އިއްޒުއްދީން މަގުގައި ހުރި ގުދަނުގައި މިރޭ ހިނގި އަލިފާނުގެ ބޮޑު ހާދިސާގައި އެ ސަރަހައްދުގައި ހުރި 4 ގެއަކުން މީހުން ހުސްކުރަން ޖެހުނުކަމަށް އެންޑީއެމްއޭއިން ބުނެފިއެވެ.
ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ބުނީ، އަލިފާނުގެ ހާދިސާގައި އެހީތެރިކަން ފޯރުކޮށްދޭން ޖެހުނު ފަރާތްތަކަށް އެހީތެރިކަން ދެމުންދާކަމަށެވެ. އެގޮތުން 4 އާއިލާއެއްގެ 18 މީހުންނަށް އެހީތެރިކަން ފޯރުކޮށްދޭން ޖެހުނުކަމަށް އެ އިދާރާއިން ބުންޏެވެ.
ރޯވި އަލިފާންގަނޑު މިހާރު ކޮންޓްރޯލް ކުރެވިފައިވާއިރު، އަލިފާންގަނޑު ނިއްވާލުމަށް ވެލާނާ އިންޓަރނޭޝަނަލް އެއާޕޯތްގެ ފަޔަރ ޓްރަކެއްވެސް ވަނީ ގެނެސްފައެވެ. މައުލޫމާތު ލިބިފައިވާ ގޮތުގައި އަލިފާނުގެ ހާދިސާ ހިނގި ގޯޑައުނަކީ ގަހު ކާނާ އާއި ކެމިކަލް ފަދަ ތަކެތި ބަހައްޓާފައި ހުރި ތަނެކެވެ. ގޯޑައުނުގައި އަލިފާނުގެ ހާދިސާ ހިނގަން މެދުވެރިވި ސަބަބެއް އަދި ނޭނގެއެވެ. އަދި މިހާދިސާގައި މީހަކަށް އަނިޔާވިކަމެއްވެސް ސާފެއް ނުވެއެވެ.
މާލޭގައި މިރޭ ނުރައްކާތެރި އަލިފާނުގެ ހާދިސާއެއް ހިނގާދިޔައިރު ރެއާއި މިއަދުވެސް ވަނީ އަލިފާނުގެ ނުރައްކާތެރި ދެ ހާދިސާއެއް ހިނގާފައެވެ.
Advertisement
This content is created and paid for by advertisers and does not involve Voice Journalists
