އަފްޣާނިސްތާނުގެ ވެރިރަށް ކާބުލްގައި ހުންނަ މަސްތުވާތަކެތި ބޭނުންކުރާ މީހުންނަށް ފަރުވާދޭ ހޮސްޕިޓަލަކަށް ޕާކިސްތާނު ސިފައިން ދިން ވައިގެ ހަމަލާއެއްގައި 400 އަށްވުރެ ގިނަ މީހުން މަރުވެފައިވާ ކަމަށް އަފްޣާނިސްތާނުގެ ތާލިބާން ސަރުކާރުން ތުހުމަތުކޮށްފިއެވެ. ނަމަވެސް ޕާކިސްތާނުން މި ތުހުމަތުތައް ދޮގުކުރެއެވެ. 

އަފްޣާނިސްތާނުގެ ތާލިބާން ސަރުކާރުގެ ތަރުޖަމާނުގެ ނައިބު ޙަމްދުالله ފިޠުރަތު ވިދާޅުވި ގޮތުގައި، ކާބުލްގެ 'ޢުމަރު އެޑިކްޝަން ޓްރީޓްމަންޓް ހޮސްޕިޓަލް' އަށް މި ހަމަލާ ދީފައިވަނީ ހޯމަ ދުވަހުގެ ރޭ އެ ގައުމުގެ ގަޑިން ގާތްގަނޑަކަށް 9 ޖަހާކަންހާއިރުއެވެ. 2,000 އެނދުގެ މި ހޮސްޕިޓަލަށް ދިން ހަމަލާގައި އިމާރާތުގެ ބޮޑު ބައެއް ސުންނާފަތިވެފައިވާ ކަމަށް އޭނާ އެކްސްގައި ބުނެފައިވެއެވެ.

"މިހާތަނަށް ލިބިފައިވާ މަޢުލޫމާތަށް ބަލާއިރު، މި ހަމަލާގައި މަރުވި މީހުންގެ އަދަދު ވަނީ 400 އަށް އަރާފައި. އަދި 250 އަށްވުރެ ގިނަ މީހުން ޒަޚަމްވެފައިވާ ކަމަށް ރިޕޯޓްކޮށްފައިވޭ،" ފިޠުރަތު ވިދާޅުވިއެވެ.

އޭނާ އިތުރަށް ވިދާޅުވި ގޮތުގައި ރެސްކިއު ޓީމުތަކުން މިހާރު ދަނީ އަލިފާން ކޮންޓްރޯލްކޮށް، އިމާރާތުގެ ދަށުގައި ތިބި މީހުން ހޯދުމުގެ މަސައްކަތް ކުރަމުންނެވެ.

ނަމަވެސް ޕާކިސްތާނުން ވަނީ މި ތުހުމަތުތައް ދޮގުކޮށްފައެވެ. ޕާކިސްތާނުގެ ބޮޑުވަޒީރު ޝެހްބާޒް ޝަރީފްގެ ތަރުޖަމާނު މުޝައްރަފް ޒައިދީ ވިދާޅުވީ، ކާބުލްގެ އެއްވެސް ހޮސްޕިޓަލަކަށް ހަމަލާދީފައި ނުވާނެ ކަމަށާއި، މިއީ ހަގީގަތާ ޚިލާފު ވާހަކަތަކެއް ކަމަށެވެ. ޕާކިސްތާނުގެ އިންފޮމޭޝަން މިނިސްޓްރީން ބުނި ގޮތުގައި އެގައުމުން ހަމަލާދީފައިވަނީ ކާބުލް އަދި ނަންގަހާރު ޕްރޮވިންސްގައި ހުރި އަސްކަރީ މަރުކަޒުތަކަށާއި ޓެރަރިސްޓުންނަށް އެހީތެރިކަން ފޯރުކޮށްދޭ ތަންތަނަށެވެ.

މި ހާދިސާ ހިނގި ވަގުތު ހޮސްޕިޓަލުގައި ހުރި ސެކިއުރިޓީ ގާޑެއް ކަމަށްވާ އުމީދު ސްޓޭނިކްޒައި ބުނީ، ހަމަލާގެ ކުރިން ޖެޓްތަކެއް އުދުހޭ އަޑު އިވުނު ކަމަށެވެ.

"އަހަރެމެންގެ ވަށައިގެން އަސްކަރީ ޔުނިޓްތައް ތިބި. އެ ޔުނިޓްތަކުން ޖެޓަށް ހަމަލާދޭން ފެށުމުން، ޖެޓުން ބޮން އެޅީ. އޭގެ ފަހުން މުޅި ތަނުގައި އަލިފާން ރޯވި،" އޭނާ ބުންޏެވެ.

އޭނާ ބުނި ގޮތުގައި މަރުވި އަދި ޒަޚަމްވި އެންމެންނަކީވެސް އާންމު ރައްޔިތުންނެވެ.

އަފްޣާނިސްތާނުގެ ސަރުކާރުގެ ތަރުޖަމާނު ޒަބީހުالله މުޖާހިދު ވަނީ މި ހަމަލާ ކުށްވެރިކޮށް، މިއީ ބައިނަލްއަޤްވާމީ އުސޫލުތަކާ ޚިލާފު، އިންސާނިއްޔަތާ ޚިލާފު ޖަރީމާއެއް ކަމަށް ސިފަކޮށްފައެވެ.

މި ހަމަލާ އައިސްފައިވަނީ ދެ ޤައުމުގެ ބޯޑަރު ސަރަޙައްދުގައި ހަމަލާ ބަދަލުކުރުންތައް އިތުރުވެ، ފާއިތުވި ދެ ހަފްތާއެއްހާ ދުވަހުގެ ތެރޭގައި މަސްރަޙް ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. އަދި އދ. ގެ ސަލާމަތީ މަޖިލީހުން އަފްޣާނިސްތާނުގައި ހަރަކާތްތެރިވާ ޓެރަރިސްޓް ޖަމާއަތްތަކާ ދެކޮޅަށް ފިޔަވަޅު އެޅުމަށް ގޮވާލާފައިވާ ވަގުތެއްގައެވެ.

ޕާކިސްތާނުން ތުހުމަތުކުރާ ގޮތުގައި އަފްޣާނިސްތާނުން ދަނީ ޕާކިސްތާނާ ދެކޮޅަށް މަސައްކަތްކުރާ ހަނގުރާމަވެރި ޖަމާއަތްތަކަށް ހިމާޔަތް ދެމުންނެވެ. ނަމަވެސް ތާލިބާން ސަރުކާރުން މިކަން ދޮގުކުރެއެވެ.