މެދުއިރުމަތީގެ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، ފާއިތުވި ދެ ހަފުތާގެ ތެރޭގައި ދެވަނަ ފަހަރަށް ސްރީލަންކާގެ ސަރުކާރުން ތެލުގެ އަގު ބޮޑުކޮށްފިއެވެ.

އަލަށް ގެނައި ބަދަލާއެކު ޕެޓްރޯލް ލީޓަރެއްގެ އަގު ވަނީ 317 ރުޕީސް އިން 398 ރުޕީސް އަށް އުފުލިފައެވެ. އަދި އާންމު ދަތުރުފަތުރުގެ ނިޒާމުގައި އެންމެ ގިނައިން ބޭނުންކުރާ ޑީސަލް ލީޓަރެއްގެ އަގު ވަނީ 303 ރުޕީސް އިން 382 ރުޕީސް އަށް ބޮޑުކޮށްފައެވެ. މިއީ ގާތްގަނޑަކަށް 25 އިންސައްތައިގެ ބޮޑުވުމެކެވެ.

މި ނިންމުމާ ގުޅިގެން ސްރީލަންކާގެ ރައީސް އަނޫރާ ކުމާރާ ދިސާނަޔަކަ ވަނީ، މެދުއިރުމަތީގެ ހަނގުރާމަ ދިގުލައިގެން ގޮސްފާނެ ކަމަށް ތައްޔާރުވުމަށް ކަމާބެހޭ އިދާރާތަކަށް އަންގަވާފައެވެ. ޚާއްސަކޮށް ހުރްމުޒް ކަނޑުއޮޅި ބަންދުކުރުމުގެ ސަބަބުން ތެޔޮ ލިބުމަށް ހުރަސްތަކެއް ކުރިމަތިވެފައިވާތީ، ތެޔޮ ބޭނުންކުރާ މިންވަރު 15 އިންސައްތަ އާއި 20 އިންސައްތަ އާ ދެމެދުގެ މިންވަރަކަށް ދަށްކުރުމަށް ލަންކާ ސަރުކާރުން ވަނީ އަމާޒު ހިފާފައެވެ.

ތެލުގެ އަގަށް އައި މި ބަދަލާއެކު، ލަންކާގެ އަމިއްލަ ބަސް ދަތުރުފަތުރުގެ ޚިދުމަތް ދޭ ފަރާތްތަކުން ވަނީ ޚިދުމަތް މެދުކަނޑާލާފައެވެ. ބަސް އޯނަރުން ބުނާ ގޮތުގައި ތެލުގެ އަގު މިހާ ބޮޑުވުމުން މިހާރު ހުރި އަގުތަކުގައި ދަތުރުތައް ކުރުމަކީ ލިބޭ ބޮޑު ގެއްލުމެކެވެ. މިކަމުގެ ސަބަބުން އާންމު ރައްޔިތުންނަށް ދަތުރުފަތުރު ކުރުމުގައި ބޮޑެތި ތަކުލީފުތަކެއް ވަނީ ކުރިމަތިވެފައެވެ.

ސަރުކާރުން މިހާރު ވަނީ ތެޔޮ އިގްތިސާދު ކުރުމުގެ ގޮތުން ހަފުތާއަކު ހަތަރު ދުވަހު މަސައްކަތް ކުރާ ގޮތަށް ހަމަޖައްސައި، ވީވަރަކުން ގޭގައި ތިބެގެން މަސައްކަތް ކުރުމަށް ބާރުއަޅަން ފަށާފައެވެ. 2022 ވަނަ އަހަރު ކުރިމަތިވި އިގްތިސާދީ ކާރިސާއިން އަރައިގަތުމަށް މަސައްކަތް ކުރަމުންދާ ދަނޑިވަޅެއްގައި، މި ހަނގުރާމައިގެ ސަބަބުން ލަންކާގެ އިގްތިސާދަށް އިތުރު ލޮޅުންތަކެއް އަރާނެ ކަމުގެ ބިރު ވަނީ ހީވެފައެވެ.