ބައިނަލްއަޤްވާމީ ރަހުމަތްތެރިކަމުގެ މެޗެއްގައި ދިވެހިރާއްޖޭގެ 20 އަހަރުން ދަށުގެ ޤައުމީޓީމް ސިންގަޕޫރުގެ ޒުވާންޓީމާ ދެކޮޅަށް ކުޅުނުމެޗް ރާއްޖެ ކާމިޔާބުކޮށްފިއެވެ.

ސިންގަޕޫރުގެ ޗޯ ޗޫ ކަންގް ސްޓޭޑިއަމްގައި ކުޅުނު މިމެޗް ރާއްޖޭގެ ޓީމް ކާމިޔާބުކުރީ 3-4 ގެ ނަތީޖާއަކުންނެވެ. މި މެޗްގައި ރާއްޖެ ނިކުތީ ސިންގަޕޫރުގެ 19 އަހަރުން ދަށުގެ ޓީމާ ދެކޮޅަށެވެ. މެޗްގައި ރާއްޖޭގެ ޓީމުން ލަނޑުތައް ކާމިޔާބުކުރީ އިލާން، އީތަން، އަހްޒަމް އަދި އަލްހާނެވެ. 

ރާއްޖޭގެ ޒުވާންޓީމް ސިންގަޕޫރަށްގޮސް އެޤައުމުގައި ފަރިތަކުރުންތައް ބާއްވައި ތަޖުރިބާ ހޯދުމުގެ މެޗެއް ކުލެފައިމިވަނީ ކުރިއަށްއޮތް ސާފް 20 އަހަރުން ދަށުގެ މުބާރާތަށް ތައްޔާރުވުމަށެވެ. ސިންގަޕޫރަށް ކުރާ ދަތުރުގައި ރާއްޖޭގެ ޓީމް، އެޤައުމުގެ 19 އަހަރުން ދަށުގެ ޓީމާއެކު ދެ މެޗެއް ކުޅުމަށް ތާވަލްކުރިއެވެ. އޭގެ ތެރެއިން އެއްމެޗް މިއަދު ކުޅުނުއިރު، ފަހުމެޗް ކުޅުމަށް ތާވަލްކޮށްފައިވަނީ މިމަހުގެ 11 ވާ ބުދަދުވަހުއެވެ.

ސިންގަޕޫރުގައި ފަރިތަކުރުންތައް ބޭއްވުމަށްފަހު ޒުވާންޓީމް އެނބުރި ޤައުމަށް އައުމަށް ހަމަޖެހިފައިވަނީ އަންނަ ބްރާސްފަތިދުވަހުއެވެ. ރާއްޖޭގެ ޒުވާންޓީމް ސާފް ޗެމްޕިއަންޝިޕަށް ތައްޔާރުވުމުގެ މަސައްކަތް މިފަހަރު ފަށާފައިވަނީ ޤައުމީޓީމުގެ ކޯޗްކަމާ ހަވާލުވި ހަންގޭރީގެ ކޯޗު އިސްޓަވާން އުރުބާނީގެ އިރުޝާދުގެ ދަށުންނެވެ.