ބަންގްލަދޭޝްއަށް ނިސްބަތްވާ ތެއޮ ޓޭންކަރުތަކަށް ހޮރްމޫޒު ކަނޑުއޮޅިން ދަތުރުކުރުމަށް އެއްވެސް ހުރަހެއް ނެތްކަމަށް އީރާނުން އަންގާފައިވާކަމަށް ބަންގްލަދެޝްގެ މީޑިއާތަކުން ބުނެފިއެވެ.
ބަންގްލަދޭޝްގެ ބިޒްނަސް ސްޓަންޑަރޑުން ބުނެފައިވަނީ، ބަންގްލަދޭޝްއަށް ތެލުގެ ސަޕްލައި މެދުނުކެނޑޭނެ ގޮތެއް ހޯދުމަށް އީރާން ސަރުކާރާއެކު ކާމިޔާބު މަޝްވަރާތަކެއް ކުރެވިފައިވާކަމަށެވެ. އެގޮތުން ބަންގްލަދޭޝްއަށް ތެލާއި ގޭސް އުފުލާ ތޭންކަރުތަކަށް ރައްކާތެރިކަމާއެކު ހޮރްމޫޒުން ދަތުރުކުރެވޭނޭކަމުގެ ޔަގީންކަން އީރާނުން ދީފައިވާކަމަށް އެ ނޫހުން ބުންޏެވެ.
އީރާނުގެ މި ނިންމުމާއެކު ބަންގްލަދޭޝްގެ ހަކަތައިގެ ރައްކާތެރިކަމާމެދު އުފެދިފައިވާ ކަންބޮޑުވުންތަކަށް ވަނީ ލުޔެއް ލިބިފައެވެ. މިކަމުގައި އެންމެފަހުން ގޮތްތަކެއް ފަހިވެގެން މިދިޔައީ ބަންގްލަދޭޝްގެ އެނާޖީ އެޑްވައިޒަރު އިޤްބާލް ޙަސަން މަޙްމޫދު ތުކޫ އާއި އީރާނުން ބަންގްލަދޭޝްއަށް ކަނޑައަޅާފައި ހުންނަވާ ސަފީރު ޖަލީލް ރަހީމީ ޖަހަނަބާދީ ބޭއްވި ބައްދަލުކުރެއްވުން ތަކަށްފަހުއެވެ.
އެމެރިކާ އަދި އިސްރާއީލާ ގުޅުންހުރި ޤައުމުތަކުގެ ތެއޮ ޓޭންކަރުތަކަށް ހޮރްމޫޒް ކަނޑުއޮޅިން ދަތުރުކުރުން އީރާނުން ވަނީ މަނާކޮށްފައެވެ. ނަމަވެސް އެޤައުމުތަކާ ފެއަށް ޖެހިލައިފިނަމަ އެ ފުރުސަތު ޤައުމަކުގެ އުޅަނދުތަކަށް ދޭނޭކަމަށް އީރާނުން ވަނީ ބުނެފައެވެ.
ހަކަތައިގެ ރައްކާތެރިކަން ކަށަވަރުކުރުމަށް ބަންގްލަދޭޝް އިން ގެންދަނީ ޗައިނާ އަދި އިންޑިއާ އާއެކުވެސް މަޝްވަރާކުރަމުންނެވެ. އިންޑިއާ އާއެކު ކުރެވުނު މަޝްވަރާތަކަށްފަހު މިއަދު އެކަނިވެސް އެޤައުމުން 5000 ޓަނުގެ ޑީސަލް ބަންގްލަދޭޝްއަށް ފޮނުވުމަށް ހަމަޖެހިފައިވާކަމަށް އިންޑިއާގެ އޭއެންއައި އިން ވަނީ ރިޕޯޓްކޮށްފައެވެ.
Advertisement
This content is created and paid for by advertisers and does not involve Voice Journalists
