ޝީޝާ ބޭނުންކުރުން މަނާކޮށް ހަކުރު ސަބްސިޑީ ކަނޑާލަން މަސައްކަތް ކުރަމުން ނުދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.
ރައީސް މިހެން ވިދާޅުވީ ދަ ގްރޭޓާ އައްޑޫ ވިޝަންގެ ތަފްސީލު ލޯންޗުކުރުމުގެ މިރޭ އާޓިފިޝަލް ބީޗުގައި އޮތް ހަފްލާގައި ވާހަކަފުޅު ދައްކަވަމުންނެވެ.
ޝީޝާ މަނާކޮށް ދޯބުރާލި ހަކުރަށް ދެމުން އަންނަ ސަބްސިދީ ކަނޑާލުމަށް މަޝްވަރާތަކެއް ކުރެވެމުން އަންނަކަމަށް ސިއްހަތާ ބެހޭ ވަޒީރު ޢަބްދުﷲ ނާޒިމް ދާދި ފަހުން ވިދާޅުވެފައިވާތީ އެކަމާއި ގުޅޭގޮތުން ރައީސް މިރޭ ވިދާޅުވީ އެއީ ރަނގަޅު ވާހަކަފުޅެއް ނޫން ކަމަށެވެ. ސަރުކާރުން މަސައްކަތް ކުރަމުންދަނީ އެފަދަ ނުބައި އާދަތަކުން ދުރުވުމަށް ހޭލުންތެރިކަން އިތުރުކުރުމަށް ކަމަށް ވިދާޅުވި އެވެ.
ރައީސް މިރޭ ތަކުރާރު ކުރައްވާ ވިދާޅުވީ ޝީޝާ ބޭނުންކުރުން މަނާކޮށް ހަކުރު ސަބްސިޑީ ކަނޑާލަން ނޫޅޭ ކަމަށެވެ. ނަމަވެސް އެކަންކަމަށް ހޭލުންތެރިކުރުވުމަށް މަސައްކަތް ކުރައްވާނެ ކަމަށެވެ.
ޚާއްސަ ކޮށް ނިޒާމީ ގޮތެއްގައި އެފަދަ ކަންކަމުން ދުރުވުމަށް ރައްޔިތުންނަށް ހިތްވަރު ދެމުން ގެންދަވާނެ ކަމުގައި ވިދާޅުވި އެވެ.
"އަޅުގަނޑުމެން ނޫޅެން ޝީޝާ ބުއިން ބޭން ކުރާކަށެެއް. ހަކުރު ސަބްސިޑީ ކަނޑާލާކަށް. އެކަހަލަ ކަންކަން ކުރާކަށެއް. އެކަމަކު ޕަބްލިކް އެވެއާނަސް އިތުރުކޮށް މިކަމުން ދުރުވާން ހިއްވަރުދޭން ބޭނުންވަނީ," ރައީސް މިރޭ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
