މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ހަކަތަ އިގްތިސާދު ކުރުމުގެ ގޮތުން، ޕާކިސްތާނުން ހަރުކަށި ފިޔަވަޅުތަކެއް އަޅަން ނިންމައިފިއެވެ. 

ޕާކިސްތާނުގެ ބޮޑުވަޒީރު ޝެހްބާޒް ޝަރީފް ހޯމަ ދުވަހު ގައުމާ މުޚާތަބު ކުރައްވައި ވިދާޅުވި ގޮތުގައި، އަސާސީ ޚިދުމަތްތައް ފިޔަވައި ސަރުކާރުގެ އެހެން އިދާރާތަކުގެ 50 އިންސައްތަ މުވައްޒަފުން މަސައްކަތް ކުރާނީ ގޭގައެވެ.

އަދި ބޭންކުތައް ފިޔަވައި ސަރުކާރުގެ އޮފީސްތައް ހުޅުވާފައި ހުންނާނީ ހަފުތާއަކު ހަތަރު ދުވަހުއެވެ. މީގެ އިތުރުން، މި ހަފުތާގެ ފަހުކޮޅުން ފެށިގެން ދެ ހަފުތާގެ މުއްދަތަށް ސުކޫލުތައް ބަންދުކުރުމަށް ނިންމާފައިވާއިރު، މަތީ ތައުލީމުދޭ މަރުކަޒުތަކުގެ ކިޔެވުން ކުރިއަށްދާނީ އޮންލައިންކޮށެވެ.

ބޮޑުވަޒީރު އިޢުލާން ކުރެއްވި އިގްތިސާދީ ފިޔަވަޅުތަކުގެ ތެރޭގައި، ކުރިއަށް އޮތް ދެ މަސްދުވަހަށް ސަރުކާރުގެ އުޅަނދުތަކަށް ދޭ ތެލުގެ އެލަވަންސް ދެބައިކުޅަ އެއްބަޔަށް ކުޑަކުރުމާއި، ސަރުކާރުގެ އުޅަނދުތަކުގެ 60 އިންސައްތަ ދުއްވުން ހުއްޓާލުން ހިމެނެއެވެ.

އަދި ފެޑަރަލް ކެބިނެޓުގެ ވަޒީރުން މި މުއްދަތުގައި މުސާރަ ނުނަންގަވާ ގޮތަށް ހަމަޖައްސަވައި، މެންބަރުންގެ މުސާރައިން 25 އިންސައްތަ އުނިކުރުމަށް ވަނީ ނިންމަވާފައެވެ.

މި ނިންމުންތަކަކީ މިދިޔަ ފެބުރުއަރީ މަހުގެ 28 ވަނަ ދުވަހު އިސްރާއީލާއި އެމެރިކާއިން އީރާނަށް ދިން ހަމަލާތަކާ ގުޅިގެން މެދުއިރުމަތީގައި އުފެދިފައިވާ ނުތަނަވަސްކަމުގެ ސަބަބުން ތެލާއި ހަކަތަ ލިބުމަށް ދަތިވުމުން އެޅި ފިޔަވަޅުތަކެކެވެ.

އީރާނުން ވަނީ މި ހަމަލާތަކަށް ރައްދުދީ، ދުނިޔޭގެ ތެލުގެ ވިޔަފާރީގެ މުހިންމު މަގު ކަމަށްވާ "ސްޓްރެއިޓް އޮފް ހޯރްމޫޒް" ބަންދުކޮށްފައެވެ.

މި ހާލަތާ ގުޅިގެން އަވަށްޓެރި އިންޑިއާއިން ވެސް ވަނީ އެ ގައުމުގެ ގޭބިސީތަކަށް ބޭނުންވާ ކައްކާ ގޭސް (އެލް.ޕީ.ޖީ) އުފައްދާ މިންވަރު އިތުރުކުރުމަށް އަންގާފައެވެ. އަދި ވިއެޓްނާމުން ވެސް ވަނީ ތެޔޮ އިގްތިސާދު ކުރުމުގެ ގޮތުން މުވައްޒަފުން ގޭގައި ތިބެގެން މަސައްކަތް ކުރުމަށް ބާރުއަޅާފައެވެ.