އީރާނުން ފޮނުވާ ކްލާސްޓާ މިސައިލްތައް އިސްރާއީލްގެ މެދުތެރޭ އެންމެ މުހިންމު ސަރަހައްދުތަކަށް އަމާޒުވަމުންދާކަމަށް ޓައިމްސް އޮފް އިސްރާއީލުން ހާމަކޮށްފިއެވެ.

އިސްރާއީލްގެ އެ ނޫހުން މިއަދު ބުނެފައިވަނީ، އީރާނުން އިސްރާއީލަށް މިހާރު ދެމުންދާ މިސައިލް ހަމަލާ ތަކަކީ ކުރިން ލަފާކޮށްފައި ނެތްވަރުގެ ގެއްލުންބޮޑު ހަމަލާތަކެއް ކަމަށެވެ. މިގޮތުން މި ފަހުން ދޭންފެށި ހަމަލާތައް އަމާޒުކޮށްފައިވަނީ، އިސްރާއީލްގެ މެދުތެރޭގެ ސަރަހައްދުތަކަށް ކަމަށް އެނޫހުން ބުންޏެވެ.

ހޯމަދުވަހުން ފެށިގެން އީރާނުން ދެމުންގެންދާ ހަމަލާތައް ވަރުގަދަ ކޮށްފައިވާކަމަށް އިސްރާއީލްގެ މީޑިއާތަކުން ބުނެފައިވާއިރު، މިހާތަނަށް މިސައިލް 8 ހަމަލާ ދީފައިވާކަމަށް ވަނީ ބުނެފައެވެ. އެގޮތުން މިހާރުވެސް ކްލަސްޓަރ މިސައިލް ހަމަލާތައް  ޔަހޫދު، އޯރް ޔަހޫދާ، ހޮލޯން އަދި ބެޓް ޔަމް ސަރަހައްދަށް އަމާޒުވެފައިވާއިރު، ހީނުކުރާވަރުގެ ބޮޑެތި ގެއްލުންތަކެއް ލިބިފައިވާކަމަށް މީޑިއާތަކުން ބުންޏެވެ. 

އިސްރާއީލްގެ މެދުތެރޭގެ ސަރަހައްދަކަށް އީރާނުގެ ހަމަލާއެއް އަރާފައި.. ފޮޓޯ: އިސްރާއީލް ޓައިމްސް

އިސްރާއީލް ޓައިމްސްއިން އާއްމުކުރި ވީޑިއޯތަކުން ފެންނަ ގޮތުގައި، ބިންގަނޑު ފޫއަޅުވާލައިގެން ގޮސް ބޮޑެތި ވަޅުގަނޑުތައް ހެދިފައިވާއިރު، ގިނަ އަދަދެއްގެ އުޅަނދުފަހަރާއި އިމާރާތްތަކަށް ވަނީ ބޮޑެތި ގެއްލުންތަކެއް ލިބިފައެވެ. މި ހަމަލާތަކަކީ ބޮޑު ސަރަހައްދަކަށް ކުދި ބޮންތައް ބުރައިގެންދާ ގޮތަށް ފަރުމާކޮށްފައިވާ ނުރައްކާތެރި ހަމަލާތަކެއްކަމަށް އިސްރާއީލްގެ މީޑިއާތަކުން ވަނީ ސިފަކޮށްފައެވެ.

މިފަހުން އީރާނުން ދެމުންދާ ހަމަލާތަކުގެ ގެއްލުން ބޮޑުވަމުންދިއުމާ ގުޅިގެން އިސްރާއީލްގެ އަސްކަރިއްޔާއިން ވަނީ ކަމާބެހޭ ފަރާތްތަކުން ސެންސަރު ނުކުރަނީސް އެއްވެސް ތަނެއްގެ މަންޒަރެއް އާއްމުނުކުރުމަށް އިންޒާރުދީފައެވެ. އީރާނުން މި ފަހުން ދޭންފެށި ހަމަލާތައް ސީރިއަސް ހަމަލާތަކެއްގެ ގޮތުގައި އިސްރާއީލްގެ އަސްކަރިއްޔާއިން ނަގާފައިމިވަނީ ހަމަލާތައް ދިން ސަރަހައްދަކީ އެ ޤައުމުގެ މިނިސްޓްރީ އޮފް ޑިފެންސާއި ޖާސޫސީ އިދާރާ "މޮސާޑް" ގެ މައި މަރުކަޒުވެސް ހުންނަ ސަރަޙައްދައް ވާތީއެވެ. މިއީ އިސްތިރާތީޖީ ގޮތުންވެސް އެންމެ މުހިންމު ސަރަހައްދުކަން ފާހަގަކޮށްލެވެއެވެ.

އިސްރާއީލްގެ ސްކޫލެއް ބަންދުކޮށްފައި..

އީރާނުން ދޭންފެށި ހަމަލާތަކާއެކު، އިސްރާއީލްގެ މެދުތެރޭ ސަރަހައްދުތަކުފެ އޮފީސްތަކާއި ކިޔަވައިދޭ ތަންތަން ވަނީ ހުއްޓުމަކަށް އައިސްފައެވެ. މިގޮތުން މިމަހުގެ 15 ވަނަ ދުވަހުގެ ނިޔަލަށް ތައުލީމްދޭ ތަންތަން ނުހުޅުވުމަށް ވަނީ ނިންމާފައެވެ. އެގޮތުން 16 ސިޓީއަކުން މި ނިންމުން ނިންމާފައިވާކަމަށް އިސްރާއީލްގެ މީޑިއާތަކުން ވަނީ ރިޕޯޓްކޮށްފައެވެ.

އީރާނުގެ ޤައުމީ ޓީވީން ބުނެފައިވަނީ، އިސްރާއީލަށް މިފަހުން އީރާނުން ދޭންފެށި ހަމަލާތަކަކީ، އީރާނުގެ އާ ލީޑަރު މުޖްތަބާ ޚާމަނާއީގެ އިރުޝާދުގެ ދަށުން ޔަހޫދީންނާ ދެކޮޅަށް ފޮނުވާލި މިސައިލްތަކުގެ ފުރަތަމަ ރާޅު ކަމަށެވެ.