ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އިން މިއަހަރުގެ ފުރަތަމަ ސެމިސްޓަރގެ ސްކޮލަރޝިޕްތައް ލިބުނު ދަރިވަރުންނަށް ސެޓްފިކެޓް ހަވާލުކޮށްފިއެވެ.
މި ރަސްމިއްޔާތުގައި ފާހަގަކޮށްލެވުނު އެއް ކަމަކީ ފުރަތަމަ ފަހަރަށް އެމް.އެން.ޔޫގައި "މައުމޫން ފައުންޑޭޝަން ސްކޮލަރޝިޕް" ހަވާލުކުރުމެވެ. އެމްއެންޔޫއިން ބުނީ މައުމޫން ފައުންޑޭޝަންގެ ފަރާތުން އެމް.އެން.ޔޫގެ މާސްޓަރ އޮފް އެޑިއުކޭޝަން ޕްރޮގްރާމްތަކުގައި ކިޔަވާ ދަރިވަރުންނަށް ހުޅުވާލި މި ފުރުސަތުގައި 6 ދަރިވަރުން ކުރިމަތިލާފައިވާ ކަމަށެވެ.
ސްކޯލާޝިޕްތައް ހަވާލުކުރުން
އޭގެ ތެރެއިން ހޮވުނު ކާމިޔާބު ދަރިވަރަށް ސެޓްފިކެޓް ހަވާލުކޮށްދެއްވީ މައުމޫން ފައުންޑޭޝަންގެ އެގްޒެކެޓިވް ކޮމިޓީގެ މެންބަރު ދުންޔާ މައުމޫނެވެ. މި ސްކޮލަރޝިޕަކީ ތައުލީމީ ދާއިރާއިން ރަނގަޅު ނަތީޖާ ހޯދާ އަދި އިސްނެގުމުގެ ހުނަރު ހުރި ދަރިވަރުންނަށް ހިތްވަރު ދިނުމުގެ ގޮތުން ދެވޭ ފުރުސަތެކެވެ.
އެމް.އެން.ޔޫ ސްކޮލަރޝިޕްތަކަށް ޖުމްލަ 64 ދަރިވަރުން ކުރިމަތިލީ އިރު، ފުރިހަމަ އިވެލުއޭޝަން މަރުހަލާއަކަށްފަހު 11 ދަރިވަރަކު ވަނީ ހޮވިފައެވެ. މި އެވޯޑްތައް ހަވާލުކޮށްދެއްވީ ޑރ. ޝެހެނާޒް އާދަމްއެވެ.
މިފަހަރު ދެވުނު ސްކޮލަރޝިޕްތަކުގެ ތެރޭގައި އެމް.އެން.ޔޫ ފުލް ސްކޮލަރޝިޕް، އެމް.އެން.ޔޫ ޓިއުޝަން ފީ ސްކޮލަރޝިޕް، ޕީ.އެޗް.ޑީ ސްކޮލަރޝިޕް އަދި ޝަހީދު އެވޯޑް ހިމެނެއެވެ. ގައުމީ ޔުނިވަރސިޓީން ބުނީ މި ސްކޮލަރޝިޕްތަކުގެ މައިގަނޑު މަގްސަދަކީ ކިޔެވުމުގެ ހަރަދުތަކަށް ލުޔެއް ހޯދައިދީ، ދަރިވަރުންގެ ތައުލީމީ އަދި ފަންނީ ކުރިއެރުމަށް މަގުފަހިކޮށްދިނުން ކަމަށެވެ.
Advertisement
This content is created and paid for by advertisers and does not involve Voice Journalists
