އިންޑިއާ ކަނޑުގައި އޮއްވައި އެމެރިކާއިން އީރާނުގެ މަނަވަރަށް ދިން ހަމަލާގެ ބަދަލު ހިފާނޭކަމަށް އީރާނުގެ އަސްކަރިއްޔާއިން ބުނެފިއެވެ.
އީރާނުގެ އަސްކަރިއްޔާގެ ކޮމާންޑަރ-އިން-ޗީފް އަމީރު ޙާތަމީގެ މި އިންޒާރު ދެއްވާފައިވަނީ، އިންޑިއާ ކަނޑުގައި އަސްކަރީ ތަމްރީނެއް ނިންމުމަށްފަހު އެނބުރި ދަނިކޮށް، އީރާނުގެ މަނަވަރު "އައި.އާރު.އައި.އެސް ދަނާ" އަށް އެމެރިކާއިން ދިން ހަމަލާއާ ގުޅިގެންނެވެ. މި ހަމަލާގައި އީރާނުގެ މަނަވަރުގައި ތިބި އޮފިސަރުންގެ ތެރެއިން 104 ފަޅުވެރިއަކު ވަނީ ޝަހީދުވެފައެވެ.
މި މަނަވަރަކީ އީރާނުގެ ނޭވީ ފްލީޓްގައި މިވަގުތު އޮތް އެންމެ ފަހުގެ އެއް މަނަވަރެވެ.
އީރާނުގެ ރަސްމީ ނޫސް އޭޖެންސީ "އިރްނާ" އިން ރިޕޯޓުކޮށްފައިވާ ގޮތުގައި، ޙާތަމީ ވިދާޅުވީ "ދަނާ" މަނަވަރުގެ ފަޅުވެރިން ފުރިހަމަކުރީ ސުލްހަވެރި މިޝަނެއް ކަމަށް ވިދާޅުވެފައެވެ. އެގޮތުން އެ އޮފިސަރުންނަކީ ހަނގުރާމައިގައި އެއްވެސް ގޮތަކަށް ބައިވެރިނުވާ ބައެއް ކަމަށާއި، މަނަވަރަށް ހަމަލާދީފައިވަނީ އަސްކަރީ ތަމްރީނުތަކެއް ފުރިހަމަކުރުމަށްފަހު އެނބުރުި ޤައުމަށް ދަތުރުކުރި މަގުމަތީގައި ކަމަށެވެ.
ޙާތަމީ ވިދާޅުވީ، "ދަނާ" މަނަވަރުގެ ނަމާއި އޭގެ ފަޅުވެރިން ދެއްކި ހިތްވަރާއި ގުރުބާނީއަކީ އީރާނުގެ ކަނޑުގެ ސިފައިންގެ ތާރީޚުގައި ހިތްވަރުގަދަކަމާއި ވަފާތެރިކަމުގެ ނަމޫނާއެއްގެ ގޮތުގައި އަބަދަށް ދެމިއޮންނާނެ ކަމެއް ކަމަށެވެ. އަދި އީރާނުގެ ކަނޑުގެ ސަރަހައްދު ދިފާއުކޮށް، ކަނޑުގެ ބާރުވެރިކަން އިތުރަށް ވަރުގަދަ ކުރުމުގައި ކުރިއަށްވުރެ ވެސް ބޮޑު އަޒުމަކާއެކު އަސްކަރިއްޔާ ސާބިތުވެ އޮންނާނެ ކަމަށް އޭނާ ވިދާޅުވިއެވެ.
އީރާނުގެ މަނަވަރަށް ދިން ހަމަލާތަކާ ގުޅިގެން ސްރީލަންކާ އަދި އިންޑިއާއިން ވަނީ މަނަވަރުގައި ތިބި ހާލުގައި ޖެހުނު އޮފިސަރުންނަށް އެހީތެރިކަން ފޯރުކޮށްދީފައެވެ. އަދި ޝަހީދުވި އޮފިސަރުން ލަންކާގެ މޯޗަރީތަކަށް ގެންދިޔަކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
