އީރާނުގެ އިންޓަލިޖެންސް މިނިސްޓްރީން، އެޤައުމުގައި ދިރިއުޅެމުންދާ އަދުއްވުންނަށް ވަރުގަދަ އިންޒާރެއް މިއަދު ދީފިއެވެ.

އެމެރިކާ އަދި އިސްރާއީލުން އިސްވެ މިދިޔަ ހަފްތާގެ ހޮނިހިރުދުވަހު އީރާނަށް ދިން ވައިގެ ހަމަލާތަކާއެކު އެޤައުމުން ވަނީ، އިންޓަރނެޓްގެ ހިދުމަތް މެދުކަނޑާލާފައެވެ. އީރާނުގެ އިންޓަލިޖަންސް މިނިސްޓްރީން ވަނީ، މި ދަނޑިވަޅުގައި އެޤައުމުގެ ސަލާމަތަށް ފުށުއަރާ އެއްވެސް ކަމެއް އެއްވެސް ފަރާތެއްގެ ކިބައިން ޝައްކުކުރެވޭ ނަމަ، އެކަން ވަގުތުން މެސެޖް ކުރުމަށް އަންގާފައެވެ. އިންޓަރނެޓްގެ ހިދުމަތް މެދުކަނޑާލި ނަމަވެސް އެޤައުމުން ދަނީ އެތެރޭގެ ނެޓްވަރކް ބޭނުންކޮށްގެން ޓެކްސްޓް މެސެޖްގެ ހިދުމަތް ދެމުންނެވެ.

މިނިސްޓްރީން ބުނީ މި ދަނޑިވަޅުގައި އެމެރިކާ އަދި އިސްރާއީލަށް ވާގިވެރިވުމުގެ ގޮތުން އެއްވެސް ސިފައެއްގައި އެހީތެރިވެދީފިނަމަ އެމީހަކާ ދެކޮޅަށް ބާރުގެ ބޭނުންކުރާނޭކަމަށެވެ. އެމެރިކާ އަދި އިސްރާއީލުން ފެށި ހަނގުރާމަ ދެވަނަ ހަފްތާއަކަށް ފެށިފައިވާއިރު، ދުޝްމަނުންނަށް އެހީވުމަށް އީރާނުގެ ތެރޭގައި ބައެއް ފަރާތްތަކުން ވާގިވެރިވެފައިވާކަމަށް އީރާނުގެ ދައުލަތުގެ މީޑިއާއިން ވަނީ ރިޕޯޓްކޮށްފައެވެ.

އެގޮތުން އެމެރިކާ-ޒަޔަނިސްޓް ކުލީ ސިފައިންގެ" ބަޔަކު މިސައިލް އެރި ތަންތަން ފޮޓޯނަގައި، އެ މަންޒަރުތައް ގައުމުން ބޭރުގައި ހިންގާ "ޓެރަރިސްޓް ސެޓެލައިޓް ނެޓްވޯކްތަކަށާއި" އިންޓަނެޓް ޕޭޖުތަކަށް ފޮނުވަމުންދާ ކަމަށް ވަނީ ރިޕޯޓްކޮށްފައެވެ.