ކަރަންޓު އުޅަނދުތަކުގެ ނަމްބަރު ބޯޑުތައް ފެހި ކުލައަށް ބަދަލު ކުރުމަށް 2 މަސް ދުވަހުގެ މުއްދަތެއް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ދީފިއެވެ.

އިއްޔެގެ ވަގުތެއްގައި ސަރުކާރުން ގެޒެޓްގައި އާއްމުކުރި އެއްގަމުގައި ދުއްވާ އުޅަނދު ރަޖިސްޓްރީކުރުމުގެ ގަވާއިދައް ގެނައި 7 ވަނަ އިޞްލާޙުގައި ވަނީ ކަރަންޓު އުޅަނދުތަކުގެ ނަމްބަރު ބޯޑު ފެހި ކުލައަށް ބަދަލު ކުރުމަށް އަންގަާ 2 މަސް ދުވަހުގެ މުއްދަތެއް ދީފައެވެ.

ކަރަންޓު އުޅަނދުތަކަކީ އާންމުކޮށް ބޭނުންކުރާ ޕެޓްރޯލް ނުވަތަ ޑީސެލް އިންޖީނުގެ ބަދަލުގައި، ހަމައެކަނި ބެޓެރީގެ ހަކަތަ ބޭނުންކޮށްގެން ނުވަތަ ކަރަންޓު މޯޓާއެއް ބޭނުންކޮށްގެން ދުއްވާ އުޅަނދުތަކެވެ.

އެގޮތުން އާ ޤަވާއިދުގެ ދަށުން، ވިޔަފާރީގެ އުސޫލުން ބޭނުންކުރާ ކަރަންޓު އުޅަނދުތަކުގައި ބޭނުންކުރާ ނަމްބަރު ބޯޑު ހުންނަންވާނީ، ފެހިކުލައިގެ ބޯޑެއްގައި، ރީނދޫކުލައިގެ އަކުރުން ލިޔެފައެވެ.

އަދި އަމިއްލަ ބޭނުންތަކައް ބޭނުންކުރާ ކަރަންޓު އުޅަނދުތަކުގައި ނަމްބަރު ބޯޑު ހުންނަންވާނީ، ފެހިކުލައިގެ ބޯޑެއްގައި، ހުދުކުލައިގެ އަކުުރުން ލިޔެފައެވެ.

މި އިޞްލާޙު ގެނަސްފައިމިވަނީ ޢީދު ދުވަހު ސަރުކާރުން ފަށަން ނިންމާފައިވާ ޓެކްސީ ލައިންތަކާއި ދިމާކޮށްގެނެވެ. މި ކާރުތަކަކީ މުޅިން ކަރަންޓު ބޭނުން ކޮށްގެން ދުއްވާ ކާރުތަކެކެވެ. އަދި މި ކާރުތަކުގައި ހުންނާނީ އަލަށް އިފްތިތާހު ކުރި ފެހި ކުލައިގެ ނަމްބަރު ބޯޑުތަކެވެ.