ކުރިއަށްއޮތް ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލެވޭ މީހުންގެ ލިސްޓް އިލެކްޝަންސް ކޮމިޝަނުން އިއުލާނުކޮށްފިއެވެ.

އިލެކްޝަނުން އާއްމުކޮށްފައިވާ ވޯޓުލުމުގެ ހައްޤު ލިބިފައިވާ މީހުންގެ ލިސްޓަށް ބަލާއިރު، ކުރިއަށް އޮތް ލޯކަލް ކައުންސިލް އިންތިހާބާއި، ޑަބްލިއުޑީސީ އިންތިހާބުގައި ޖުމްލަ 294،876 މީހަކަށް ވޯޓުލުމުގެ ހައްޤު ލިބިގެންވެއެވެ. އޭގެ ތެރޭހައި ހިމެނެނީ، 150،370 ފިރިހެނުންނާއި 144،506 އަންހެނުންނެވެ.

ކުރިއަށްއޮތް ލޯކަލް ކައުންސިލް އިންތިހާބު ބޭއްވުމަށް ތާވަލްކޮށްފައިވަނީ، އަންނަ އޭޕްރިލްމަހުގެ 4 ވަނަ ދުވަހުއެވެ. އެދުވަހު ލޯކަލް ކައުންސިލް އިންތިހާބުގެ އިތުރުން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ނެގުމަށް ފެނޭތޯ ބެލުމަށް ނަގާ ވޯޓުލުންވެސް ކުރިއަށް ގެންދިއުމަށް ވަނީ ނިންމާފައެވެ.

އެދުވަހު ބާއްވާ އިންތިހާބުތަކުގައި ރާއްޖޭގެ އެކި ސަރަހައްދުތަކުގައި ޖުމްލަ 588 ވޯޓުފޮށި ބެހެއްޓުމަށް ނިންމާފައިވާއިރު، މާލެ ސަރަހައްދުގައި 190 އަށްވުރެ ގިނަ ވޯޓުފޮށި އަދި އަތޮޅުތަކުގައި 322 ފޮށި ބަހައްޓާނެއެވެ.

މިފަހަރުގެ އިންތިޚާބުގައި ރިސޯޓުތަކާއީ ސިނާޢީ މަސައްކަތްކުރާ ރަށްތަކުގައި ވޯޓުފޮށި ނުބެހެއްޓުމަށް ވަނީ ނިންމާފައެވެ. އެއީ ކަނޑައެޅިފައިވާ އަދަދަށް އެތަންތަނުގައި ވޯޓުލުމަށް މީހުން ރަޖިސްޓްރީ ވެފައިނުވާތީއެވެ. 

މީގެ އިތުރުން ރާއްޖޭއިން ބޭރުގައި ވޯޓު ފޮށި ބެހެއްޓުމަށް އިޢުލާންކޮށްފައިވާ ގައުމުތަކުގެ ތެރެއިން ރީ-ރަޖިސްޓަރީވުމަށް ހުޅުވާލި ފުރުސަތުގައި ރަޖިސްޓްރީވެފައިވަނީ ކަނޑައެޅިފައިވާ އަދަދަށްވުރެ މަދުންނެވެ. އެގޮތުން، މެލޭޝިއާއިން 499 މީހުން ރީ-ރަޖިސްޓަރީ ކުރިއިރު ސްރީލަންކާއިން ރަޖިސްޓްރީވެފައިވަނީ، 189 މީހުންނެވެ. ރާއްޖެއިން ބޭރު ގައުމުތަކުގައި ވޯޓުފޮށި ބަހައްޓާނީ އެ ގައުމަކަށް ވޯޓުލުމަށް މަދުވެގެން 2,000 މީހުން ރަޖިސްޓަރީކޮށް، މަދުވެގެން ކޮންމެވެސް އެއް ދާއިރާއަކުން 40 މީހުން ރަޖިސްޓަރީވެފައިވާނަމަ އެވެ. އެހެންކަމުން ކުރިއަށްއޮތް އިންތިހާބުގައި ރާއްޖެއިން ބޭރުގެ އެއްވެސް ޤައުމެއްގައި ވޯޓު ފޮއްޓެއް ނުބަހައްޓާނެއެވެ.