އަދުގެ ސަރުކާރު ވެރިކަމާ ހަވާލުވުމަށްފަހު އަންހެނުން ބާރުވެރިކުރުވުމަށް ކާމިޔާބު ގިނަ މަސައްކަތްތަކެއް ކޮށްފައިވާކަމަށް ކޮންގްރެސް ޕާޓީގެ އަންހެނުންގެ ވިންގުން ބުނެފިއެވެ.

މިއަދު ފާހަގަކުރަމުންދާ ބައިނަލްއަޤްވާމީ އަންހެނުންގެ ދުވަހުގެ މުނާސަބަތުގައި ޕީއެންސީ ވިމެންސް ވިންގުން ނެރުނު ބަޔާނުގައި ބުނެފައިވަނީ، ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ދުވަހުން ފެށިގެން މިއަދާ ހަމަޔަށް އަންހެނުން ބާރުވެރިކުރުމަށް ސަރުކާރުން ގިނަގުނަ މަސައްކަތްތައް ކޮށްފައިވާކަމަށެވެ.

ސިޔާސީ، އިގުތިސާދީ އަދި އިޖުތިމާއީ ގޮތުން އަންހެނުން ބާރުވެރިކުރުމަށް ސަރުކާރުން ކުރި މަސައްކަތްތައް ފާހަގަކުރަމުން މި ބަޔާނުގައި ބުނެފައިވަނީ، ސަރުކާރުން ވިޔަފާރީގެ މައިދާނަށް އަންހެނުންނަށް ފުރުސަތުތައް ފަހިކޮށްދިނުމަށް އިގުތިސާދީ ގޮތުން އަންހެނުން ބާރުވެރިކުރުމަށް ޚާއްސަ ލޯނު ސްކީމުތައް ތައާރަފުކޮށް، ގިނަ އަދަދެއްގެ އަންހެނުން އަލަށް ވިޔަފާރިއަށް ނެރެފައިވާ ކަމަށެވެ.

މީގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސްގެ މަގާމަކީ ހުރިހާ ރައްޔިތުންގެ ވޯޓުން އިންތިޚާބުކުރެވޭ މަގާމެއްގެ ގޮތުގައި ހަމަޖައްސައި، އެ ކޮމިޓީތަކުގެ މެންބަރުންނަށް ރޯދަ އިނާޔަތް ލިބޭނެ އިންތިޒާމު ހަމަޖެހި، ކައުންސިލުގެ ބަޖެޓުން ޑަބްލިއުޑީސީތަކަށް ދޭ ފައިސާގެ ނިސްބަތް އިތުރުކުރެވިފައިވާ ކަމަށެވެ. އަދި ސަރުކާރުގެ ވުޒާރާތަކާއި ދައުލަތުގެ ކުންފުނިތަކުގެ އެންމެ މަތީ ފަންތީގައި އަންހެނުން ހަރަކާތްތެރިވާ މިންވަރު ވެސް އިތުރު ކުރެވިފައިވާކަން ވަނީ ފާހަގަކޮށްފައެވެ.

މި ބަޔާނުގައި ބުނީ ކުރިއަށް އޮތް ލޯކަލް ކައުންސިލް އިންތިޚާބުގައި އެއް ޕާޓީއަކުން އެންމެ ގިނައިން އަންހެން ކެންޑިޑޭޓުން ވާދަކުރަނީ ޕީއެންސީގެ ޓިކެޓުގައި ކަމަށެވެ.

މި އަހަރުގެ އަންހެނުންގެ ދުވަސް ކުލަގަދަ ގޮތެއްގައި ފާހަގަކުރުމަށް ކޮންގްރެސް ޕާޓީގެ އަންހެނުންގެ ގޮފިން ބާއްވާ ޚާއްސަ ހަރަކާތް ރަމަޟާން މަހަށްފަހު ބާއްވާނެ ކަމަށް އެ ބަޔާނުގައި ވަނީ ބުނެފައެވެ.