އެއް ދުވަހެއްގައި އިންތިހާބުތައް ބޭއްވުމަކީ އެންމެ ފައިދާ ބޮޑު ގޮތް ކަމުގައި ރައްޔިތުންގެ މަޖިލީހުގެ ކުރީގެ ރައީސް އަދި ރައީސް ނަޝީދާއި ރައީސް ސޯލިހްގެ ވެރިކަމުގައި އެ ދެ ބޭފުޅުންނަށް ލަފާ ދެއްވުމަށް އެޑްވައިޒަރެއްގެ މަގާމު ފުރުއްވި މުހައްމަދު ޝިހާބު ވިދާޅުވެއްޖެ އެވެ.

ޝިހާބު މިހެން ވިދާޅުވީ "ހޭލުން" މިނަމުގައި ކުރިއަށް ގެންދާ ޕްރަގްރާމެއްގައި ވާހަކަ ދައްކަވަމުންނެވެ. ޝިހާބު ވިދާޅުވީ އެއް ދުވަހެއްގައި އިންތިހާބުތައް ބޭއްވުމަކީ އެންމެ ފައިދާ ބޮޑު ގޮތް ކަމަށެވެ. އަދި ވިދާޅުވީ އިރުއިރުކޮޅާ އިންތިހާބުތައް ބޭއްވުމަކީ އެއީ ރަނގަޅު ގޮތެއް ނޫން ކަމަށެވެ.

އިރުއިރުކޮޅާ އިންތިހާބުތައް ބާއްވަން ޖެހުން ކުރަން ޖެހޭ ހަރަދު ބޮޑުވެ ގައުމުގައި އޮންނަން ޖެހޭ ހަމަޖެހުމަށް އަސަރުކުރާ ކަމަށް ވިދާޅުވި އެވެ. އަދި ސިޔާސީ ޕާޓީތަކުން ވެސް އިންތިހާބުތަކަށް ބޮޑު ހަރަދެއް ކުރަން ޖެހޭ ކަމުގައި ވިދާޅުވި އެވެ.

ޝިހާބުގެ ވިސްނުންފުޅަކީ ތިން އިންތިހާބުވެސް އެއް ދުވަހެއްގައި ބޭއްވުން ކަމުގައި ވިދާޅުވި އެވެ.

"މި އިންތިހާބުތައް [ރިޔާސީ އިންތިހާބާއި މަޖިލީސް އިންތިހާބާއި ކައުންސިލް އިންތިހާބު] އެއް ދުވަހެއްގައި ބޭއްވިއްޖެނަަ ވަރަށް ގިނަ ފައިސާ ސަލާމަތް ކުރެވޭނެ ކަމަށް އަޅުގަނޑު ގަބޫލުކުރަން," ޝިހާބު ވިދާޅުވި އެެވެ.

މީގެ އިތުރުން ރިޔާސީ އިންތިހާބުގައި ވޯޓްލާ ބޮޑު އާބާދީއަށް އެހެން އިންތިހާބުތަކުގައި ވޯޓް ދިނުމުގެ ފުރުސަތު ވެސް ފަހި ވެގެންދާނެ ކަމުގައި ޝިހާބު ވިދާޅުވި އެވެ. 

"މިފަހަރު އަޅުގަނޑުމެންނަށް ކުރިމަތިވެފައި މިއޮތް ސުވާލަކީ ކުރިއަށް މިއޮތް ރައްޔިތުންގެ މަޖިލީހާއި އަދި ދެން އަންނާނެ ރިޔާސީ އިންތިޚާބެއް އެއް ދުވަހެއްގައި ބޭއްވުމާމެދު އަޅުގަނޑުމެންނަށް ފެންނަ ގޮތެއް ނިންމުން. އެގޮތުގައި އަޅުގަނޑަށް ބުރަވެވެނީ ދެ އިންތިޚާބު އެއް ދުވަހަކަށް ބަދަލުކޮށްލެވުނީމަ ވަރަށް ބޮޑެތި ފައިދާތަކެއް ޤައުމަށް ލިބިގެންދާނެ ކަމަށް," ޝިހާބު ވިދާޅުވި އެވެ.

ޝިހާބު އަކީ ދިވެހި ބަރުލަމާނީ ހަޔާތުގަައި ވަރަށް ފާހަގަކޮށްލެވޭ ބޭފުޅެކެވެ. ރައްޔިތުންގެ މަޖިލީހުގައި 24 އަހަރަށް ވުރެ ދިގު މުއްދަތަކަށް މެންބަރުކަން ކުރެއްވި އެވެ. އަދި ރައީސް ނަޝީދުގެ ސަަރުކާރުގައި ހޯމް މިނިސްޓަރުކަން ވެސް ކުރެއްވި އެވެ.