަރުކޮށް، އެކަމަށް ބޭނުންވާ ވަގުތީ ހުއްދަ ދިނުމާ ގުޅިގެންނެވެ. 

އެމެރިކާ އަދި އިސްރާއީލުން އީރާނަށް ދޭންފެށި ވައިގެ ހަމަލާތަކާ ގުޅިގެން ގަލްފް ޤައުމުތަކުގެ ވައިގެ ދަތުރުފަތުރުގެ ބޮޑުބައެއް އޮތީ އަދިވެސް ހުއްޓިފައެވެ.