އެމެރިކާގެ ދެ ހަނގުރާމަމަތީ މަތިންދާބޯޓު ސްްރީލަންކާގެ މަޓަލާ އެއާޕޯޓަށް ޖެއްސުމުގެ ހުއްދައަށް އެދުމުން، ލަންކާ ސަރުކާރުން އެކަމަށް އިންކާރުކޮށްފިއެވެ.

މިކަން ރަސްމީކޮށް އިއުލާންކުރެއްވީ އެ ޤައުމުގެ ރައީސް އަނޫރާ ކުމާރަ ދިސާނަޔަކަ، މިއަދު މަޖިލީހުގައި ވާހަކަފުޅު ދައްކަވަމުންނެވެ.

ލަންކާ ސަރުކާރުން ބުނިގޮތުގައި، ޖިބޫޓީގައި އޮތް އެމެރިކާގެ ބޯޓުތަކަކަށް ލަންކާއަށް ޖެއްސުމުގެ ހުއްދައަށް އެދުނީ މި މަހުގެ 4 އަދި 8 ވަނަ ދުވަހުއެވެ. ނަމަވެސް، ޤައުމުގެ ސިޔާސަތުތަކަށް ބަލައި ސްރީލަންކާއިން ވަނީ އެ ދެ ފަހަރުވެސް އެމެރިކާގެ އެދުމަށް ނޫނެކޭ ބުނެފައެވެ.

މި ނިންމުމަކީ ބައިނަލްއަޤުވާމީ މައްސަލަތަކުގައި ސްްރީލަންކާއިން އެއްވެސް ފަރާތަކަށް ނުޖެހި އޮތުމަށް ނިންމި ނިންމުމެކެވެ. ސްރީލަންކާގެ ރައީސް ވިދާޅުވީ، އެކި ޤައުމުތަކުގެ ފިއްތުންތައް ހުރި ނަމަވެސް، މެދުއިރުމަތީގެ ހަނގުރާމައިގެ ތެރޭގައި ސްރީލަންކާ އޮންނާނީ ވަކި ފަރާތަކަށް އެހީތެރިނުވާ މިނިވަން ޤައުމެއްގެ ގޮތުގައެވެ.

އެމެރިކާއިން ޖައްސަން އުޅުނު މި ދެ ބޯޓަކީ ބޯޓުފަހަރަށް ހަމަލާދޭ އަށް މިސައިލް ހަރުކޮށްފައިވާ ދެ ބޯޓު ކަމަށް ސްރީލަންކާގެ ދިފާއީ ބާރުތަކުން މައުލޫމާތުދެއެވެ. ހަތިޔާރު ހުރި އަސްކަރީ ބޯޓުތަކަކަށް ސްރީލަންކާގެ އެއާޕޯޓު ބޭނުންކުރުމުގެ ފުރުސަތު ނުދިނުމަކީ ޤައުމުގެ ސަލާމަތަށްޓަކައި ނިންމި މުހިންމު ނިންމުމެކެވެ.

މި ނިންމުން ހާމަކޮށްފައިވަނީ އެމެރިކާގެ ހާއްސަ މަންދޫބަކާއެކު ސްރީލަންކާ ސަރުކާރުން މުހިންމު ބައްދަލުވުމެއް ބޭއްވިތާ އެއްދުވަސް ފަހުންނެވެ. އެ ބައްދަލުވުމުގައި ވިޔަފާރީގެ ވާހަކަތައް ދެކެވުނު ނަމަވެސް، އަސްކަރީ ކަންކަމުގައި ސްރީލަންކާގެ ބިން ބޭނުންކުރަން ދޫނުކުރާނެކަން މިހާރު މިވަނީ ސާފުވެފައެވެ.