ދުޢާ އަކީ އެންމެ ބާރު ގަދަ ހަތިޔާރު ކަމަށް ބުނާ ވާހަކައަކީ އައު ވާހަކައެއް ނޫންނެވެ. ޚާއްސަކޮށް މައިންބަފައިން ދަރިންނަށްޓަކައި ކުރާ ދުޢާއެވެ. އެއީ ”ނުވާނެ“ ނުވަތަ ”ނުލިބޭނެ“ ކަމަށް ހީކުރެވުނު އެތައް ކަމެއްވެ، އެތައް އެއްޗެއް ލިބިގެންދިޔަ ވަރުގަދަ ހަތިޔާރު ކަމަށް، ދުޢާގެ ސަބަބުން ހުވަފެންތައް  ހަގީގަތަކަށްވި އެތައް ބަޔަކު ބުނެއެވެ. 

މިއީވެސް އެފަދަ ވާހަކައެކެވެ. މަންމައެއްގެ އަދި ދަރިފުޅުގެ އިޚްލާސްތެރި ދުޢާއިން ދަރިފުޅަށް ޢުމްރާ ދަތުރެއް ލިބުނު ވާހަަކައެވެ.

މި އުފާވެރި ޚަބަރު ހިއްސާކުރަމުން އެ ކުއްޖާގެ މަންމަ ފޭސްބުކްގައި ކުރި ޕޯސްޓެއްގައި ބުނެފައިވަނީ، ރަމަޟާން މަހު ދީނީ ހޭލުންތެރިކަން އިތުރުކުރުމަށް ބާއްވަމުންދާ އިޙްޔާ ފޯރަމްތަކުގެ ތެރެއިން ފުރަތަމަ ފޯރަމްގެ އޮތް ރޭ، ފޯރަމް ނިންމާލުމަށްފަހު ދަރިފުޅު ގެއަށް އައީ ވަރަށް ދެރަވެފައި ހުރެގެން ކަމަށެވެ.

"ނުލިބުނު އެއްވެސް އެއްޗެއް!" ދަރިފުޅު ބުނި ކަމަށް މަންމަ ބުންޏެވެ.

"ދެވަނަ ރޭ އަހަރެން ދަރިފުޅުގާތު ބުނީމެވެ. ދަރިފުޅަށް އިނާމެއް ލިބޭތޯ ދުޢާ ކުރާނަމެވެ. ދަރިފުޅުވެސް ދުޢާ ކުރާށެވެ. އަބަދުވެސް އެކަލާނގެ އަށް ދުޢާކޮށް ދަންނަވާ ހެޔޮކޮށް ވިސްނާށެވެ. ދުޢާކޮށްފައި އިނާމު ލިބޭނޭ ހިތަށް އަރުވާށެވެ،" އެ މަންމަ ލިޔެފައިވެއެވެ.

އޭގެ ފަހުން ކޮންމެ ރެއަކުވެސް ފޯރަމް ނިންމާފައި އައިސް، އިނާމު ލިބުނު ކުދިންގެ ނަންތައް ދަރިފުޅު ކިޔައިދެމުން ދިޔަކަމަށް އެ މަންމަ ލިޔެފައިވެއެވެ. އަދި ދަރިފުޅަށް އެއްވެސް އިނާމެއް ނުލިބުނު ކަމުގައި ވިޔަސް، މަންމަ ދިޔައީ ހުއްޓުމެއްނެތި ދުޢާކުރަމުން ކަމަށްވެސް ބުންޏެވެ.

"ދަރިފުޅަށް އިނާމެއް ނުލިބުނެއް ކަމަކު އަހަރެން ދުޢާ ކުރަމުން ދިޔައީމެވެ. އެކަލާނގެ ހަޟްރަތަށް އެދި ދެންނެވީ އަހަރެންގެ ނަޒަރުގައި ކުޑަ ދުޢާއެކެވެ. ‘ޔާ الله! މިއަޅާގެ ދަރިފުޅަށް އެތަނުން ހަދިޔާއެއް ލިބޭނެ ގޮތް މިންވަރު ކުރައްވާށި!’ އަދި އެކަމަށް އެދި ހިތުނިޔަތް ގަނެ އިސްތިޣްފާރް ވެސް ކުރީމެވެ." ކުއްޖާގެ މަންމަގެ ފޭސްބުކް ޕޯސްޓުގައި ބުނެފައިވެއެވެ. 

އެ މަންމަގެ އިޚްލާޞްތެރި ދުޢާ އިޖާބަކުރެއްވީ ހީވެސް ނުކުރާފަދަ ގޮތަކަށެވެ. މުޅި އިޙްޔާ ފޯރަމްގެ އެންމެ އަގުބޮޑު އިނާމު ކަމަށްވާ އުމްރާ ދަތުރު އެ ކުއްޖާއަށް ލިބިގެންދިޔައީއެވެ. ކުއްޖާއަށް ލިބުނީ މާތް اللهގެ ގެކޮޅަށް ޒިޔާރަތް ކުރުމުގެ މަތިވެރި ދަޢުވަތެވެ.

މިމި ހާދިސާ ހިއްސާކުރަމުން އެ މަންމަ ވަނީ ދުޢާކުރުމުގެ މަތިވެރިކަމާއި ބާރާމެދު އެއްވެސް މީހަކު ޝައްކު ނުކުރުމަށާ، އަބަދުވެސް އަމިއްލަ ނަފްސަށާއި ދަރިންނަށް ހެޔޮގޮތް މިންވަރުކޮށްދެއްވުން އެދި ދުޢާކުރުމުގައި ދެމިތިބުމަށް އެދިފައެވެ.