އެމެރިކާ އާއި އިސްރާއީލުން އިސްވެ އީރާނާ ދެކޮޅަށް ފަށާފައިވާ ހަނގުރާމައިގެ ފުރަތަމަ ހަފްތާ އެކަނިވެސް 11 ބިލިއަނަށްވުރެ ގިނަ ޑޮލަރު ހަރަދުކޮށްފިއެވެ

ޕެންޓަގަނުން އެމެރިކާގެ ޤާނޫނު ހަދާ މަޖިލީހުގެ މެންބަރުންނަށް ދީފައިވާ މަޢުލޫމާތާ ހަވާލާދީ ނިއުޔޯކް ޓައިމްސްއިން ރިޕޯޓްކުރި ގޮތުގައި މިހާތަނަށް ކޮށްފައިވާ ހަރަދުތަކަށް ބަލާއިރު، ހަރަދުވިކަމަށް ފާހަގަކޮށްފައިވާ 11 ބިލިއަން ޑޮލަރުގެ ތެރޭގައި އެންމެފުރަތަމަ ހަމަލާތައް ފެށުމުގެ ކުރިން ވީ ތައްޔާރީތަކަށް ހިނގި ބޮޑެތި ޚަރަދުތައް ނުހިމެނެއެވެ. އެހެންކަމުން ޖުމްލަ ޚަރަދު މިއަށްވުރެ މާ ބޮޑުތަނުން އިތުރުވުން އެކަށީގެންވާ ކަމަށް އެ ނޫހުން ވަނީ ބުނެފައެވެ.

އެމެރިކާގެ ދިފާއީ ވުޒާރާގެ އޮފިޝަލުން ކުރިން ކޮންގްރެސްއަށް ދީފައިވާ މައުލޫމާތުތަކުން ދޭހަވާގޮތުގައި ހަނގުރާމައިގެ ފުރަތަމަ ދެ ދުވަހުގެ ތެރޭގައި އެކަނިވެސް ގާތްގަނޑަކަށް 5.6 ބިލިއަން ޑޮލަރުގެ ހަތިޔާރު ބޭނުންކޮށްފައިވެއެވެ.

ވޮޝިންގްޓަންގެ ސެންޓަރ ފޯރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒް (ސީ.އެސް.އައި.އެސް) އިން އަންދާޒާކުރާ ގޮތުގައި، "އޮޕަރޭޝަން އެޕިކް ފިއުރީ"ގެ ފުރަތަމަ 100 ގަޑިއިރުގެ ތެރޭ އެކަނިވެސް އެމެރިކާއިން ވަނީ 3.7 ބިލިއަން ޑޮލަރު ޚަރަދުކޮށްފައެވެ. އެއީ ދުވާލަކަށް އެވްރެޖްކޮށް ބަލާނަމަ 891 މިލިއަން ޑޮލަރެވެ. އެ އިދާރާއިން ބުނި ގޮތުގައި މި ޚަރަދުތަކުގެ ތެރެއިން 3.5 ބިލިއަން ޑޮލަރަކީ ބަޖެޓުގައި ކުރިން ހިމަނާފައިވާ ޚަރަދުތަކެއް ނޫނެވެ.

ހަނގުރާމައިގެ ޚަރަދުތައް ވަގުތުން ބަލަމުންދާ "އީރާން ވޯރ ކޮސްޓް ޓްރެކަރ" ވެބްސައިޓުން ދައްކާ ގޮތުގައި، ބުރާސްފަތި ދުވަހުގެ ހެނދުނާ ހަމައަށް މި ހަނގުރާމައަށް 17 ބިލިއަން ޑޮލަރަށްވުރެ ގިނަ ޑޮލަރު ވަނީ ހަރަދުކޮށްފައެވެ. އެހެންކަމުން ދުވާލެއްގެ މައްޗަށް ބިލިއަނަކަށްވުރެ ގިނަ ޑޮލަރު އީރާނާ ދެކޮޅަށް ކުރަމުންގެންދާ ހަނގުރާމައަށް ހަރަދުވާކަމަށް ހިސާބުތަކުން ދައްކައެވެ. ނަމަވެސް ހަނގުރާމައިގެ ހަގީގީ ޚަރަދު މިއަށްވުރެ ބޮޑުވާނެ ކަމަށް އެ ސައިޓުން ފާހަގަކުރެއެވެ. ސަބަބަކީ ހަނގުރާމައިގެ ބައިވެރިންނަށް ދިގު މުއްދަތުގައި ދޭންޖެހޭ ސިއްޙީ ފަރުވާ ފަދަ ޚަރަދުތައް މިހާރު ފެންނަން ހުރި އަދަދުތަކުގެ ތެރޭގައި ނުހިމެނޭތީއެވެ.

އެމެރިކާ އާއި އިސްރާއީލުން އީރާނަށް ހަމަލާދޭން ފަށާފައިވަނީ، މިދިޔަ ފެބުރުއަރީމަހުގެ 28 ވަނަ ދުވަހެވެ. ހަނގުރާމައިގެ މިހާހިސާބަށް އާއިރު، އީރާނުގެ ރޫހީ ލީޑަރު ޝަހީދުކޮށްލުން ފިޔަވައި އިތުރު ކަމެއް އެމެރިކާ އަދި އިސްރާއީލަށް ހާސިލްވެފައި ނެތްކަމަށް ތަޖުރިބާކާރުން ބުނެއެވެ.