މެދުއިރުމަތީޣައި ފެށިފައިވާ ހަނގުރާމައާ ގުޅިގެން ރާއްޖޭގެ އިމްޕޯޓް ހާލަތު ރައްޔިތުންނަށް އޮޅުވައި ނުލައި ސާފުކޮށް ބަޔާންކޮށްދޭން ޖެހޭކަމަށް ކުރީގެ ރައީސް އިބްރާހިމް މުހައްމަދު ސޯޯލިހް މިރޭ ވިދާޅުވެއްޖެއެވެ.

އެމެރިކާ އަދި އިސްރާއީލުން އިސްވެ އީރާނަށް ވައިގެ ހަމަލާތަކެއް ދިނުމާ ގުޅިގެން އެ ސަރަހައްދު ވަނީ ހަނގުރާމައިގެ ހާލަތަށް ބަދަލުވެފައެވެ. މި ނުތަނަވަސްކަމުގެ ތެރޭގައި ރައީސް ނޫސްވެރިންނާ ބައްދަލުކުރައްވައި ވަނީ ރާއްޖެ ތެލަށް ޖެހުމުގެ ފުރުސަތެއް އޭރު އަދި ނެތްކަމަށް ވިދާޅުވެފައެވެ. އެގޮތުން ސްޓޮކްގައި ތެއޮ ހުރިކަމަށް ރައީސް ވަނީ ވިދާޅުވެފައެވެ.

މާލެސިޓީގެ މެނިފެސްޓޯ ލޯންޗުކުރުމަށް އެމްޑީޕީން މިރޭ ބޭއްވި ޖަލްސާގައި ވާހަކަދައްކަވަމުން ރައީސް ސޯލިހް ވަނީ ރައީސް ޑރ.މުއިއްޒު ދެއްކެވި ބައެއް ވާހަކަތަކަށް ރައްދުދީ، މިކަމުގައި ރައްޔިތުންނަށް ރަނގަޅު މައުލޫމާތު ފޯރުކޮށްދެމުން ނުދާކަމަށް ތުހުމަތު ކުރައްވާފައެވެ. ރައީސް ސޯލިހް ވިދާޅުވީ، ރާއްޖެއަކީ އިމްޕޯޓަށް ބަރޯސާވެފައި އޮތް ޤައުމެއްކަމަށާއި، މިފަދަ ހާލަތެއްގައި އެންމެ މުހިންމީ، ތެދު މަޢުލޫމާތު ރައްޔިތުންނަށް ދެމުންގެންދިއުން ކަމަށެވެ. 

ރައީސް ސޯލިހް ވިދާޅުވީ ކޮންމެ ދެ ހަފްތާއަކުން ރާއްޖެއަށް ތެޔޮ އުފުލާ ބޯޓެއް ނައިއްސިނަމަ ރާއްޖޭގެ ތެލުގެ ސްޓޯރޭޖް 10 ދުވަހާ ފަ15 ދުވަހާ ދޭތެރެއަށް ތިރިވެގެން ދާނޭ ކަމަށާއި، ރާއްޖޭގައި ދުވާލަކަށް 1.1 މިލިއަން ލީޓަރާ 2 މިލިއަން ލީޓަރާ ދޭތެރޭ ތެއޮ ބޭނުންކުރަމުންދާކަމަށެވެ.

ކޮވިޑް ދުވަސްވަރު ތެލުގެ އަގު ބޮޑުވެގެންދިޔަކަން ފާހަގަކުރައްވައި އެދުވަސްވަރު އެކި ރޭވުންތައް ރާވައި ތެއޮ އަގުބޮޑުވިނަމަވެސް ރާއްޖެއިން އެކަމަށް ހައްލު ހޯދާފައިވާކަން ރައީސް ސޯލިހްގެ ވާހަކަފުޅުގައި ފާހަގަކުރެއްވިއެވެ. އެގޮތުން ކޮވިޑް ދުވަސްވަރު 25 ޑޮލަރުގައި ހުރި ތެއޮ ފީފާއެއްގެ އަގު 48 ޑޮލަރަށް އުފުލިގެން ދިޔަކަމަށް ރައީސް ސޯލިހް ވިދާޅުވިއެވެ.

ސޯލިހް ވިދާޅުވީ ހަނގުރާމަ ހުއްޓާނޭ ދުވަހެއް އަދި އަންދާޒާކުރަން ނޭނގޭއިރު، މިކަމުގެ ސަބަބުން ބާޒާރުގައި ތަކެތި ނިހާޔަތަށް އަގުބޮޑުވެގެން ހިގައިދާނެ ކަމަށެވެ. އެހެންކަމުން ކުރިންސުރެ ފެށިގެން ރައްޔިތުންނަށް މިކަންކަމާބެހޭ މައުލޫމާތު ދިނުމަކީ ކޮންމެހެންވެސް މުހިންމު ކަމެއްކަމަށް ރައީސް ސޯލިހް ވިދާޅުވިއެވެ.