ޣައްޒާގެ މެދުތެރޭގައި އޮންނަ ދީރުލް ބަލަހްގައި، ގެދޮރު ގެއްލިފައިވާ ފަލަސްތީނު ރައްޔިތުން ދިރިއުޅެމުންދިޔަ ރެފިއުޖީ ކޭމްޕަކަށް އިސްރާއީލުގެ އަސްކަރިއްޔާއިން ދިން ނުރައްކާތެރި ހަމަލާއެއްގައި މަދުވެގެން 3 ބަޔަކު ޝަހީދުވެ، ގިނަ ބަޔަކު ޒަޚަމްވެއްޖެއެވެ.
މީސްމީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، މި ހަމަލާ އަމާޒުވީ އެއްވެސް ކުށެއް ނެތް އާންމުން ދިރިއުޅެމުންދިޔަ ސަރަހައްދަކަށެވެ.
ޣައްޒާގެ ސިއްހީ ވުޒާރާއިން ހާމަކޮށްފައިވާ ގޮތުގައި، މިދިޔަ އޮކްޓޯބަރު މަހުން ފެށިގެން "ސުލްހައިގެ އެއްބަސްވުމެއް" އޮތް ކަމަށް ބުނި ނަމަވެސް، އިޒްރޭލުން ދެމުންދާ ހަމަލާތަކުގައި މިހާތަނަށް 680 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންކަން ފާހަގަކުރެވެއެވެ.
ދީރުލް ބަލަހްގެ މި ކޭމްޕަށް ދިން ހަމަލާއާއެކު އެ ސަރަހައްދުގައި ބޮޑު އަލިފާންގަނޑެއް ރޯވެ، ފޭލިގެތައް އަނދައި އަޅިއަށްވެފައިވާ ކަމަށް މަންޒަރުދުށް މީހުން ބުނެއެވެ.
އިސްރާއީލުން މިފަދަ ހަމަލާތައް ތަކުރާރުކުރަމުން ދަނީ ބައިނަލްއަގުވާމީ މުޖުތަމައުގެ ފިއްތުންތަކަށް ބެލުމެއް ނެތިއެވެ. ޣައްޒާގެ ގިނަ ސަރަހައްދުތަކެއް މިހާރު ވަނީ ސުންނާފަތިވެފައިވާއިރު، އިންސާނީ އެހީ ފޯރުކޮށްދިނުމަށްވެސް ބޮޑެތި ހުރަސްތަކެއް ވަނީ ކުރިމަތިވެފައެވެ.
Advertisement
This content is created and paid for by advertisers and does not involve Voice Journalists
